ភ្នំពេញ៖ ​ រដ្ឋាភិបាលកម្ពុជា គ្រោងសាងសង់ផ្លូវ៥០C និងស្ពានប្រវែងជាង ៣គីឡូម៉ែត្រ ឆ្លងកាត់ទន្លេសាប ដែលតភ្ជាប់ខេត្តកំពង់ឆ្នាំង និងខេត្តកំពង់ធំ នៅក្នុងឆ្នាំ២០២៤។ លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានប្រកាសពីគម្រោងនេះ នៅក្នុងពេលចុះពិនិត្យទីតាំងគម្រោងសាងសង់កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង ស្ថិតក្នុងស្រុកកំពង់លែង ខេត្តកំពង់ឆ្នាំង ថ្ងៃទី៩មីនា។ បើតាមរដ្ឋមន្ត្រីក្រសួងសាធារណការ និងដឹកជញ្ជូន ការសាងសង់ផ្លូវ៥០Cនេះ គ្រោងចំណាយថវិកាសរុបប្រមាណ ២៥០លានដុល្លារអាម៉េរិក ​ក្នុងនោះមានស្ពាន​ប្រវែងប្រមាណ ៣.៣គីឡូម៉ែត្រ​ ដែលជាវែងជាងគេនៅកម្ពុជា​។ លោក ស៊ុន ចាន់ថុល បញ្ជាក់ដូច្នេះ៖ «ទឹកប្រាក់ទាំងអស់ តាមតម្លៃប៉ានស្មានប្រហែលជាង ២៥០លានដុល្លារសហរដ្ឋអាម៉េរិក បែងចែក (លើ)ផ្លូវ ប្រហែលជាង១៥០(លានដុល្លារ)។ ស្ពានប្រហែល ១០០(លានដុល្លារ) » ។ ​​ ​លោក ស៊ុន ចាន់ថុល បានបន្ថែមថា គម្រោងផ្លូវ៥០Cនេះ នឹងជួយសម្រួលដល់ការធ្វើដំណើរ និងការដឹកជញ្ជូនទំនិញឆ្លងកាត់រវាងខេត្តទាំង២ និងបណ្តាខេត្តជុំវិញផងដែរ៕