ក្នុងកិច្ចសម្ភាសន៍ជាមួយទូរទស្សន៍ BTV កាលពីកន្លងទៅ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង សាធារណការ និងដឹកជញ្ជូន បានមានប្រសាសន៍ថា កំណាត់ផ្លូវជាតិលេខ៣ វាលរេញ-ត្រពាំងរពៅ ដែលផ្លូវនេះធ្វើមិនដែលបានរឹងមាំជាប់នោះទេ ដោយសារខាងក្រោមជាប្រភេទដីស្អុយ។ ឯកឧត្តម ទេសរដ្ឋមន្ត្រី បានបន្តថា ទាក់ទងនឹងបញ្ហាផ្លូវដែលមានប្រវែង២០គីឡូម៉ែត្រនេះដែរ ក្រសួងបានសិក្សាចប់សព្វគ្រប់និងដឹងពីវិធីធ្វើវាមិនឱ្យឆាប់ខូចទៀតហើយ ខណៈត្រៀមនឹងបើកការដ្ឋាន សាងសង់នៅឆ្នាំក្រោយ ដើម្បីបង្កលក្ខណៈងាយស្រួលដល់ការធ្វើដំណើរ និងការដឹកជញ្ជូនឱ្យកាន់តែ ប្រសើរឡើង។ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូនបានសម្តែងការ សុំទោសទៅកាន់ប្រជាពលរដ្ឋ ដែលជាអ្នកប្រើប្រាស់ផ្លូវជាតិលេខ៣ ពីវាលរេញទៅត្រពាំងរពៅ ក្នុងស្រុកព្រៃនប់ ខេត្តព្រះសីហនុ ចំពោះស្ថានភាពផ្លូវដ៏លំបាកក្នុងការធ្វើដំណើរ។ គួរបញ្ជាក់់ថា ផ្លូវជាតិលេខ៣ កំពត-វាលរេញ មានប្រវែងសរុបជាង ៥៤គីឡូម៉ែត្រ ក្នុងនោះ ២០គីឡូម៉ែត្រ រងការខូចខាតជាប្រចាំ ដែលរាជរដ្ឋាភិបាលកម្ពុជា កំពុងស្វែងរកថវិកាប្រមាណ ៦០លានដុល្លារ ដើម្បី សាងសង់តាមស្តង់ដារ និងរឹងមាំបានយូរ។ សូមជម្រាបថា គម្រោងស្ថាបនាឡើងវិញកំណាត់ផ្លូវជាតិលេខ៣ វាលរេញ-ត្រពាំងរពៅ បានសិក្សារួចរាល់ដោយក្រុមហ៊ុនសាជីវកម្មស្ពាន និងថ្នល់ចិន CRBC។ តាមរយៈការសិក្សាបានបង្ហាញថា គម្រោងអាចធ្វើការបែងចែកកំណាត់ផ្លូវ២០គីឡូម៉ែត្រជាពីរផ្នែកទី១: ផ្អែកលើការសិក្សា ស្រទាប់គ្រឹះផ្លូវនិងស្ថានភាពភូមិសាស្រ្ត ផ្នែក១៥គីឡូម៉ែត្រមានស្ថានភាព គ្រឹះផ្លូវ មានលក្ខណៈស្រដៀងទៅនឹងផ្លូវលេខ១៤៦B ដែលបាននិងកំពុងធ្វើការសាងសង់។