ឯកឧត្តម ស៊ុន ចាន់ថុល៖ គម្រោងគំនិតផ្តួចផ្តើមខ្សែក្រវាត់ និងផ្លូវ របស់ចិន មិនមែនជាអន្ទាក់បំណុលវ័ណ្ឌកនោះទេ ភ្នំពេញ ៖ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានលើកឡើងថា ប្រទេសកម្ពុជាកំពុងទទួលបានផលជាច្រើនពីសមិទ្ធិផលដ៏សំខាន់ៗ ពីគម្រោងគំនិតផ្តួចផ្តើមខ្សែក្រវាត់ និងផ្លូវ(BRI) របស់ចិន ជាពិសេស ការអភិវឌ្ឍហេដ្ឋារចនាសម្ព័ន្ធក្នុងវិស័យដឹកជញ្ជូន ដើម្បីរួមចំណែកក្នុងការអភិវឌ្ឍសេដ្ឋកិច្ច និងសង្គមនៅកម្ពុជា ដោយឯកឧត្តម អះអាងថា គម្រោង BRI មិនមែនជាអន្ទាក់បំណុលវ័ណ្ឌកឡើយ តែផ្ទុយទៅវិញ BRI កំពុងជួយកសាងសេដ្ឋកិច្ចឱ្យរីកចម្រើនទៅមុខជាលំដាប់។ ឯកឧត្តម ស៊ុន ចាន់ថុល ឧបនាយករដ្ឋមន្រ្តី ថ្លែងក្នុងកម្មវិធិអបអរសាទខួប១ឆ្នាំនៃការដាក់ឱ្យដំណើរការផ្លូវល្បឿនលឿន ភ្នំពេញ-ក្រុងព្រះសីហនុ នៅរសៀលថ្ងៃទី៧ ខែវិច្ឆិកា ឆ្នាំ២០២៣ ថា កម្ពុជាកំពុងមានទំនាក់ទំនងដ៏ល្អឥតខ្ចោះរវាងកម្ពុជា និងចិន ដោយកម្ពុជាកំពុងទទួលបានផលជាច្រើនក្រោមគម្រោងគំនិតផ្តួចផ្តើមខ្សែក្រវាត់និងផ្លូវ(BRI)របស់ចិន។ ឧបនាយករដ្ឋមន្រ្តី ស៊ុន ចាន់ថុល ថ្លែងទៀតថា BRI បានជួយកសាងផ្លូវថ្នល់ដល់ប្រទេសកម្ពុជារួចរាល់ប្រមាណ ៣១ ខ្សែ ដែលមានប្រវែង ៣ ០៧៧ គីឡូម៉ែត្រ និង ចំណាយថវិកា ២ ១៨០ លានដុល្លារសហរដ្ឋអាមេរិកនិងផ្លូវ ៦ ខែ្ស ប្រវែង ៥៥៧គីឡូម៉ែត្រ ប្រើប្រាស់ថវិកាប្រមាណ ៦៧៥ លានដុល្លារសហរដ្ឋអាមេរិក ដែលកំពុងសាងសង់ ព្រមទាំង ស្ពានចំនួន ១០ធំៗ មានប្រវែង១៨ ០៩៧ ម៉ែត្រ ដែលបានសាងសង់រួច ដោយប្រើប្រាស់ថវិការ ៣៧២ លានដុល្លារសហរដ្ឋអាមេរិក និងកំពុងសាងសង់ស្ពានឆ្លងកាត់ទន្លេមេគង្គខេត្តក្រចេះប្រវែង១ ៧៣១ម៉ែត្រ ចំណាយថវិកាចំនួន ១១២ លានដុល្លារសហរដ្ឋអាមេរិក ។ ឧបនាយករដ្ឋមន្រ្តី ថ្លែងទៀតថា គម្រោង BRI បានជួយកម្ពុជាច្រើន និងបានជួយប្រទេសដែលជាសមាជិក BRI ក្នុងការកសាងប្រទេសជាតិមាតុភូមិរបស់ប្រទេសនីមួយៗ។ BRI មិនបានធ្វើបាបកម្ពុជាទេ ហើយ BRI ក៏មិនបានដាក់បន្ទុក ឬជាអន្ទាក់បំណុលវ័ណ្ឌកនោះទេ។ ឧបនាយករដ្ឋមន្រ្តី ស៊ុន ចាន់ថុល ថ្លែងដូច្នេះថា ៖ «ខ្ញុំសូមជម្រាបថា BRI នេះបានជួយកម្ពុជាច្រើន និងជួយដល់ប្រទេសដែលបានយកជាសមាជិក BRI នេះ ក្នុងការកសាងប្រទេសជាតិមាតុភូមិរបស់ប្រទេសនីមួយៗ។ BRI មិនបានធ្វើបាបកម្ពុជាទេ។ សូមជ្រាបថា BRI បានជួយ ហើយ BRIនេះ មិនបានដាក់បន្ទុក ឬជា អន្ទាក់ឱ្យខ្មែរជាប់បំណុលវ័ណ្ឌកនោះទេ។ ផ្ទុយទៅវិញ BRI យកប្រព័ន្ធថិវកាមកកសាងប្រព័ន្ធហេដ្ឋារចនាសម្ព័ន្ធនៅកម្ពុជាយើង ដើម្បីឱ្យសេដ្ឋកិច្ចជាតិយើងនេះ មានការរីកចម្រើន។ បើយើងនៅមុនពេលកូវីដ១៩ គឺ (សេដ្ឋកិច្ច) ៧ ភាគរយ ក្នុង១ឆ្នាំ គឺបានមកពីមួយចំណែកដោយ BRI ដូច្នេះ យើងគាំទ្រ សម្តេចតេជោ ហ៊ុន សែន លោកគាំទ្រ គំនិតផ្តួចផ្តើម BRI របស់ប្រធានាធិបតីចិន ស៊ីជីង ពីង។ សម្តេចធិបតី នាយករដ្ឋមន្រ្តី ក៏គាំទ្រគំនិតផ្តួចផ្តើម BRI របស់ប្រធានាធិបតី ស៊ីជីង ពីង ដែរ»។ បើយោងតាមឧបនាយករដ្ឋមន្រ្តី ស៊ុន ចាន់ថុល សម្រាប់កម្ពុជា គម្រោងដែលប្រើប្រាស់ឥណទានសម្បទាន និងជំនួយឥតសំណងរបស់មិត្តចិនដែលបានសាងសង់ហេដ្ឋា រចនាសម្ព័ន្ធ រួចរាល់ និងកំពុងសាងសង់មានទឹកប្រាក់សរុបប្រមាណ ៣.៣៤០ លានដុល្លារសហរដ្ឋអាមេរិក គិតមកដល់ពេលនេះ៕