សិក្ខាសាលាផ្សព្វផ្សាយស្ដីពីផែនការយុទ្ធសាស្ត្រទំនើបកម្មរថយន្តដឹកទំនិញធុនធ្ងន់ឆ្នាំ២០២២-២០៣០ ទីស្ដីការក្រសួង៖ ថ្ងៃចន្ទ ៨កើត ខែផល្គុន ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៧ ខែកុម្ភៈ ឆ្នាំ២០២២ លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មការគ្រប់គ្រងគម្រោងធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយផែនការយុទ្ធសាស្ត្រទំនើបកម្មរថយន្តដឹកទំនិញធុនធ្ងន់ឆ្នាំ២០២២-២០៣០ ដោយមានការអញ្ជើញចូលរួមពីដឹកនាំក្រសួង តំណាងទីភ្នាក់ងារសហប្រតិបត្តិការអន្តរជាតិ ជប៉ុន(JICA) លោក-លោកស្រី ប្រធាននាយកដ្ឋាន និងតំណាងក្រុមហ៊ុន សមាគមដឹកជញ្ជូន និង អង្គភាពពាក់ព័ន្ធក្រោមឱវាទក្រសួងប្រមាណជាង៨០រូប។ សិក្ខាសាលានេះរៀបចំឡើងក្នុងគោលបំណងដើម្បីផ្សព្វផ្សាយផែនការយុទ្ធសាស្ត្រលើកកម្ពស់លក្ខខណ្ឌរថយន្តដឹកទំនិញធុនធ្ងន់ និងអាជីវកម្មដឹកជញ្ជូននៅកម្ពុជាឱ្យកាន់តែមានប្រសិទ្ធភាព និងមានមេត្រីភាព នឹងបរិស្ថាន តាមរយៈគោលដៅយុទ្ធសាស្ត្រចំនួន៣រួមមាន៖ (១) ការជំរុញលើកទឹកចិត្តឱ្យប្រើប្រាស់ រថយន្តថ្មីៗសម្រាប់ដឹកទំនិញ (២) ការជំរុញលើកទឹកចិត្តឱ្យប្រើប្រាស់រថយន្តដឹកទំនិញដែលមានបច្ចេកវិទ្យាទំនើប (៣) ការកែលម្អប្រតិបត្តិការ និងអាជីវកម្មដឹកជញ្ជូនទំនិញ។ ថ្លែងក្នុងឱកាសនោះ លោកជំទាវរដ្ឋលេខាធិការ បានគូសបញ្ជាក់ពីការប្រកាន់ខ្ជាប់ខ្ជួននូវវិស័យអាទិភាពចំនួនបួនរួមមាន៖ មនុស្ស ផ្លូវ ទឹក ភ្លើង របស់រាជរដ្ឋាភិបាល ក្រោមការដឹកនាំប្រកបគតិបណ្ដិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងការប្តេជ្ញាចិត្តខ្ពស់ពីក្រសួង-ស្ថាប័នពាក់ព័ន្ធសំខាន់ៗ និងវិស័យឯកជន ជាពិសេសប្រតិបត្តិករអាជីវកម្មដឹកជញ្ជូន ដើម្បីអនុវត្តបានជោគជ័យផែនការយុទ្ធសាស្ត្រទំនើបកម្មរថយន្តដឹកទំនិញធុនធ្ងន់ឆ្នាំ២០២២-២០៣០។ អង្គសិក្ខាសាលាបានជជែកពិភាក្សាយ៉ាងផុលផុស និងបានស្នើឡើងនូវយុទ្ធសាស្ត្រចំនួន៤រួមមាន៖ ១. ការផ្លាស់ប្តូររថយន្តដឹកទំនិញចាស់ៗ ២. ការលើកទឹកចិត្តឱ្យប្រើប្រាស់រថយន្តដឹកទំនិញដែលមានមេត្រីភាពនឹងបរិស្ថាន ៣. ការកែលម្អប្រតិបត្តិការរថយន្តដឹកទំនិញ និង ៤. ការធ្វើទំនើបកម្មអាជីវកម្មនិង ប្រតិបត្តិការដឹកជញ្ជូនទំនិញ៕