សិក្ខាសាលាផ្សព្វផ្សាយ ស្តីពីការធានារ៉ាប់រងយានយន្តដឹកជញ្ជូនអ្នកដំណើរ និងទំនិញ ដើម្បីបញ្ជ្រាបការយល់ដឹង និងជំរុញការប្រើប្រាស់សេវាធានារ៉ាប់រងយានយន្តដឹកជញ្ជូនឱ្យកាន់តែមានភាពល្អប្រសើរ ភ្នំពេញ៖ ថ្ងៃសុក្រ ១០កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣១ ខែមីនា ឆ្នាំ២០២៣ ឯកឧត្តម ពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីបើកសិក្ខាសាលាផ្សព្វផ្សាយស្ដីពីការធានារ៉ាប់រងយានយន្តដឹកជញ្ជូនអ្នកដំណើរ និងទំនិញ ដែលរៀបចំឡើងដោយក្រសួងសាធារណការ និងដឹកជញ្ជូន ដោយមានការសហការពីក្រុមហ៊ុន លី ហួរ អ៊ិនសួរេន ម.ក និងមានការអញ្ជើញចូលរួមពី លោកឧកញ៉ាប្រធានក្រុមប្រឹក្សាភិបាលក្រុមហ៊ុនលីហួរ អ៊ិនសួរេន ម.ក លោក គង់ សុផល អគ្គនាយករងដឹកជញ្ជូនផ្លូវគោក តំណាងអគ្គនាយកដ្ឋានដឹកជញ្ជូនផ្លូវគោក លោកស្រីបណ្ឌិត ហោ សុវឌ្ឍនា អគ្គនាយករងនិយ័តករធានារ៉ាប់រងកម្ពុជា មន្រ្តីនៃអគ្គនាយកដ្ឋានដឹកជញ្ជូនផ្លូវគោក សមាគមធានារ៉ាប់រង សមាគមដឹកជញ្ជូនអ្នកដំណើរ សមាគមដឹកជញ្ជូនទំនិញ តំណាងក្រុមហ៊ុនដឹកជញ្ជូន និងអង្គភាពភាគីពាក់ព័ន្ធប្រមាណជាង៦០រូប។ សិក្ខាសាលានេះធ្វើឡើងក្នុងគោលបំណងផ្សព្វផ្សាយពីកាតព្វកិច្ចធានារ៉ាប់រងលើយានយន្តដឹកជញ្ជូនអ្នកដំណើរ និងទំនិញនៅក្នុងព្រះរាជាណាចក្រកម្ពុជា និងពិភាក្សាស្វែងយល់អំពីអត្ថប្រយោជន៍ ក៏ដូចជាដំណោះស្រាយលើបញ្ហាដែលបានជួបប្រទះរបស់អ្នកប្រើប្រាស់ និងអ្នកផ្តល់សេវាធានារ៉ាប់រងលើរថយន្តធ្វើអាជីវកម្មដឹកជញ្ជូនកន្លងមក ដើម្បីប្រមូលជាធាតុចូលសម្រាប់ក្រុមការងារអន្តរក្រសួង ឬផ្នែកពាក់ព័ន្ធពិនិត្យ និងពិភាក្សាឱ្យការអនុវត្តឱ្យបានល្អប្រសើរ មានតម្លាភាព និងមានអភិបាលកិច្ចល្អ។ ឆ្លៀតនាឱកាសនោះ ឯកឧត្តមរដ្ឋលេខាធិការ បានលើកឡើងថាក្រសួងសាធារណការ និងដឹកជញ្ជូន គាំទ្រលើការអនុវត្តច្បាប់ស្តីពីការធានារ៉ាប់រងលើយានយន្តដឹកជញ្ជូនអ្នកដំណើរ និងទំនិញ ហើយក្រសួងក៏បានជំរុញ និងផ្សព្វផ្សាយដល់ប្រតិបត្តិករដឹកជញ្ជូនតាមរយៈការចេញសារាចរណែនាំស្តីពីការអនុវត្តកាតព្វកិច្ចធានារ៉ាប់រងភារកិច្ចទទួលខុសត្រូវយានយន្ត ឬធានារ៉ាប់រងតតិយជន និងកាតព្វកិច្ចធានារ៉ាប់រងការដឹកជញ្ជូនអ្នកដំណើរ។ ដើម្បីឱ្យការធានារ៉ាប់រងយានយន្តដឹកជញ្ជូនអ្នកដំណើរ និងទំនិញ អនុវត្តបានកាន់តែមានប្រសិទ្ធភាព ក្រសួងសង្ឃឹមថាកម្មវិធីសិក្ខាសាលាថ្ងៃនេះនឹងបានបញ្ជ្រាបការយល់ដឹង និងមានកិច្ចសហការយ៉ាងស្អិតរមួត និងសកម្មពីគ្រប់ផ្នែកពាក់ព័ន្ធទាំងអស់ ដើម្បីឱ្យការប្រើប្រាស់សេវាធានារ៉ាប់រងយានយន្តដឹកជញ្ជូនអ្នកដំណើរ និងទំនិញកាន់តែមានភាពល្អប្រសើរ៕