ពិធីប្រគល់-ទទួលប្រព័ន្ធគ្រប់គ្រងការដឹកជញ្ជូន (Transport Management System-TMS) ) ក្រោមការអនុវត្តគម្រោង “រៀបចំផែនការមេទំនើបកម្មប្រព័ន្ធភស្តុភារកម្មកម្ពុជា និងគម្រោងអនុវត្តសាកល្បង” ភ្នំពេញ៖ នាព្រឹកថ្ងៃព្រហស្បតិ៍ ទី២៦ ខែតុលា ឆ្នាំ២០២៣ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធី ប្រគល់-ទទួលប្រព័ន្ធគ្រប់គ្រងការដឹកជញ្ជូន(TMS) ក្រោមក្របខណ្ឌជំនួយអភិវឌ្ឍន៍ផ្លូវការតាមរយៈក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ ដោយមានការចូលរួមពីតំណាងអង្គភាពពាក់ព័ន្ធ គណៈប្រតិភូកូរ៉េ និងតំណាងវិស័យឯកជន មកពីសមាគមភស្តុភារកម្មកម្ពុជា។ គម្រោង “រៀបចំផែនការមេទំនើបកម្មប្រព័ន្ធភស្តុភារកម្មកម្ពុជា និងគម្រោងអនុវត្តសាកល្បង” នៅដំណាក់កាលទី១ បានផ្ដល់កំណល់ទ្រទំនិញ (Pallet) ស្ដង់ដារ ចំនួន ២០០០ មកក្រសួង ដើម្បីប្រើប្រាស់ និងចែកជូនទៅភាគីពាក់ព័ន្ធ។ ដំណាក់កាលទី២ ខែធ្នូ ឆ្នាំ២០២២ បានផ្ដល់ប្រព័ន្ធផតថលព័ត៌មានភស្តុភារកម្មជាតិកម្ពុជា ដើម្បីផ្សព្វផ្សាយព័ត៌មានទាក់ទងនឹងវិស័យភស្តុភារកម្មនៅកម្ពុជា និងដំណាក់កាលទី៣នេះបានផ្ដល់ប្រព័ន្ធគ្រប់គ្រងការដឹកជញ្ជូន។ ដោយយល់ឃើញពីសក្ដានុពលនៃប្រព័ន្ធនេះ ទើបក្រសួងបានផ្តល់ជូនបន្តទៅសមាគមភស្តុភារកម្ម ដើម្បីប្រើប្រាស់ជាប្រយោជន៍ក្នុងវិស័យឯកជន ព្រោះប្រព័ន្ធនេះបានអភិវឌ្ឍឡើងដើម្បីសម្រួលការគ្រប់គ្រងខ្សែសង្វាក់ផ្គត់ផ្គង់ ការទំនាក់ទំនងរវាងក្រុមហ៊ុនដឹកជញ្ជូន អ្នកដឹកជញ្ជូន និងអ្នកទទួលទំនិញ ជាពិសេសអាចឱ្យប្រតិបត្តិករតាមដានរំហូរនៃការដឹកជញ្ជូន៕