[Phnom Penh Post] - ក្រសួងប្រគល់ថវិកា $២០ ម៉ឺន បានពីការលក់ស្លាកលេខពិសេសជូនមន្ទីរពេទ្យកុមារចំនួន ២
2023-06-22
ទៅកាន់ទំព័រចុះផ្សាយក្នុង Phnom Penh Post
ភ្នំពេញៈ ក្រសួងសាធារណការ និងដឹកជញ្ជូនបានប្រគល់ថវិកាចំនួន ២០ ម៉ឺនដុល្លារ បានពីការលក់ស្លាកលេខពិសេសផ្ទាល់ខ្លួន និងរថយន្តជូនមន្ទីរពេទ្យគន្ធបុប្ផា និងមន្ទីរពេទ្យកុមារជាតិដើម្បីឱ្យមន្ទីរពេទ្យទាំង ២ បានព្យាបាលកុមារប្រកបដោយគុណភាព និងឥតគិតថ្លៃ។
ពិធីប្រគល់ថវិកាមូលនិធិសប្បុរសធម៌នេះ ត្រូវបានធ្វើឡើងនៅថ្ងៃទី ២១ ខែមិថុនា ក្រោមអធិបតីភាពលោកទេសរដ្ឋមន្ដ្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងតំណាងមន្ទីរពេទ្យកុមារទាំង ២ ដែលថវិកាទាំងនេះ ទទួលបានពីការប្រមូលក្នុងកម្មវិធី «ខួប ៣ ឆ្នាំ ស្លាកលេខពិសេសផ្ទាល់ខ្លួន និងរថយន្ត» ដែលបានប្រព្រឹត្តទៅកាលពីថ្ងៃទី ៧-៨ មីនា ឆ្នាំ ២០២៣ កន្លងទៅ។
លោកស៊ុន ចាន់ថុល បានលើកឡើងថា ការលក់ស្លាកពិសេសផ្ទាល់ខ្លួន និងរថយន្ដ បានចំណូលចូលថវិកាជាតិ ហើយថវិកាមួយចំនួនបានផ្តល់ដល់កាកបាទក្រហកម្ពុជា និងមន្ទីរពេទ្យមួយចំនួន ដើម្បីធ្វើសកម្មភាពលើ ផ្នែកមនុស្សធម៌ និងការព្យាបាល។
លោកមានប្រសាសន៍ថា៖ «យើងបានធ្វើកម្មវិធីរំឭកខួប ៣ ឆ្នាំ នៃកម្មវិធីលក់ស្លាកលេខពិសេសបានថវិកាមួយចំនួន ហើយខ្ញុំនិងឯកឧត្តម អូន ព័ន្ធមុនីរ័ត្ន បានធ្វើលិខិតរួមគ្នាទៅសម្តេចតេជោ ហ៊ុន សែន ដើម្បីស្នើសុំថវិកា ២០ ម៉ឺនដុល្លារ ដែលបានពីការលក់ស្លាកលេខពិសេសនោះដែល ១០ ម៉ឺនដុល្លារ ជូនមន្ទីរពេទ្យគន្ធបុប្ផា និង ១០ ម៉ឺនដុល្លារ ជូនមន្ទីរពេទ្យកុមារជាតិ។ ពីមុនមកយើងក៏បានផ្តល់ថវិកាជូនមន្ទីរពេទ្យគន្ធបុប្ផា ២០ ម៉ឺនដុល្លារ រួចមកហើយនៅឆ្នាំ ២០២០»។
ក្នុងពិធីនោះដែរ ប្រធានមន្ទីរពេទ្យកុមារជាតិ លោក ញឹប អង្គារបុស្ស បានថ្លែងអំណរគុណដល់រដ្ឋមន្ត្រីក្រសួងសាធារណការដែលបានគិតគូរដល់វិស័យសុខាភិបាល ជាពិសេសមន្ទីរពេទ្យកុមារជាតិនេះតែម្តង។
លោកបានថ្លែងថា៖ «មន្ទីរពេទ្យកុមារជាតិនឹងប្រើប្រាស់ថវិកាដែលទទួលបាននេះពង្រឹងគុណភាពនៃការព្យាបាលកុមារឱ្យកាន់តែមានភាពប្ រសើរឡើងហើយការពង្រឹងវិស័យសុខាភិបាលក្នុងស្រុកនឹងកាត់បន្ថយការចំណាកស្រុករបស់ប្រជាជនដែលទៅរកសេវាសុខាភិបាលនៅបរទេសផងដែរ»។
លោក ញឹប អង្គារបុស្ស បានបន្តថា៖ «បើសិនបើវិស័យសុខាភិបាលរបស់យើងកាន់តែរឹងមាំ អ៊ីចឹង!យើងអាចកាត់បន្ថយការចំណាកស្រុក អាចសន្សំធនធានសម្រាប់អភិវឌ្ឍប្រទេសជាតិក៏បានច្រើនដែរ ព្រោះបើយើងបញ្ចេញលុយទៅព្យាបាលនៅបរទេស យើងខាតបង់ ប៉ុន្តែបើបច្ចេកទេសយើងកើនឡើង អាចរក្សាប្រជាជនកុំឱ្យចេញទៅចំណាយលុយនៅស្រុកគេច្រើនពេក»។
ជាមួយគ្នានេះដែរ ប្រធានមន្ទីរពេទ្យគន្ធបុប្ផា លោក គី សង់ទី ក្នុងនាមសមាជិកក្រុមប្រឹក្សាមូលនិធិមន្ទីរពេទ្យគន្ធបុប្ផា ក៏បានថ្លែងនាពេលនោះដែរថា៖ «ចំណុចដែលសំខាន់គឺការអភិវឌ្ឍហេដ្ឋារចនាសម្ព័ន្ធដឹកជញ្ជូនផ្លូវថ្នល់ បានសម្រួលដល់ប្រជាពលរដ្ឋ ពិសេសឪពុកម្តាយដែលមានអ្នកជំងឺ មានកូនឈឺ ដោយសារជំងឺខ្លះធ្ងន់ធ្ងរត្រូវបញ្ជូនមកពេទ្យថ្នាក់ជាតិ»។
បើតាមលោក គី សង់ទី កាលពីឆ្នាំ ១៩៩៧ និង ១៩៩៨ អត្រាមរណភាពកុមារនៅក្នុងមន្ទីរពេទ្យមានកម្រិតខ្ពស់ ប៉ុន្តែបច្ចុប្បន្នកម្ពុជាបានបង្កើនគុណភាព និងរក្សាគុណភាពវិជ្ជាជីវៈដោយអត្រាមរណភាពកុមារនៅក្នុងមន្ទីរពេទ្យរៀងរាល់ឆ្នាំមានត្រឹម ០,៤ ភាគរយប៉ុណ្ណោះទាំងនេះគឺជាអ្វីដែលមន្ទីរពេទ្យបានចូលរួមជាមួយក្រសួងសុខាភិបាល៕
