ប្រធានមន្ទីរសាធារណការ និងដឹកជញ្ជូនខេត្តកោះកុងអះអាងថា គម្រោងស្ថាបនាស្ពានបេតុងថ្មីកោះយ៉ ស្ថិតនៅឃុំប៉ាក់ខ្លង គឺបានបញ្ចប់ជាស្ថាពរហើយនៅចុងខែមិថុនា កន្លងទៅ ដោយបើកឱ្យចរាចរណ៍ជាបណ្តោះអាសន្នសិន។ លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុង បានឱ្យដឹងកម្ពុជាថ្មីដឹងនៅថ្ងៃទី៨ ខែសីហា ឆ្នាំ២០២៣ថា ស្ពានកោះយ៉ថ្មីនេះ ផ្តើមសាងសង់កាលពីខែមិថុនា ឆ្នាំ២០២២ មកទល់ចុងខែមិថុនា ឆ្នាំ២០២៣ គឺជិត១ឆ្នាំ ហើយដែលក្រុមការងារជំនាញដុតដៃដុតជើងកសាងឡើងបម្រើជាប្រយោជន៍សាធារណៈសម្រួលដល់ការធ្វើដំណើររបស់ពលរដ្ឋ និងអ្នកទេសចរ។ លោក អន ដាវុធ លើកឡើងទៀតថា ដោយមើលឃើញពីស្ថានភាពរដូវវស្សាលំបាកធ្វើដំណើរបងប្អូនពលរដ្ឋលើស្ពានកោះយ៉ចាស់ងាយនឹងបង្កគ្រោះថ្នាក់ ក៏សម្រេចចិត្តអនុញ្ញាតឱ្យធ្វើដំណើរស្ពានបេតុងកោះយ៉ដែលទើបកសាងរួចរាល់នេះជាបណ្តោះអាសន្នសិន។ ដោយឡែកពេលវេលាសម្ពោធដាក់ឱ្យប្រើប្រាស់ជាផ្លូវការវិញ អាស្រ័យលើអ្នកឧកញ៉ា លី យ៉ុងផាត់ និងរដ្ឋបាលខេត្តជាអ្នកកំណត់។ គួរកត់សម្គាល់ថា ស្ពានកោះយ៉ថ្មីដែលស្ថិតនៅក្នុងឃុំប៉ាក់ខ្លង ស្រុកមណ្ឌលសីមា មានប្រវែង១២៦ ម៉ែត្រ និងទទឹង១១ម៉ែត្រ ក្នុងនោះបានប្រើប្រាស់ថវិកាស្ថាបនាអស់ប្រមាណ១លាន៤០ម៉ឺនដុល្លារដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។ កន្លងទៅ មានទាំងអាជ្ញាធរ និងប្រជាពលរដ្ឋ សុទ្ធតែបង្ហាញការសប្បាយរីករាយពេលដឹងថា មានសមិទ្ធផលជាស្ពានបេតុងរឹងមាំមួយជំនួសស្ពានកោះយ៉ចាស់ដែលទ្រុឌទ្រោមខ្លាំង និងងាយគ្រោះថ្នាក់ចរាចរណ៍ ពិសេសរដូវវស្សាតែម្ដង។