កិច្ចប្រជុំលើកទី៥ របស់គណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ(គ.ស.ហ) ភ្នំពេញ៖ ថ្ងៃព្រហស្បតិ៍ ៩រោច ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៧ ខែវិច្ឆិកា ឆ្នាំ២០២២ ឯកឧត្តម ស៊ឹង សុគង់ អនុរដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកជាប្រធានក្រុមការងារប្រឆាំងការសម្អាតប្រាក់ និងហិរញ្ញប្បទានភេវរកម្មរបស់ក្រសួង បានអញ្ជើញចូលរួមកិច្ចប្រជុំលើកទី៥ របស់គណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ(គ.ស.ហ) ក្រោមអធិបតីភាពដ៏ខ្ពង់ខ្ពស់សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈ កម្មាធិការ ដោយមានការអញ្ជើញចូលរួមពីឯកឧត្តមរដ្ឋមន្ដ្រីក្រសួង-ស្ថាប័នពាក់ព័ន្ធ  ប្រធានអង្គភាពប្រឆាំងអំពើពុករលួយ (ACU) រដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ និងភាគីពាក់ព័ន្ធផងដែរ។ កិច្ចប្រជុំនេះធ្វើឡើងក្នុងគោលបំណងដើម្បីពិនិត្យលទ្ធផលនៃសេចក្តីសម្រេចរបស់មហាសន្និបាតក្រុមការងារហិរញ្ញវត្ថុ (Financial Action Task Force-FATE) លើរបាយការណ៍វឌ្ឍនភាពជុំទី១០របស់កម្ពុជា ព្រមទាំងដាក់ចេញនូវទិសដៅការងារបន្ត ដើម្បីត្រៀមលក្ខណៈឱ្យបានល្អប្រសើរសម្រាប់ការចុះដោះស្រាយការងាររបស់ក្រុមអធិការកិច្ច ដែលនឹងអញ្ជើញមកដល់កម្ពុជានៅអំឡុងខែមករា ឆ្នាំ២០២៣ ខាងមុខ ដើម្បីពិនិត្យវាយតម្លៃចុងក្រោយ ដកកម្ពុជាចេញពីបញ្ជីប្រផេះ FATF នាពេលខាងមុខ។ សូមជម្រាបជូនថា៖ កម្ពុជាបានរៀបចំរបាយការណ៍វឌ្ឍនភាពជុំទី១០ និងបានដាក់ជូនFATF បានទាន់ពេលវេលា ដោយក្នុងរបាយការណ៍នេះ បានរំលេចឱ្យឃើញពីវឌ្ឍនភាពល្អប្រសើរ ប្រហាក់ប្រហែលនឹងវឌ្ឍនភាពជុំទី០៩ ហើយមហាសន្និបាទFATF កាលពីថ្ងៃទី២១ ខែតុលា ឆ្នាំ២០២២ បានបញ្ជាក់ថាកម្ពុជាអនុវត្តបានពេញលេញនូវផែនការសកម្មភាពទាំងអស់ដែលនៅសេសសល់ និងបានសម្រេចឱ្យមានការចុះធ្វើទស្សនកិច្ចផ្ទាល់ (On-site Visit) នៅក្នុងខែមករា ឆ្នាំ២០២៣ ខាងមុខនេះ។ ថ្លែងក្នុងឱកាសនោះដែរ សម្ដេចក្រឡាហោមឧបនាយករដ្ឋមន្ត្រី បានសម្តែងនូវការកោតសរសើរយ៉ាងជ្រាលជ្រៅ និងវាយតម្លៃខ្ពស់ចំពោះកិច្ចខិតខំប្រឹងប្រែង និងការសហការល្អពីសំណាក់គ.ស.ហ នៃ ក្រសួង-ស្ថាប័នពាក់ព័ន្ធទាំងអស់ ដែលកន្លងមកបានខិតខំធ្វើការងារយ៉ាងសកម្ម រហូតអាចសម្រេចបាន លទ្ធផលជាវិជ្ជមានល្អប្រសើរជាបន្ដបន្ទាប់។ ក្រោមការដឹកនាំចង្អុលបង្ហាញាពីឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងដឹកនាំអនុវត្តផ្ទាល់ដោយឯកឧត្តម សួង ហេង រដ្ឋលេខាធិការទទួលបន្ទុក បានរួមចំណែកយ៉ាងសកម្ម ឆាប់រហ័ស ក្នុងការស្រាវជ្រាវ ផ្តល់ព័ត៌មាន ទិន្នន័យពាក់ព័ន្ធ ជាពិសេសភាគច្រើនលើ ទិន្នន័យព័ត៌មានមធ្យោបាយដឹកជញ្ជូន ដែលជាប់ការសង្ស័យក្នុងបទល្មើសការសម្អាតប្រាក់ តាមការស្នើពីស្ថាប័នមានសមត្ថកិច្ច។ គួរកត់សម្គាល់ផងដែរថា៖ ការសម្រេចរបស់FATF ឱ្យមានការធ្វើទស្សនកិច្ចកម្ពុជាដោយផ្ទាល់នេះ មិនត្រឹមតែជាជោគជ័យក្នុងជំហានដ៏សំខាន់មួយសម្រាប់កម្ពុជាប៉ុណ្ណោះទេ ប៉ុន្ដែជាឱកាសមាសដ៏កម្រឆ្ពោះទៅរកការដកកម្ពុជាចេញពីបញ្ជីប្រផេះ ដែលជាគោលដៅចុងក្រោយនៃបេសកកម្មរបស់គ.ស.ហ។ ការចុះទស្សនកិច្ចផ្ទាល់នាពេលខាងមុខនេះ គឺជាដំណាក់កាលចុងក្រោយនៅក្នុងក្របខ័ណ្ឌនៃនីតិវិធី របស់FATF មុនសម្រេចដកកម្ពុជាចេញពីបញ្ជីប្រផេះរបស់ខ្លួន៕