ការបើកវគ្គបណ្តុះបណ្តាលយកវិញ្ញាបនបត្របញ្ជាក់សមត្ថភាពគ្រូបង្រៀនបើកបរយានយន្ត ប្រភេទ ខ នៅមជ្ឈមណ្ឌលបណ្តុះបណ្តាលយានយន្តធុនធ្ងន់ នៅព្រឹកថ្ងៃចន្ទ ១១រោច ខែមិគសិរ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៩ ខែធ្នូ ឆ្នាំ២០២២ ឯកឧត្តម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក បានចូលរួមជាអធិបតីភាព ក្នុងការបើកវគ្គបណ្តុះបណ្តាលសមត្ថភាពគ្រូបង្រៀនបើកបររថយន្តប្រភេទ ខ វគ្គទី១៥ ដែលមានសិក្ខាកាមមកពីគ្រប់បណ្តាសាលាបង្រៀនបើកបរយានយន្តរាជធានី ខេត្ត សរុប៦២នាក់។ សូមបញ្ជាក់ជូនផងដែរថា តាំងពីបើកវគ្គបណ្តុះបណ្តាលរហូតមកដល់បច្ចុប្បន្ន អគ្គនាយកដ្ឋានដឹកជញ្ជូនផ្លូវគោក បានបណ្តុះបណ្តាល និងចេញវិញ្ញាបនបត្រជូនដល់សិក្ខាកាមជាគ្រូបង្គោលបង្រៀនបើកបរសរុបបាន ៥៦៩នាក់។ ថ្លែងក្នុងឱកាសនោះដែរ ឯកឧត្តមអគ្គនាយក បានចូលរួមសាទរចំពោះវត្តមានសិក្ខាកាមដែលបានចូលរួម ដែលនឹងក្លាយខ្លួនជាគ្រូបង្គោលនាពេលខាងមុខនេះ និងបានផ្តាំផ្ញើដល់សិក្ខាកាមទាំងអស់ សូមយកចំណេះដឹង និងបចេ្ចកទេសបើកបរយានយន្តនេះ ធ្វើការបណ្តុះបណ្តាលបន្តឱ្យបានត្រឹមត្រូវ ព្រមទាំង គោរពច្បាប់ស្តីពីចរាចរណ៍ផ្លូវគោក ក៏ដូចជាបានចូលរួមក្នុងការកាត់បន្ថយគ្រោះថ្នាក់ចរាចរណ៍ផងដែរ៕