ក្នុងខួបលើកទី៦៥ឆ្នាំនៃការបង្កើតទំនាក់ទំនងការទូតមិត្តភាពកម្ពុជា-ចិន និងខួប១០ឆ្នាំ នៃគំនិតផ្ដួចផ្ដើម«ខ្សែក្រវាត់និងផ្លូវ»របស់សាធារណរដ្ឋប្រជាមានិតចិននោះ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានលើកឡើងថា គំនិតផ្តួចផ្តើម «ខ្សែក្រវាត់ និងផ្លូវ» របស់សាធារណរដ្ឋប្រជាមានិតចិនបានផ្តល់ផលប្រយោជន៍ជាច្រើនដល់កម្ពុជា និងប្រទេសជាសមាជិក។ ក្នុងពិធីអញ្ជើញសំណេះសំណាលជាមួយកម្មករ និយោជិតជាង ២ម៉ឺននាក់ និងទស្សនាពិព័រណ៍សមិទ្ធផល ក្នុងតំបន់សេដ្ឋកិច្ចពិសេស ខេត្តព្រះសីហនុ ព្រមទាំងសម្ពោធដាក់ឱ្យដំណើរការរោងចក្រផលិតសំបកកង់រថយន្ត នាព្រឹកថ្ងៃទី២២ ខែឧសភា ឆ្នាំ២០២៣ នៅខេត្តព្រះសីហនុ សម្ដេចតេជោ ហ៊ុន សែន មានប្រសាសន៍ថា តំបន់សេដ្ឋកិច្ចពិសេសខេត្តព្រះសីហនុនេះ ក៏ជាផ្នែកមួយនៃគំនិតផ្ដួចផ្ដើមខ្សែក្រវាត់និងផ្លូវនោះដែរ ហើយសម្ដេចបានប្រឹងប្រែងធ្វើការជាមួយមិត្តចិន រហូតបង្កើតបានមិត្តភាពជាដៃគូយុទ្ធសាស្ត្រគ្រប់ជ្រុងជ្រោយ បន្ថែមលើនោះប្រធានាធិបតីសាធារណរដ្ឋប្រជាមានិតចិន បានប្រសិទ្ធនាមថា «ជាមិត្តដែលថែប»។ សម្ដេចតេជោបានថ្លែងថា នេះគឺជារឿងពិតដែលគ្មានអសិរពិសណាមួយអាចបំបែកបាក់នូវសាមគ្គីភាពនេះបានទេ។ សម្ដេចតេជោបានគូសបញ្ជាក់ថា ហេតុអ្វីបានជាកម្ពុជា ស្ថិតក្នុងចំណោមប្រទេស១៥០ និងអង្គការអន្តរជាតិ ដែលបានចុះហត្ថលេខាលើក្របខណ្ឌនៃកិច្ចសហប្រតិបត្តិការ«ខ្សែក្រវាត់និងផ្លូវ» ដែលផ្ដួចផ្ដើមឡើងដោយឯកឧត្ដមប្រធានាធិបតី ស៊ី ជិនពីង។ ចំណុចនេះគឺស្របជាមួយនិងគោលនយោបាយពីដើមដល់ចប់របស់កម្ពុជា។ សម្ដេចតេជោគូសបញ្ជាក់ទៀតថា មានចំណុចបី ដែលកម្ពុជាត្រូវដើរ ១. រាល់គំនិតផ្ដួចផ្ដើមទាំងអស់ត្រូវតែបម្រើឱ្យសន្តិភាព និងការអភិវឌ្ឍ។ ២. គឺមិនត្រូវប្រឆាំងជាមួយប្រទេសណាទាំងអស់ និងទី៣. គឺត្រូវគោរពមជ្ឈភាពរបស់អាស៊ាន។ សម្ដេចតេជោនាយករដ្ឋមន្រ្ដីអះអាងថា នេះជាគៅការណ៍ធំៗ នៃគោលនយោបាយការបរទេសរបស់កម្ពុជា ហើយតើការគាំទ្រនោះបានផ្ដល់ផលប្រយោជន៍អ្វីខ្លះដល់កម្ពុជា។ សម្ដេចតេជោនាយករដ្ឋមន្ត្រីបានថ្លែងបញ្ជាក់ថា រឿងនេះបើនិយាយកីឡាស៊ីហ្គេមដែលទើបតែបិទបញ្ចប់ដោយជោគជ័យនាពេលកន្លងមកថ្មីនេះ បើមិនមានចំណែកនៃគំនិតផ្ដួចផ្ដើមខ្សែក្រវាត់និងផ្លូវទេ យើងពុំមានមូលដ្ឋានគ្រប់គ្រាន់ដើម្បីនឹងរៀបចំប្រកួតកីឡាស៊ីហ្គេមនោះទេ។ ជាមួយគ្នានេះ សម្ដេចតេជោក៏បានអរគុណចំពោះប្រជាជន និងរដ្ឋាភិបាលនៃសាធារណរដ្ឋប្រជាមានិតចិន ដែលបានជួយកសាងពហុកីឡាដ្ឋានមួយ សម្រាប់ពិធីបើក-បិទ និងការប្រកួតកីឡាស៊ីហ្គេម ហើយពហុកីឡាដ្ឋាននោះអាចប្រើបានរាប់រយឆ្នាំទៀតតកូន តចៅ។ ក្រោពីនោះ រដ្ឋាភិបាលចិនក៏បានជួយកម្ពុជា ក្នុងការកសាងហេដ្ឋារចនាសម្ព័ន្ធ ដូចជា ផ្លូវល្បឿនលឿន ព្រលានយន្តហោះខេត្តសៀមរាប និងគម្រោងដទៃទៀតជាច្រើន