ដើម្បីចូលរួមអបអរសាទរ សមិទ្ធផលជាប្រវត្តិសាស្រ្ត គម្រោងផ្លូវល្បឿនលឿនទីមួយ និងដំបូងបំផុត នៃព្រះរាជាណាចក្រកម្ពុជា “ផ្លូវល្បឿនលឿនភ្នំពេញ-ក្រុងព្រះសីហនុ” ដែលត្រូវបានសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី០៩ ខែវិច្ឆិកា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម លី ខឺឈាង (Li Keqiang) នាយករដ្ឋមន្ត្រីនៃសាធារណរដ្ឋប្រជាមានិតចិន សូមជូនបងប្អូនប្រជាពលរដ្ឋរីករាយទស្សនា វីដេអូឯកសារ ស្តីពី “សាវតានៃការកកើតផ្លូវល្បឿនលឿនភ្នំពេញ-ក្រុងព្រះសីហនុ”។ សូមជម្រាបជូនដែរថា៖ ខ្សែផ្លូវនេះមានប្រវែងសរុប ១៨៧,០៥គីឡូម៉ែត្រ ត្រូវបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ ចំណាយពេលសាងសង់ជាង៤០ខែ ដែលតួផ្លូវមានទទឹង ២៤ម៉ែត្រ មាន ៤គន្លង (២ទៅ ២មក) និងគន្លងឈប់បន្ទាន់ (១ទៅ ១មក) ក្រាលដោយបេតុងកៅស៊ូ (AC) តភ្ជាប់ពីរាជធានីភ្នំពេញទៅដល់សង្កាត់លេខ៣ ក្រុងព្រះសីហនុ ខេត្តព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។ ផ្លូវនេះដែរ មានសួនច្បារខណ្ឌកណ្តាល មានស្ថានីយចេញចូលចំនួន ៨ទីតាំង មានផ្លូវបំបែកប្តូរទិស (Interchange) ភ្ជាប់មក ផ្លូវជាតិលេខ៤ ចំនួន ៦កន្លែង មានកន្លែងឈប់សម្រាកចំនួន ៣កន្លែង និងចំណតរថយន្ត ១កន្លែង ផងដែរ។ បងប្អូនប្រជាពលរដ្ឋអាចធ្វើដំណើរ និងដឹកជញ្ជូនទំនិញ លើផ្លូវមួយខ្សែនេះប្រកបដោយប្រសិទ្ធភាព កាត់បន្ថយការចំណាយ និងចំណេញពេលវេលាធ្វើដំណើរ មកត្រឹមតែប្រមាណ ២ម៉ោងប៉ុណ្ណោះពីរាជធានីភ្នំពេញ ទៅក្រុងព្រះសីហនុ៕