ក្រុមមន្ត្រីជំនាញក្រសួងសាធារណការ និងដឹកជញ្ជូន ចុះពិនិត្យក្រុមហ៊ុន/ហាងលក់ទោចក្រយានយន្តដែលទទួលបានសិទ្ធិអនុញ្ញាតឱ្យបំពេញបែបបទចុះបញ្ជីយានជំនិះជូនប្រជាពលរដ្ឋដែលមកទិញទោចក្រយានយន្ត ភ្នំពេញ៖ ថ្ងៃចន្ទ ១កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២០ ខែកុម្ភៈ ឆ្នាំ២០២៣ ក្រុមមន្ត្រីជំនាញអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានចុះពិនិត្យក្រុមហ៊ុន/ហាងលក់ទោចក្រយានយន្តដែលទទួលបានសិទ្ធិអនុញ្ញាតឱ្យបំពេញបែបបទចុះបញ្ជីយានជំនិះជូនដល់ប្រជាពលរដ្ឋដែលមកទិញទោចក្រយានយន្ត។ ការចុះពិនិត្យនេះធ្វើឡើងក្នុងគោលបំណងដើម្បីពង្រឹងការអនុវត្តការផ្សព្វផ្សាយច្បាប់ស្តីពីចរាចរណណ៍ផ្លូវគោកចំពោះក្រុមហ៊ុន/ហាងលក់ទោចក្រយានយន្ត ដែលទទួលបានសិទ្ធិអនុញ្ញាតឱ្យបំពេញបែបបទចុះបញ្ជីយានជំនិះពីក្រសួង ក៏ដូចជាដើម្បីណែនាំ និងជំរុញឱ្យក្រុមហ៊ុន/ហាងលក់ទោចក្រយានយន្តទាំងនោះបន្តផ្សព្វផ្សាយច្បាប់ស្តីពីចរាចរណ៍ផ្លូវគោក សញ្ញាចរាចរណ៍ និងចាក់ផ្សាយវីដេអូអប់រំដើម្បីលើកកម្ពស់សុវត្ថិភាពចរាចរណ៍ដែលផលិតដោយក្រសួង។ ជាលទ្ធផល ក្រុមមន្ត្រីជំនាញ បានពិនិត្យក្រុមហ៊ុន/ហាងលក់ទោចក្រយានយន្តចំនួនបីរួមមាន៖ ក្រុមហ៊ុន ឡុង គាង ត្រេឌីង ឯ.ក ហាងលក់ទោចក្រយានយន្ត អ៊ឹង ប៉ោប៉ី សប ហាងលក់ទោចក្រយានយន្ត លី គង់ និងបានពិនិត្យឃើញថាក្រុមហ៊ុន/ហាងទាំងនោះ បានអនុវត្តយ៉ាងខ្ជាប់ខ្ជួនតាមលក្ខខណ្ឌដែលកំណត់ដោយច្បាប់ រួមមានការបិទសញ្ញាចរាចរណ៍ និងការចាក់ផ្សាយវីដេអូលើកកម្ពស់សុវត្ថិភាពចរាចរណ៍ជាប្រចាំជូនប្រជាពលរដ្ឋដែលមកទិញទោចក្រយានយន្ត។ បន្ថែមពីលើនោះ ម្ចាស់ ឬតំណាងក្រុមហ៊ុន/ហាងលក់ទោចក្រយានយន្ត បានស្នើសុំតាមរយៈក្រុមមន្ត្រីជំនាញឱ្យក្រសួងបន្តផលិតវីដេអូសុវត្ថិភាពចរាចរណ៍បន្ថែមទៀត ដើម្បីចូលរួមចំណែក និងជាគុណប្រយោជន៍ក្នុងការផ្សព្វផ្សាយជូនប្រជាពលរដ្ឋ។ ជាមួយគ្នានោះផងដែរ ក្រុមមន្ត្រីជំនាញបានស្នើសុំឱ្យក្រុមហ៊ុន/ហាងលក់ទោចក្រយានយន្ត បន្តចាក់ផ្សាយវីដេអូលើកកម្ពស់សុវត្ថិភាពចរាចរណ៍ ផ្សព្វផ្សាយសញ្ញាចរាចរណ៍ និងធ្វើបទបង្ហាញពីសញ្ញាចរាចរណ៍ ដើម្បីបញ្ជ្រាបការយល់ដឹងអំពីច្បាប់ចរាចរណ៍ឱ្យកាន់តែទូលំទូលាយផងដែរ៕