កិច្ចប្រជុំលើកទី៤ របស់គណៈកម្មាធិការសម្របសម្រួលរួម(JCC) ស្ដីពីគម្រោងធ្វើឱ្យប្រសើរឡើងសុវត្ថិភាពចរាចរណ៍ផ្លូវគោកលើផ្លូវជាតិសំខាន់ៗក្នុងព្រះរាជាណាចក្រកម្ពុជា ទីស្ដីការក្រសួង៖ ថ្ងៃសុក្រ ៧រោច ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី៦ ខែតុលា ឆ្នាំ២០២៣ លោកជំទាវ មឹន មាណវី រដ្ឋលេខាធិការក្រសួងសាធារណការ នឹងដឹកជញ្ជួន និងលោកស្រី MIYAHARA Ai អនុប្រធានតំណាងទីភ្នាក់ងារសហប្រតិបត្តិការអន្តរជាតិជប៉ុន(JICA) ប្រចាំកម្ពុជា បានអញ្ជើញធ្វើជាសហប្រធានដឹកនាំកិច្ចប្រជុំស្ដីពីគម្រោងធ្វើឱ្យប្រសើរឡើងសុវត្ថិភាពចរាចរណ៍ផ្លូវគោកលើផ្លូវជាតិសំខាន់ៗក្នុងព្រះរាជាណាចក្រកម្ពុជា ដោយមានការចូលរួមដោយផ្ទាល់ និងការចូលរួមតាមប្រព័ន្ធវីដេអូពីចម្ងាយពីថ្នាក់ដឹកនាំក្រសួង មន្ត្រីរាជការនៃក្រសួង-ស្ថាប័នពាក់ព័ន្ធ។ កិច្ចប្រជុំនេះធ្វើឡើងក្នុងគោលបំណងដើម្បីពិនិត្យវឌ្ឍនភាពការងារជារួមរបស់ក្រុមការងារទាំង៤នៃគម្រោងសំដៅ ៖ (១)ជំរុញប្រសិទ្ធភាពការដឹកជញ្ជូនក្នុងតំបន់គោលដៅ ដើម្បីចូលរួមជំរុញការអភិវឌ្ឍសេដ្ឋកិច្ចជាតិ (២)ការកាត់ បន្ថយគ្រោះថ្នាក់ចរាចរណ៍ឱ្យបាន២៥% នៅក្នុងឆ្នាំ២០២៥ រកបញ្ហាប្រឈម និងដំណោះស្រាយ សំដៅឱ្យការអនុវត្តសកម្មភាពការងារគម្រោង ប្រកបដោយប្រសិទ្ធភាព សុវត្ថិភាព និងសណ្ដាប់ធ្នាប់ចរាចរណ៍ផ្លូវគោក នៅកម្ពុជា និងដោយឡែកលើកំណាត់ផ្លូវជាតិលេខ៥។ លោកជំទាវរដ្ឋលេខាធិការ ក៏បានគូសបញ្ជាក់ថា៖ ក្រសួងនៅតែបន្តសកម្មភាពចូលរួមជាមួយគណកម្មាធិការជាតិសុវត្ថិភាពចរាចរណ៍ផ្លូវគោក ដើម្បីលើកកម្ពស់សុវត្ថិភាពចរាចរណ៍តាមរយៈយុទ្ធនាការចែកស្ទីកគ័រចំណាំងផ្លាត និងមួកសុវត្ថិភាព បន្តរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក បន្តការងារត្រួតពិនិត្យយានយន្តកែច្នៃខុសលក្ខណ: បច្ចេកទេស ជំរុញការអនុវត្តការដកពិន្ទុលើបណ្ណបើកបរលើអំពើល្មើសច្បាប់ស្តីពីចរាចរណ៍ផ្លូវគោក និងជំរុញលទ្ធភាពការបំពាក់ផ្លាកសញ្ញាចរាចរណ៍ទៅតាមសំណូមពររបស់ក្រុមការងារទាំង៤នៃគម្រោង។ លោកជំទាវរដ្ឋលេខាធិការ បានស្នើដល់ភាគីជប៉ុន ដែលទទួលការងារអនុវត្តគម្រោងនេះ បន្តផ្តល់បទពិសោធន៏ ក្នុងការជំរុញឱ្យអ្នកប្រើប្រាស់ផ្លូវគោរពច្បាប់ចរាចរណ៍ឱ្យបានម៉ឺងម៉ាត់ កុំបើកលើសល្បឿនកំណត់ ពាក់ខ្សែក្រវាត់សុវត្ថិភាពពេលធ្វើដំណើរតាមឡាន ពាក់មួកសុវត្ថិភាពឱ្យបានត្រឹមត្រូវ ពេលជិះម៉ូតូវ៉ាជែងដោយប្រុងប្រយ័ត្ន និងបានស្នើឱ្យក្រុមការងារគ្រប់គ្រងគម្រោងសាងសង់ផ្លូវជាតិលេខ៥ ក៏ដូចជាJICA ពិនិត្យលទ្ធភាពដំឡើងភ្លើងសញ្ញាចរាចរណ៍នៅចំណុចផ្លូវវាងក្រុងកំពង់ឆ្នាំង ពោធិ៍សាត់ និងបាត់ដំបង បំពាក់ភ្លើងបំភ្លឺផ្លូវ និងកែលម្អផ្លូវនៅចំណុចដែលមានគ្រោះថ្នាក់ចរាចរណ៍ញឹកញាប់នៅពេលយប់៕