រាប់ទាំងគម្រោងតភ្ជាប់អ៊ីនធឺណិតខ្សែកាប្លិ៍ក្រោមទឹក ខេត្តព្រះសីហនុ និងហុងកុង។ល។ និងនៅមានគម្រោងជាច្រើនទៀត ដែលកម្ពុជាទទួលផលប្រយោជន៍ ពីគម្រោងខ្សែក្រវាត់ និងផ្លូវនេះ។ សម្តេចតេជោ ហ៊ុន សែន ក៏បានគូសបញ្ជាក់បន្ថែមថា រដ្ឋាភិបាលចិន មិនដែលបញ្ជាសម្តេចនោះឡើយ ហើយគោលនយោបាយរបស់ចិន ក៏មិនបានយកប្រទេសណាជាសត្រូវ ឬរារាំងប្រទេសណាមួយនោះឡើយ។ កម្ពុជា អនុវត្តន៍នយោបាយឯករាជ្យរបស់ខ្លួន ខណៈមានអ្នកខ្លះលើកឡើងថា កម្ពុជាអាយ៉ងចិន ឬអាយ៉ងវៀតណាម។ សម្តេចតេជោអះអាងបន្ថែមថា ទោះបីជានរណាថាអីថាទៅ ព្រោះលើការជាក់ស្តែង កម្ពុជាអនុវត្តន៍នយោបាយឯករាជ្យ ដោយផ្អែកលើច្បាប់។ ឯកឧត្តម វ៉ាង វិនធាន ឯកអគ្គរដ្ឋទូតចិនប្រចាំនៅព្រះរាជាណាចក្រកម្ពុជា បានឱ្យដឹងថា កិច្ចសហប្រតិបត្តិការខ្សែក្រវាត់និងផ្លូវ រវាងកម្ពុជា-ចិន មិនត្រឹមតែផ្ដល់ផលប្រយោជន៍ដល់ប្រទេសទាំងពីរប៉ុណ្ណោះទេ នឹងបានរួមចំណែកផ្ដលភាពវិជ្ជមាន សន្តិភាព និងវិបុលភាពដល់តំបន់ ហើយឥទ្ធិពលរបស់កម្ពុជា ក៏កំពុងត្រូវបានលើកកម្ពស់ ទាំងក្នុងតំបន់ និងឆាកអន្តរជាតិ។ ឯកឧត្ដមឯកអគ្គរដ្ឋទូតបានបន្ដថា ក្នុងរយៈពេល ១០ឆ្នាំកន្លងមកនេះ ប្រទេសទាំងពីរ បានប្រកាន់ខ្ជាប់នូវគោលគំនិត នៃការពិគ្រោះយោបល់រួមគ្នា ការកសាងរួមគ្នា និងចែករំលែករួមគ្នា ហើយការកសាងនូវខ្សែក្រវាត់មួយ-ផ្លូវមួយប្រកបដោយគុណភាពខ្ពស់ ព្រមទាំងការបន្ស៊ីគ្នា នៃគំនិតផ្ដួចផ្ដើមខ្សែក្រវាត់និងផ្លូវ និងយុទ្ធសាស្ត្រចតុកោណរបស់កម្ពុជា មានភាពកាន់តែស៊ីជម្រៅ។ ឯកឧត្តមបានបញ្ជាក់ឱ្យដឹងថា ក្នុងរយៈពេល១០ឆ្នាំមកនេះ ប្រទេសចិន បានជួយកម្ពុជាលើគម្រោងសុខុមាលភាពជាច្រើន ដូចជាការអប់រំ ការថែទាំវេជ្ជសាស្ត្រ ការកាត់បន្ថយភាពក្រីក្រ និងការអភិវឌ្ឍជនបទ និងគម្រោងធំៗមួយចំនួនទៀត គឺមានពហុកីឡដ្ឋានជាតិមរតកតេជោ ផ្លូវល្បឿនលឿន ភ្នំពេញ-ព្រះសីហនុ និងអាកាសយានដ្ឋានសៀមរាបអង្គរថ្មី ដែលនេះបង្ហាញពីកិច្ចសហប្រតិបត្តិការល្អ នៃខ្សែក្រវាត់ និងផ្លូវ រវាងប្រទេសទាំងពីរ។ ឯកឧត្តមឯកអគ្គរដ្ឋទូតចិន បានបង្ហាញនូវការសប្បាយរីករាយ ចំពោះសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងអាណត្តិទី៦នេះ សម្រេចបានដោយជោគជ័យនូវស្ថិរភាពនយោបាយសង្គមរក្សាបាននូវកំណើនសេដ្ឋកិច្ចយ៉ាងឆាប់រហ័ស ក្នុងរយៈពេលច្រើនឆ្នាំជាប់ៗគ្នា និងសម្រេចជោគជ័យយ៉ាងមុតមាំលើការប្រយុទ្ធប្រឆាំងនឹងជំងឺកូវីដ-១៩ បំពេញភារកិច្ចរបស់ប្រធានអាស៊ានឆ្នាំ២០២២ ប្រកបដោយកម្រិតខ្ពស់ និងបានរៀបចំព្រឹត្តិការណ៍ស៊ីហ្គេមលើកទី៣២ ប្រកបដោយជោគជ័យយ៉ាងពេញលេញ។ ឯកឧត្ដមឯកអគ្គរដ្ឋទូតបានបន្ថែមថា សព្វថ្ងៃនេះ ទំនុកចិត្តរបស់ប្រជាជនកម្ពុជា កម្លាំងប្រមូលផ្ដុំ កំពុងកើនឡើងឥតឈប់ឈរ ហើយឥទ្ធិពលក្នុងតំបន់ និងឆាកអន្តរជាតិ ត្រូវបានលើកកម្ពស់៕