មហាវិថីសំរោង មានទីតាំងនៅជាប់នឹងបុរីភូមិសំរោង ក្នុងខណ្ឌព្រែកព្នៅ រាជធានីភ្នំពេញ បានបើកសម្ពោធជាផ្លូវការ នាព្រឹកថ្ងៃចន្ទ ទី21 ខែសីហា ឆ្នាំ2023នេះ ក្រោមអធិបតីភាពឯកឧត្តម ឃួង ស្រេង អភិបាល នៃគណអភិបាលរាជធានីភ្នំពេញ តំណាងដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត។ ពិធីទាំងមូលបានបញ្ចប់ទៅជាស្ថាពរ ប្រកបដោយបរិយាកាសរីករាយ នឹងឱឡារិកក្រៃលែង ជាមួយស្នាមញញឹមនៃបងប្អូនប្រជាពលរដ្ឋយ៉ាងច្រើនកុះករដែលបានចូលរួមក្នុងពិធី។ ឯកឧត្តម ឃួង ស្រេង អភិបាល នៃគណអភិបាលរាជធានីភ្នំពេញបានថ្លែងបញ្ជាក់ថា សមិទ្ធផលថ្មីនៃមហាវិថីសំរោងនេះនឹងជួយសម្រួលដល់ចរាចរណ៍បានមួយភាគធំ ដោយសាធារណជនអាចធ្វើដំណើរតាមមហាវិថីសំរោងនេះពីសាលាខណ្ឌព្រែកព្នៅទៅផ្លូវកប់ស្រូវ ឬ ផ្សារទំនើប Aeon 2 នៅតំបន់សែនសុខ និង ជិះពីAeon 2 ឬតំបន់សែនសុខ ទៅផ្លូវជាតិលេខ5វិញនៅត្រង់បុរីភូមិសំរោង បានយ៉ាងឆាប់រហ័សនិងមិនមានការកកស្ទះឡើយ។ សមិទ្ធផលហេដ្ឋារចនាសម្ព័ន្ធថ្មីនេះមានប្រវែងសរុបប្រមាណ5.2គីឡូម៉ែត្រ និងទទឹង 30ម៉ែត្រ ត្រូវបានស្ថាបនារួចរាល់នៅជាប់នឹងបុរីភូមិសំរោង នៃខណ្ឌព្រែកព្នៅ ស្ថិតក្នុងភាគខាងជើងរាជធានីភ្នំពេញ។ ផ្លូវមួយខ្សែនេះតភ្ជាប់ពីផ្លូវជាតិលេខ5 ទៅដល់ផ្លូវលេខ 130 អមដោយប្រព័ន្ធលូ ភ្លើងបំភ្លឺផ្លូវ និងការលម្អផ្សេងៗរួមជាមួយនឹងអត្ថប្រយោជន៍នៃការធ្វើដំណើរជាច្រើន។ ជាចុងក្រោយ ឯកឧត្តមបានថ្លែងអំណរគុណ និងកោតសរសើរយ៉ាងពេញទំហឹងដល់ក្រុមអ្នកអភិវឌ្ឍបុរីភូមិសំរោង ដែលបានផ្ដូចផ្ដើមស្ថាបនាមហាវិថីមួយខ្សែនេះ និងបញ្ចប់ការសាងសង់ប្រកបដោយភាពជោគជ័យ ក្នុងគោលដៅជម្រុញការអភិវឌ្ឍនៅភាគខាងជើងរាជធានីភ្នំពេញប្រកបដោយនិរន្តរភាព៕