កិច្ចប្រជុំពិភាក្សាការងារលើវិស័យចម្រោះទឹកកខ្វក់ ជាមួយតំណាងវិទ្យាស្ថាន Global Green Growth Institute (GGGI) ទីស្ដីការក្រសួង៖ ថ្ងៃព្រហស្បតិ៍ ១៤រោច ខែពិសាខ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៨ ខែឧសភា ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ពិភាក្សាការងារជាមួយតំណាងវិទ្យាស្ថាន Global Green Growth Institute (GGGI) ដោយមានការអញ្ជើញចូលរួមពីថ្នាក់ដឹកនាំក្រសួងទទួលបន្ទុក និងមន្ត្រីជំនាញ នៃអគ្គនាយកដ្ឋានប្រព័ន្ធចម្រោះទឹកកខ្វក់មួយចំនួន។ កិច្ចប្រជុំពិភាក្សានេះត្រូវបានរៀបចំឡើងក្នុងគោលបំណងដើម្បី (១). ពិភាក្សាអំពីគម្រោងសិក្សាសមិទ្ធិលទ្ធភាពសាងសង់ស្ថានីយប្រព្រឹត្តកម្មទឹកកខ្វក់តាមបែបវិមជ្ឈការ (Decentralized Wastewater Treatment Facility) (២). ពិនិត្យលទ្ធភាពក្នុងការញែក និងកែច្នៃសំរាមទៅជាជីកំប៉ុស និង (៣). ពិនិត្យលទ្ធភាពក្នុងការប្រើប្រាស់សាកល្បងរថយន្តដឹកសំរាមដើរដោយថាមពលអគ្គីសនី។ តំណាងវិទ្យាស្ថាន GGGI បានធ្វើបទបង្ហាញអំពីលទ្ធផលការងារដែលបានសិក្សាកន្លងមកជូនដល់អង្គប្រជុំដើម្បីទទួលបានមតិយោបល់ក៏ដូចជាធាតុចូលបន្ថែមសំដៅធ្វើឱ្យប្រសើរឡើងដល់ការសិក្សារបស់ខ្លួន។ ជាមួយគ្នានោះដែរ ថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ បានជម្រាបជូនតំណាងវិទ្យាស្ថាន GGGI អំពីផែនការអភិវឌ្ឍន៍នៅតាមបណ្តារាជធានី-ខេត្តក្រុងមួយចំនួន ទាក់ទងនឹងគម្រោងសាងសង់អាងប្រព្រឹត្តកម្មទឹកកខ្វក់៕