នៅព្រឹក ថ្ងៃអង្គារ ៨រោច ខែផល្គុន ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៤ ខែមីនា ឆ្នាំ២០២៣ នៅសាលប្រជុំសាលាខេត្តពោធិ៍សាត់ លោក ព្រំ​ វន្ថា​ ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាអនុប្រធានផ្នែកដឹកជញ្ជូននៃ ស.ស.យ.ក វិស័យសាធារណការ និងដឹកជញ្ជូន តំណាងឯកឧត្តម ឈួន វ៉ន់ ប្រធានផ្នែកដឹកជញ្ជូននៃ ស.ស.យ.ក. វិស័យសាធារណការ និងដឹកជញ្ជូន បានដឹកនាំក្រុមការងារផ្នែកដឹកជញ្ជូននៃ ស.ស.យ.ក. វិស័យសាធារណការ និងដឹកជញ្ជូន សហការជាមួយសហភាពសហព័ន្ធយុវជនកម្ពុជាខេត្តពោធិ៍សាត់ មន្ទីរសាធារណការ និងដឹកជញ្ជូនខេត្តពោធិ៍សាត់ រៀបចំវគ្គបណ្តុះបណ្តាលស្តីពីសុវត្ថិភាពចរាចរណ៍ផ្លូវគោក ដល់សមាជិក សមាជិកា ស.ស.យ.ក.ខេត្តពោធិ៍សាត់ ក្រោមអធិបតីភាព លោក សុខ មករា អនុប្រធានស.ស.យ.ក. ខេត្តពោធិ៍សាត់ តំណាងឯកឧត្តមបណ្ឌិត ហេង សុខគង់ ប្រធាន ស.ស.យ.ក. ខេត្តពោធិ៍សាត់ ដោយមានការចូលរួមពី លោក ឆាំង ហាវ អនុប្រធានមន្ទីរសាធារណការ និងដឹកជញ្ជូនខេត្តពោធិ៍សាត់ និងមានការចូលរួមពីសិក្ខាកាមជាយុវជន ស.ស.យ.ក ខេត្តក្រចេះ សរុបចំនួន ១០០នាក់។ វគ្គបណ្តុះបណ្តាលនេះ មានគោលបំណងអប់រំផ្សព្វផ្សាយស្តីពី សុវត្ថិភាពចរាចរណ៍ផ្លូវគោក ដើម្បីលើកកម្ពស់ការយល់ដឹងអំពីសុវត្ថិភាពចរាចរណ៍ផ្លូវគោក ដល់សមាជិក សមាជិកា ស.ស.យ.ក. និងដើម្បីយកចំណេះដឹងនេះទៅអប់រំ ផ្សព្វផ្សាយបន្តដល់យុវជនដទៃទៀត។ ប្រធានបទដែលយកមកអប់រំផ្សព្វផ្សាយរួមមាន៖ ស្ថានភាពទូទៅនៃគ្រោះថ្នាក់ចរាចរណ៍ផ្លូវគោក សុជីវធម៌ក្នុងការបើកបរ ការប្រើប្រាស់ល្បឿនក្នុងការបើកបរ សិទ្ធិអាទិភាពនៅត្រង់ផ្លូវប្រសព្វ ហានិភ័យនៃការបើកបរក្រោមឥទ្ធិពលនៃគ្រឿងស្រវឹង​ ការយល់ដឹងអំពីសុវត្ថិភាពក្នុងពេលបើកបរយានយន្ត អត្ថប្រយោជន៍នៃមួកសុវត្ថិភាព ការត្រួតពិនិត្យទោចក្រយានយន្ត កម្មវិធីយល់ដឹងអំពីទ្រឹស្តីនៃការបើកបរលើទូរស័ព្ទដៃ (Cambodia Driving Rules) និងកម្មវិធីថែទាំផ្លូវ (Road Care Mobile App)។