[Kampucheathmey] - ផ្លូវប្របមាត់សមុទ្រចាប់ពីកំពង់ផែកោះទន្សាយខេត្តកែប ទៅអង្កោល តភ្ជាប់ផ្លូវជាតិលេខ ១៣-៣២ សាងសង់បានជាង ៨០ ភាគរយហើយ
2023-10-18
ទៅកាន់ទំព័រចុះផ្សាយក្នុង Kampucheathmey
នៅថ្ងៃទី ១៨ ខែតុលា ឆ្នាំ ២០២៣ នេះ លោក សោម ពិសិដ្ឋ អភិបាលខេត្តកែប លើកឡើងថា ផ្លូវប្របមាត់សមុទ្រប្រវែងជាង ១១ គីឡូម៉ែត្រ តភ្ជាប់គ្នាចាប់ពីកំពង់ផែកោះទន្សាយខេត្តកែប មកកាន់ឆ្នេរអង្កោល និងបំបែកតភ្ជាប់ទៅកាន់ផ្លូវជាតិលេខ ១៣ – ៣២ កំពុងធ្វើការសាងសង់ ស្ថាបនា បើគិតមកទល់ពេលនេះសម្រេចជាលទ្ធផលប្រមាណជាង ៨០ ភាគរយហើយ។ ផ្លូវប្របមាត់សមុទ្រមួយខ្សែនេះ ស្ថាបនាឡើងក្រោមមូលនិធិរបស់ធនាគារអភិវឌ្ឍន៍អាស៊ី (ADB) ចំណាយថវិកាប្រមាណ ១០,៥ លានដុល្លារអាមេរិក។
លោក សោម ពិសិដ្ឋ បញ្ជាក់បន្ថែមថា ផ្លូវប្របមាត់សមុទ្រនេះ នឹងប្រែក្លាយជាសរសៃឈាមទេសចរណ៍មួយយ៉ាងសំខាន់ តភ្ជាប់គ្នារវាង ឆ្នេរកែប និងឆ្នេរអង្កោល ទៅដល់ថ្ងៃអនាគត នឹងនាំឲ្យមានកំណើនទាក់ទាញភ្ញៀវទេសចរជាតិ និងភ្ញៀវទេសចរអន្តរជាតិ មកលេងកម្សាន្តទស្សនាខេត្តកែបកាន់តែច្រើនឡើង ហើយក៏អាចបញ្ចៀសការកករស្ទះ នៃភ្ញៀវទៅលេងកម្សាន្តលម្ហែនៅឆ្នេរកែបផងដែរ។
ទោះបីជាយ៉ាងណា លោកអភិបាលខេត្តកែប ក៏បានជំរុញឲ្យក្រុមហ៊ុនដែលកំពុងម៉ៅការសាងសង់ ធ្វើយ៉ាងណាពន្លឿនការសាងសង់របស់ខ្លួន អាចឲ្យពលរដ្ឋប្រើប្រាស់ផ្លូវនេះបានស្រួលជាងមុន ជាពិសេសនោះ សម្រាប់ត្រៀមទទួលភ្ញៀវទេសចរជាតិ និងភ្ញៀវទេសចរអន្តរជាតិ មកលេងកម្សាន្ត នាដើមខែធ្នូ ចុងឆ្នាំ ២០២៣ ខាងមុខនេះ ព្រោះខេត្តកែបត្រូវធ្វើជាម្ចាស់ផ្ទះសម្រាប់រៀបចំពិធីបុណ្យសមុទ្រជុំទី ១០ លើកទី ៣ នាពេលខាងមុខផងដែរ។
គួរបញ្ជាក់ថា គម្រោងផ្លូវប្របមាត់សមុទ្រនេះ គឺជាអនុគម្រោងមួយ នៃគម្រោងហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាប័ន្ន នៃមហាអនុតំបន់មេគង្គជំហានទី ២ របស់ធនាគារអភិវឌ្ឍន៍អាស៊ី ADB។ ក្នុងនោះមានអនុគម្រោងចំនួន ២ ទៀត រួមមាន ៖ ទីលានទុកដាក់សំរាមបានសម្ពោធរួចរាល់ និងផ្ទេរឲ្យរដ្ឋបាលខេត្តគ្រប់គ្រងបន្តនាពេលថ្មីៗនេះ និងគម្រោងចាប់ផ្ដើមកំពង់ផែនៅលើកោះទន្សាយ៕
