ភ្នំពេញៈ ស្ពានមិត្តភាព កម្ពុជា-ចិនកោះធំ ស្ថិតក្នុងស្រុកកោះធំ ខេត្តកណ្តាល បាននិងកំពុងផ្តល់អត្ថប្រយោជន៍ យ៉ាងធំធេង ដល់សេដ្ឋកិច្ចជាតិ រួមទាំងយុទ្ធសាស្ត្រមួយយ៉ាងសំខាន់ សម្រាប់តភ្ជាប់ទំនាក់ទំនង និងសម្រួលការធ្វើដំណើរ របស់ប្រជាពលរដ្ឋ ដែលរស់នៅយ៉ាងច្រើនកុះករ នៅត្រើយខាងកើត និងត្រើយខាងលិច​ទន្លេបាសាក់ ឱ្យបានងាយស្រួល និងឆាប់រហ័ស។ យោងតាមក្រសួងសាធារណការ និងដឹកជញ្ជូន បានឱ្យដឹងថា ស្ពាននេះ មានប្រវែង ៤១៥ ម៉ែត្រ ទទឹងស្ពាន ១៣,៥ ម៉ែត្រ។ ចំណុចចាប់ផ្ដើម៖ ភូមិព្រែកធន់ ឃុំព្រែកថ្មី ស្រុកកោះធំ និង ចំណុចបញ្ចប់៖ ត្រើយខាងលិចទន្លេបាសាក់ ឆ្លងទៅផ្លូវជាតិលេខ១១០។ស្ពាននេះ បើកការដ្ឋានសាងសង់ នាខែមីនា ឆ្នាំ២០១៤ បញ្ចប់ការសាងសង់ ចុងឆ្នាំ២០១៦។ រយៈពេលសាងសង់ ៣៦ ខែ។ ជាប្រភេទស្ពាន បេតុងសរសៃដែក។ប្រភពដដែល បានឱ្យដឹងថា៖ ទំហំទឹកប្រាក់នៃគម្រោង មានប្រមាណជា ២២,១៩ លានដុល្លារអាមេរិក សាងសង់ដោយក្រុមហ៊ុនសាងសង់ស្ពានថ្នល់ចិន៕