[Kampucheathmey] - ចម្ងាយផ្លូវនៅសល់ជាង ១ គីឡូម៉ែត្រពីកោះធំទៅក្អមសំណរ គ្រោងបញ្ចប់នៅឆ្នាំ២០២៣
2022-12-29
ទៅកាន់ទំព័រចុះផ្សាយក្នុង Kampucheathmey
អាជ្ញាធរខេត្តកណ្តាល ដាក់ផែនការនឹងបញ្ចប់ការស្ថាបនាផ្លូវមួយខ្សែភ្ជាប់ពីស្រុកកោះធំទៅច្រកក្អមសំណរ ខណៈនៅសល់ប្រវែងជាង ១ គីឡូម៉ែត្រទៀតមិនទាន់រួចរាល់។
លោក នូវប៉េង ច័ន្ទតារា អ្នកនាំពាក្យសាលាខេត្តកណ្តាលបានឲ្យកម្ពុជាថ្មីដឹងនៅព្រឹកនេះថា កំណាត់ផ្លូវនេះបានបើកការដ្ឋានសាងសង់តាំងពីឆ្នាំ ២០១៨ មានប្រវែងជាង ១០ គីឡូម៉ែត្រ មកដល់ពេលនេះនៅសល់ជាង ១ គីឡូម៉ែត្រទៀតមិនទាន់សាងសង់បញ្ចប់។លោកថា ក្នុងប្រវែងផ្លូវជាង ១០ គីឡូម៉ែត្រ ដែលនៅសល់ជាង ១ គីឡូម៉ែត្រ លោកអភិបាលខេត្តបានដាក់ផែនការធ្វើយ៉ាងណាឲ្យរួចរាល់នៅឆ្នាំ២០២៣នេះ។ ផ្លូវដែលសល់ជាង ១ គីឡូម៉ែត្រនេះមានការប៉ះពាល់ដល់ផលដំណាំប្រជាពលរដ្ឋ ហើយអាជ្ញាធរកំពុងជំរុញដោះស្រាយឲ្យចប់សព្វគ្រប់។
មន្រ្តីខេត្តរូបនេះបានបញ្ជាក់ថា កំណាត់ផ្លូវថ្មីនេះត្រូវលើកឲ្យខ្ពស់ផុតពីទឹកហើយជាជំហានដំបូងត្រូវស្ថាបនាជាផ្លូវដីសិន ហើយអនាគតអាចនឹងលើកកម្រិតជាផ្លូវបេតុងតែម្តង។
កាលពីឆ្នាំ២០១៨ ជំនាន់លោក ម៉ៅ ភិរុណជាអភិបាលខេត្តកណ្តាល បានបើកការដ្ឋានស្ថាបនាផ្លូវមួយខ្សែប្រវែងជាង ១០ គីឡូម៉ែត្រ បំបែកចេញពីផ្លូវខេត្តលេខ ១១០ ចំណុចគីឡូម៉ែត្រលេខ៩០ ស្ថិតក្នុងភូមិព្រែកទន្លា ឃុំព្រែកជ្រៃ ស្រុកកោះធំ ទៅទល់ជាមួយផ្លូវលេខ១១៨ A ចំណុចគីឡូម៉ែត្រលេខ ៤៥ ស្ថិតក្នុងឃុំក្អមសំណរ ស្រុកលើកដែក។លូវនេះមានសារសំខាន់តភ្ជាប់ពីតំបន់ប្រជុំជននៅស្រុកកោះធំទៅច្រកព្រំដែនក្អមសំណរក្នុងស្រុកលើកដែក ដោយសាងសង់ប្របតាមខ្សែបន្ទាត់ព្រំដែនកម្ពុជាវៀតណាម។
លោក នូវប៉េង ច័ន្ទតារាបានឲ្យកម្ពុជាថ្មីដឹងថា នៅខែនេះបងប្អូនអាចធ្វើដំណើរទៅលេងបានដើម្បីបានឃើញជាក់ស្តែងនិងអាចស្វែងយល់ពីតំបន់ព្រំដែនកម្ពុជាវៀតណាមផងដែរ៕
