មន្ទីរពេទ្យតេជោសែនកោះធំ និងសមិទ្ធផលជាច្រើនបានលេចរូបរាង ហើយគ្រោងនឹងលេចរូបរាងជាបន្តបន្ទាប់ លើទឹកដីក្រុងសំពៅពូន និងស្រុកកោះធំ នៃខេត្តកណ្តាល ក្រោមម្លប់សន្តិភាព នៃរាជរដ្ឋាភិបាលរបស់(គណៈបក្ស)ប្រជាជនកម្ពុជា សំពៅពូន៖ នាព្រឹកថ្ងៃសៅរ៍ ១៥កើត ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៣ ខែមិថុនា ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានគណៈអចិន្ត្រៃយ៍ក្រុមការងារគណៈបក្សចុះមូលដ្ឋានស្រុកកោះធំ ខេត្តកណ្តាល បានអញ្ជើញជាអធិបតីក្នុងពិធីប្រកាសសេចក្តីសម្រេចស្តីពីការកែសម្រួល និងតែងតាំងក្រុមការងារគណបក្សចុះមូលដ្ឋានស្រុកកោះធំ និងក្រុងសំពៅពូន ខេត្តកណ្តាល ព្រមទាំងបន្តអញ្ជើញដឹកនាំគណៈប្រតិភូ និងអាជ្ញាធរមូលដ្ឋានចុះពិនិត្យ អគារមន្ទីរពេទ្យតេជោសែនកោះធំ ដែលបានស្ថាបនារួចជាស្ថាពរ រង់ចាំការបំពាក់សម្ភារបរិក្ខារ ហើយគ្រោងនឹងសម្ពោធបើកឱ្យដំណើរការបន្ទាប់ពីការបោះឆ្នោតរួចរាល់។ នៅក្នុងពិធីនេះដែរ មានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ជាប្រធាន អនុប្រធាន សមាជិក សមាជិកា នៃគណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុក/ក្រុង មន្ត្រីគណបក្សចុះជួយឃុំ/សង្កាត់ និងមន្ត្រីគណៈបក្សតាមក្រុមការងារពាក់ព័ន្ធ សរុបប្រមាណ ២០០រូប។ អង្គពិធីនាឱកាសនេះ ផ្ដោតជាសំខាន់លើការប្រកាសផ្សព្វផ្សាយសេចក្តីសម្រេចស្តីពីការកែសម្រួល និងការតែងតាំងសមាសភាពក្រុមការងារគណបក្សចុះមូលដ្ឋានស្រុកកោះធំ និង សេចក្តីសម្រេចស្តីពីការកែសម្រួល និងការតែងតាំងសមាសភាពក្រុមការងារគណបក្សចុះមូលដ្ឋានក្រុងសំពៅពូន ដែលទើបបង្កើតថ្មី។ ទន្ទឹមនេះដែរ អង្គពិធីក៏បានផ្សព្វផ្សាយអំពីសេចក្តីប្រកាស របស់គណៈអចិន្ត្រៃយ៍នៃគណៈកម្មាធិការកណ្តាល គណៈបក្សប្រជាជនកម្ពុជា អំពីកម្មវិធីបើកយុទ្ធនាការឃោសនាបោះឆ្នោត ជ្រើសតាំងតំណាងរាស្ត្រ នីតិកាលទី៧ ដែលនឹងប្រព្រឹត្តទៅចាប់ពីថ្ងៃសៅរ៍ ទី១ ខែកក្កដា ឆ្នាំ២០២៣ តទៅ ដើម្បីសមាជិក សមាជិកា អនុវត្តប្រកបដោយប្រសិទ្ធភាព។ ថ្លែងនៅក្នុងអង្គពិធី ឯកឧត្តមប្រធាន បានរៀបរាប់ពីភាពរីកចម្រើន និងការអភិវឌ្ឍឥតឈប់ឈរលើគ្រប់វិស័យ ក្រោមស្នាដៃការដឹកនាំរបស់សម្តេចតេជោនាយករដ្ឋមន្ត្រី និងក្រោមការខិតខំរបស់គណបក្សប្រជាជនកម្ពុជា ទទួលបាននូវសមិទ្ធផលជាច្រើនដែលមិនអាចកាត់ថ្លៃបាន តួយ៉ាងលើវិស័យសាធារណការ និងដឹកជញ្ជូនសព្វថ្ងៃ ក្រសួងបានធ្វើការអភិវឌ្ឍលេចចេញជាសមិទ្ធផលគួរជាទីមោទនៈ មានហេដ្ឋារចនាសម្ព័ន្ធផ្លូវថ្នល់ ស្ពាន ខ្វាត់ខ្វែង ។ល។ ជាក់ស្តែង នៅក្នុងក្រុងសំពៅពូន ក៏ដូចជាស្រុកកោះធំ មានផ្លូវបេតុងស្ទើរគ្រប់ភូមិ ឃុំ ដោយមានបំពាក់អំពូលសូឡាបានរហូតដល់ជាង ៣០០០ គ្រាប់នៅតាមផ្លូវ សាលារៀន វត្តអារាម ជាពិសេសគឺ មន្ទីរពេទ្យតេជោសែនកោះធំ ដ៏ទំនើប និងធំស្កឹមស្កៃ បានសាងសង់រួចរាល់ជាស្ថាពរ រង់ចាំការបំពាក់សម្ភារបរិក្ខារ ហើយគ្រោងនឹងសម្ពោធបើកឱ្យដំណើរការជាផ្លូវការ បន្ទាប់ពីការបោះឆ្នោតរួចរាល់។ អ្វីដែលមិនអាចរំលងបានគឺ គម្រោងផ្លូវនាវាចរណ៍ ព្រែកជីកហ្វូណនតេជោ ដែលទើបបានអនុម័តលើរបាយការណ៍សិក្សាសមិទ្ធិលទ្ធភាព នៅក្នុងសម័យប្រជុំពេញអង្គគណៈរដ្ឋមន្ត្រី កាលពីថ្ងៃទី១៩ ឧសភា កន្លងទៅថ្មីៗ។គម្រោងជាប្រវត្តិសាស្ត្រមួយនេះ នឹងចូលរួមកែប្រែមុខមាត់ស្រុកកោះធំ ក៏ដូចជាប្រទេសកម្ពុជាទាំងមូល ក្នុងវិស័យនាវាចរណ៍លើឆាកអន្តរជាតិ។ ជាមួយគ្នានេះ ឯកឧត្តមប្រធាន បានក្រើនរំព្ញកដល់បងប្អូនប្រជាពលរដ្ឋទាំងអស់ ដែលមានឈ្មោះបោះឆ្នោត សូមទៅចូលរួមបោះឆ្នោតជូនគណៈបក្សប្រជាជនកម្ពុជា សម្រាប់ការបោះឆ្នោតជ្រើសរើសតំណាងរាស្រ្ត នីតិកាលទី៧ នៃរដ្ឋសភា ឆ្នាំ២០២៣ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ឱ្យបានគ្រប់គ្នា និងបន្តរួបរួមគ្នាថែរក្សាការពារសន្តិភាព ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ទាំងអស់គ្នា ដើម្បីបន្តលើកកម្ពស់ដល់ការអភិវឌ្ឍកម្រិតជីវភាពរបស់បងប្អូនប្រជាពលរដ្ឋឱ្យកាន់តែប្រសើឡើង និងនាំមកនូវភាពទំនើបជឿនលឿនជាងនេះបន្ថែមទៀត។ នៅក្នុងខែមិថុនានេះ ក្រសួងសាធារណការ និងដឹកជញ្ជូន នឹងបើកការដ្ឋានសាងសង់ផ្លូវជាច្រើនខ្សែ ក្នុងនោះមានទាំងផ្លូវល្បឿនលឿនភ្នំពេញ-បាវិត ផ្លូវជាតិលេខ២៣ ដែលផ្តើមចេញពីឃុំលើកដែក ស្រុកកោះធំ ភ្ជាប់ទៅកាន់ផ្លូវជាតិលេខ១៤ ស្រុកលើកដែក និង កំណាត់ផ្លូវខេត្តលេខ៣១២ ក្នុងស្រុកព្រះស្តេច នៃខេត្តព្រៃវែងជាដើម៕