ក្រសួងសាធារណការ ប្រជុំលេីផែនការមេសម្រាប់សញ្ញាជំនួយនាវាចរណ៍ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មការប្រតិបត្តិគម្រោងផែនការមេសញ្ញាជំនួយនាវាចរណ៍ បានអញ្ជើញដឹកនាំកិច្ចប្រជុំគណៈកម្មការគ្រប់គ្រងគម្រោងកសាងផែនការមេសម្រាប់សញ្ញាជំនួយនាវាចរណ៍នៅក្នុងព្រះរាជាណាចក្រកម្ពុជា ដោយមានការចូលរួមពីសមាជិក សមាជិការគណៈកម្មការ ក្រុមអ្នកជំនាញការនៃវិទ្យាស្ថានសញ្ញាជំនួយនាវាចរណ៍កូរ៉េ និងមន្រ្តីជំនាញមួយចំនួនផងដែរ។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីពិនិត្យពិភាក្សាលើសកម្មភាព និងលទ្ធផលការងារកន្លងមក ព្រមទាំងលើកទិសដៅការងារបន្តសម្រាប់គម្រោងកសាងផែនការមេសម្រាប់សញ្ញាជំនួយនាវាចរណ៍នៅក្នុងព្រះរាជាណាចក្រកម្ពុជា។ ឆ្លងកាត់ការពិនិត្យលើលទ្ធផលការងារជារួម អង្គប្រជុំបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមជំនាញការកូរ៉េ និងក្រុមការងារនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ នៃក្រសួងសាធារណការ និងដឹកជញ្ជូនដែលបានសហការជំរុញឱ្យការងារនេះសម្រេចបានជាលទ្ធផលខ្ពស់។ ជាមួយគ្នានេះ ភាគីកម្ពុជាបានថ្លែងអំណរគុណយ៉ាងជ្រាលជ្រៅចំពោះក្រុមជំនាញការនៃវិទ្យាស្ថានសញ្ញាជំនួយនាវាចរណ៍កូរ៉េដែលតែងជួយកម្ពុជាពិសេសក្នុងគម្រោងផែនការមេសម្រាប់សញ្ញាជំនួយនាវាចរណ៍នេះ។ ឆ្លៀតក្នុងឱកាសនោះដែរ ភាគីកម្ពុជាក៏បានសំណូមពរឱ្យខាងភាគីកូរ៉េបន្តផ្តល់គម្រោងផែនការមេសម្រាប់សញ្ញាជំនួយនាវាចរណ៍ជំហានទី២ ដោយបន្ថែមវិសាលភាពលើការសិក្សាដាក់ពោងសញ្ញាជំនួយនាវាចរណ៍នៅទន្លេមេគង្គលើទន្លេមេគង្គក្រោម និងទន្លេបាសាក់ផងដែរ៕