(ភ្នំពេញ)៖ នៅថ្ងៃទី០៩ ខែធ្នូ ឆ្នាំ២០២២ សម្ដេចតេជោ ហ៊ុន សែន នឹងអញ្ជើញ ។ ជាអធិបតីភាពដ៏ខ្ពង់ខ្ពស់ ក្នុងពិធីចុះហត្ថលេខា រវាងរាជរដ្ឋាភិបាលកម្ពុជា និងរដ្ឋាភិបាល នៃសាធារណរដ្ឋកូរ៉េ ដែលមានទឹកប្រាក់ចំនួន ១.៨១៥.៩០៩.០០០ដុល្លារ សម្រាប់អនុវត្តន៍លើគម្រោងសំខាន់ៗចំនួន៣របស់កម្ពុជាយើង។ ក្នុងសេចក្ដីប្រកាសព័ត៌មាន របស់ក្រសួងការបរទេសខ្មែរ នៅថ្ងៃទី៨ ខែធ្នូ បានឲ្យដឹងថាៈ ឯកសារសំខាន់ៗ ដែលនឹងត្រូវចុះហត្ថលេខារួម មានដូចខាងក្រោម ១.លោក ប្រាក់ សុខុន ឧបនាយក​រដ្ឋមន្ត្រី រដ្ឋមន្ត្រី​ការបរទេស​កម្ពុជា និង​លោក ប៉ាក ហឹងឃ្យង (PARK Heung-kyeong) ឯកអគ្គរដ្ឋទូត ​នៃសាធារណរដ្ឋកូរ៉េ​ ប្រចាំ​កម្ពុជា នឹង ចុះ​ហត្ថលេខា​លើ​ កិច្ចសម្របសម្រួលក្របខណ្ឌ ស្ដីពីការផ្ដល់ឥណទាន សម្បទាន​ នៃមូលនិធិសហប្រតិបត្តិការ អភិវឌ្ឍន៍សេដ្ឋកិច្ច សម្រាប់ឆ្នាំ២០២២-២០២៦ ដែលមានទំហំទឹកប្រាក់ ចំនួន ១៥០០ ​លាន​​​ដុល្លារអាមេរិក។ ២.ក្នុងពេលជាមួយគ្នានោះដែរ​​ លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោកស្រី Minnie CHEY ​ប្រធានមូលនិធិ សម្រាប់កិច្ចសហប្រតិបត្តិការអភិវឌ្ឍន៍សេដ្ឋកិច្ច នៃធនាគារនីហ័រណអាហ័រណកូរ៉េ ប្រចាំកម្ពុជា ក៏នឹងចុះហត្ថលេខា លើកិច្ចព្រមព្រៀង ឥណទានសម្បទាន សម្រាប់គម្រោងចំនួន ២ ដូចខាងក្រោម ៖ គម្រោងពង្រឹងសមត្ថភាពប្រព័ន្ធ បណ្ដាញបញ្ជូនអគ្គិសនីនៅខេត្តព្រះសីហនុ ដែលមានទឹកប្រាក់ចំនួន ៧០ ០០០ ០០០ ដុល្លារអាមេរិក និង គម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ (ផ្សារចាស់-ជ្រោយចង្វារ; ជ្រោយចង្វារ-អរិយក្សត្រ) ដែលមានទឹកប្រាក់ចំនួន ២៤៥ ៩០៩ ០០០ ដុល្លារអាមេរិក។ ឥណទានសម្បទាន ដែលផ្ដល់ដោយ រដ្ឋាភិបាល នៃសាធារណរដ្ឋកូរ៉េ នៅពេលនេះ ។ នឹងចូល​រួម​ចំណែក​ ដ៏សំខាន់​ដល់កិច្ចខិតខំប្រឹងប្រែង របស់រាជរដ្ឋាភិបាលកម្ពុជា ក្នុងការពន្លឿនការអភិវឌ្ឍសេដ្ឋកិច្ច ព្រម​ទាំង​ពង្រឹងបន្ថែមទៀត នូវទំនាក់ទំនងល្អ រវាងកម្ពុជា កូរ៉េខាងត្បូង៕