កិច្ចប្រជុំលើកទី៤ នៃភាពជាដៃគូក្នុងវិស័យភស្តុភារកម្មបៃតងប្រចាំឆ្នាំ២០២២ (4th Green Logistics Partnership Conference 2022) ដើម្បីពិភាក្សា និងចែករំលែកបទពិសោធន៍ អំពីការរៀបចំគោលនយោបាយ ការអនុវត្ត និងបញ្ហាប្រឈមទាក់ទងទៅនឹងវិស័យភស្តុភារកម្មបៃតង និងកំណត់ទិសដៅ និងផែនការសកម្មភាពសំដៅធ្វើឱ្យប្រសើរឡើងវិស័យភស្តុភារកម្មបៃតងនៅក្នុងតំបន់អាស៊ាន ទីស្ដីការក្រសួង៖ ថ្ងៃសុក្រ ១១កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៤ ខែវិច្ឆិកា ឆ្នាំ២០២២ ឯកឧត្ដម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម នៃក្រសួងសាធារណការ និងដឹកជញ្ជូន និងជាប្រធានឧត្តមមន្ត្រីដឹកជញ្ជូនកម្ពុជា បានដឹកនាំកិច្ចប្រជុំលើកទី៤ នៃភាពជាដៃគូក្នុងវិស័យភស្តុភារកម្មបៃតងប្រចាំឆ្នាំ២០២២ ដោយមានការអញ្ជើញចូលរួមដោយផ្ទាល់ និងតាមប្រព័ន្ធវីដេពីចម្ងាយពីលេខាធិការដ្ឋានអាស៊ាន ដៃគូអភិវឌ្ឍ តំណាងក្រសួងស្ថាប័នពាក់ព័ន្ធ ទីប្រឹក្សាភស្តុភារកម្មអន្តរជាតិនៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ទីភ្នាក់ងារសហប្រតិបត្តិការអន្តរជាតិជប៉ុន(JICA) វិទ្យាស្ថានប្រព័ន្ធភ័ស្តុភារកម្មជប៉ុន និងវិស័យឯកជនផងដែរ។ កិច្ចប្រជុំនេះ រៀបចំឡើងក្នុងគោលបំណងដើម្បីចែករំលែកបទពិសោធន៍គោលនយោបាយទាក់ទងនឹងភស្តុភារកម្មបៃតង បញ្ហាប្រឈម និងការអនុវត្តល្អៗពីវាគ្មិនសំខាន់ៗ សំដៅស្វែងរកមធ្យោបាយធ្វើឱ្យ ប្រសើរឡើងដល់សកម្មភាពទាក់ទងនឹងភស្តុភារបៃតង។ នៅក្នុងកិច្ចប្រជុំនេះ ឯកឧត្តមអគ្គនាយកបានថ្លែងកត់សម្គាល់ពីការចូលរួមយ៉ាងផុលផុសលើការពិភាក្សា និងការចែករំលែកបទពិសោធន៍ ការអនុវត្តល្អៗ ការផ្តល់នូវធាតុចូលលើគោលនយោបាយ ក៏ដូចជាអនុសាសន៍សំខាន់ៗទាក់ទងនឹងភស្ភុភារកម្មបៃតងពីអង្គប្រជុំទាំងមូល ដើម្បីចូលរួមចំណែកក្នុងការកាត់បន្ថយផលប៉ះពាល់បរិស្ថាន ធ្វើឱ្យប្រសើរឡើងផលិតភាព និងការដោះស្រាយបញ្ហាទាក់ទងនឹងសង្គមផងដែរ។ ឯកឧត្តមអគ្គនាយក បានកត់សំគាល់ឃើញថា៖ អ្នកចូលរួមបានយល់ដឹងច្រើនអំពីវិធីគ្រប់គ្រងសកម្មភាពទាក់ទងនឹងភស្ភុភារកម្មបៃតង ជាពិសេសផែនការមេនៃគោលនយោបាយភស្តុភារគ្រប់ជ្រុងជ្រោយ (២០២១-២០២៥) របស់ប្រទេសជប៉ុន ដែលផ្តល់នូវផែនទីបង្ហាញផ្លូវជាក់លាក់ដើម្បីធ្វើឱ្យការដឹកជញ្ជូន និងខ្សែច្រវាក់ផ្គត់ផ្គង់កាន់ តែមានប្រសិទ្ធភាព ធ្វើឱ្យប្រសើរឡើងផលិតភាព កាត់បន្ថយការបញ្ចេញឧស្ម័នផ្ទះកញ្ចក់ និងការដោះស្រាយបញ្ហាសង្គម។ ឯកឧត្តមអគ្គនាយក ក៏បានថ្លែងអំណរគុណយ៉ាងជ្រាលជ្រៅផងដែរដល់អង្គប្រជុំទាំងមូលដែលបាន ចំណាយពេលវេលាដ៏តម្លៃចូលរួមកិច្ចប្រជុំនេះ ជាពិសេសក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន (MLIT) វិទ្យាស្ថានប្រព័ន្ធភស្តុភារជប៉ុន និងលេខាធិការដ្ឋានអាស៊ានដែលបានផ្តល់ការគាំទ្រលើកិច្ចប្រជុំនេះ។ គួរកត់សម្គាល់ផងដែរថា៖ ភស្តុភារកម្មបៃតង ដើរតួនាទីយ៉ាងសំខាន់ក្នុងការរួមចំណែកកាត់បន្ថយការ បញ្ចេញឧស្ម័នផ្ទះកញ្ចក់។ ដោយសារបម្រែបម្រួលអាកាសធាតុគឺជាបញ្ហាជាប់ពាក់ព័ន្ធនឹងវិស័យជាច្រើននៃសេដ្ឋកិច្ច វិស័យសាធារណៈ និងឯកជនចាំបាច់ត្រូវខិតខំប្រឹងប្រែងរួមគ្នាដើម្បីដោះស្រាយបញ្ហានេះ ឱ្យមានប្រសិទ្ធភាពប្រកបដោយស្មារតីទទួលខុសត្រូវខ្ពស់៕