កិច្ចប្រជុំពិភាក្សាលើការរៀបចំប្រឡងតាមប្រព័ន្ធអនឡាញ ដើម្បីជ្រើសរើសនិស្សិតជំនាន់ទី៣ ចំនួន២០០នាក់ ប្រកបដោយតម្លាភាព និងសុក្រឹតភាពខ្ពស់ ក្រោមអធិបតីភាព លោកជំទាវ ឥម នីថារ៉ា រដ្ឋលេខាធិការ នាព្រឹក ថ្ងៃចន្ទ ៨រោច ខែមាឃ ឆ្នាំខាល ចត្វាស័ក ពស២៥៦៦ ត្រូវនឹងថ្ងៃទី១៣ ខែកុម្ភៈ ឆ្នាំ២០២៣ នៅសាលប្រជុំវិទ្យាស្ថាន លោកជំទាវ ឥម នីថារ៉ា រដ្ឋលេខាធិការ បានអញ្ជើញជាអធិបតីដឹកនាំកិច្ចប្រជុំពិភាក្សាការរៀបចំប្រឡងជ្រើសរើសនិស្សិតជំនាន់ទី៣ ឆ្នាំសិក្សា២០២២-២០២៣ តាមប្រព័ន្ធអនឡាញ ដែលមានការអញ្ជើញចូលរួមពី ឯកឧត្តម ហឿន សំនៀង នាយកវិទ្យាស្ថាន ជាប្រធានគណៈកម្មការ ព្រមទាំងថ្នាក់ដឹកនាំដែលជាសមាជិក សមាជិកា នៃគណៈកម្មការរៀបចំប្រឡង។ ក្នុងឱកាសនោះផងដែរ ឯកឧត្តម ហឿន សំនៀង នាយកវិទ្យាស្ថាន និងជាប្រធានគណៈកម្មការប្រឡងបានគោរពរាយការណ៍ជូនលោកជំទាវផងដែរ អំពីដំណើរការនៃការត្រៀមមុនការរៀបចំប្រឡង កិច្ចខិតខំប្រឹងប្រែងរបស់ក្រុមការងារ ព្រមទាំងរាយការណ៍អំពីការត្រៀមរៀបចំតាមគណៈកម្មការ អនុគណៈកម្មការតាមផ្នែកនីមួយៗ ក្នុងការតួ្រតពិនិត្យ និងតាមដានការប្រឡងជ្រើសរើសនិស្សិតជំនាន់ទី៣ ដើម្បីធ្វើឱ្យការប្រឡងជ្រើសរើសនិស្សិតចំនួន២០០នាក់ ប្រកបដោយតម្លាភាព និងសុក្រឹតភាពខ្ពស់។ សូមបញ្ជាក់ផងដែរថា សម្រាប់ថ្ងៃអង្គារ ទី១៤ ខែកុម្ភៈ ឆ្នាំ២០២៣ វិទ្យាស្ថានបានរៀបចំការប្រឡងជ្រើសរើសនិស្សិតជំនាន់ទី៣ លើមុខវិជ្ជា ចំនួន០៤រួមមាន៖ គណិតវិទ្យា រូបវិទ្យា គីមីវិទ្យា និងតក្កវិទ្យា ដោយធ្វើការប្រឡង០១ថ្ងៃពេញ៕