កិច្ចប្រជុំត្រៀមសកម្មភាពបង្ការក្នុងស្ថានភាពទឹកជំនន់ និងត្រៀមរៀបចំរបាយការណ៍ប្រចាំឆ្នាំរបស់ លេខាធិការដ្ឋានគ្រប់គ្រងគ្រោះមហន្តរាយ នៃក្រសួងសាធារណការ និងដឹកជញ្ជូន ដឹកនាំដោយឯកឧត្តម រដ្ឋលេខាធិការ ឈួន វិន ថ្ងៃចន្ទ ៨កើត ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣ ខែតុលា ឆ្នាំ២០២២ នៅទីស្តីការក្រសួង ឯកឧត្តម ឈួន វិន រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកជាប្រធានលេខាធិការដ្ឋានគ្រប់គ្រងគ្រោះមហន្តរាយ នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្តីពីសកម្មភាពត្រៀមបង្ការក្នុងស្ថានភាពទឹកជំនន់ និងត្រៀមរៀបចំរបាយការណ៍ប្រចាំឆ្នាំ២០២២ ទាក់ទងនឹងការគ្រប់គ្រងគ្រោះមហន្តរាយនៃវិស័យសាធារណការ និងដឹកជញ្ជូន ដោយមានសមាសភាពចូលរួម៖ ឯកឧត្តម លោក លោកស្រី ជាអនុប្រធាន សមាជិកអចិន្រ្តៃយ៍ និងសមាជិកនៃលេខាធិការដ្ឋានគ្រប់គ្រងគ្រោះមហន្តរាយសរុបប្រមាណ២០រូប។ កិច្ចប្រជុំនេះមានគោលបំណងដើម្បីចែករំលែកការយល់ដឹងបន្ថែមពីក្របខណ្ឌការងារគ្រប់គ្រងគ្រោះមហន្តរាយ លទ្ធផលការងារសង្ខេបរយៈពេល០៩ខែសម្រាប់ឆ្នាំ២០២២ ការរៀបចំរបាយការណ៍ក្នុងស្ថានភាព ទឹកជំនន់បច្ចុប្បន្នឆ្នាំ២០២២ និងត្រៀមរៀបចំបូកសរុបរបាយការណ៍សម្រាប់ឆ្នាំ២០២២។ អង្គប្រជុំបានពិភាក្សាអំពីលទ្ធផលការងារពីគ្រប់បណ្ដាអគ្គនាយកដ្ឋានពាក់ព័ន្ធ និងក្របខ័ណ្ឌការងារគ្រប់ គ្រងគ្រោះមហន្តរាយទាក់ទងនឹង ១) សកម្មភាពត្រៀមបង្ការ និងកាត់បន្ថយគ្រោះថ្នាក់ ២) សកម្មភាព ត្រៀមរៀបចំ ៣) សកម្មភាពឆ្លើយតប និង ៤) សកម្មភាពស្តារឡើងវិញ។ ថ្លែងទៅកាន់អង្គប្រជុំនាឱកាសនោះ ឯកឧត្តមរដ្ឋលេខាធិការប្រធានអង្គប្រជុំ បានជំរុញលើកទឹកចិត្តឱ្យគ្រប់អង្គភាពក្រោមឱវាទក្រសួងទាំងអស់បន្តយកចិត្តទុកដាក់លើការងារគ្រប់គ្រងគ្រោះមហន្តរាយ ធ្វើយ៉ាងណាជំរុញការរាយការណ៍ឱ្យបានឆាប់រហ័ស ដើម្បីទប់ស្កាត់ ឆ្លើយតប ស្ដារស្ថានការណ៍ឡើងវិញ បានទាន់ពេលវេលា និងបានលើកទឹកចិត្តឱ្យគ្រប់អគ្គនាយកដ្ឋានបន្តផ្សព្វផ្សាយ បណ្ដុះបណ្ដាល និងពង្រឹងលើការងារកសាង និងជួសជុលហេដ្ឋារចនាសម្ព័ន្ធដឹកជញ្ជូនឱ្យបានល្អប្រសើរឡើង៕