[Rasmei Kampuchea Daily News] - គណៈប្រតិភូក្រសួងសាធារណការ និងដឹកជញ្ជូន ចូលរួមកិច្ចប្រជុំកំពូលខ្សែក្រវាត់ និងផ្លូវលើកទី៧ នៅទីក្រុងហុងកុង
ភ្នំពេញ៖ លោក លឹម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំគណៈប្រតិភូ ចូលរួមកិច្ចប្រជុំកំពូលខ្សែក្រវាត់ និងផ្លូវលើកទី៧ នៅទីក្រុងហុងកុង ក្រោមប្រធានបទ៖ “ឆ្ពោះកាន់ទៅទំព័រថ្មីៈ កិច្ចសហប្រតិបត្តិការ និងនវានុវត្តន៍” ដោយមានការចូលរួមពី បណ្តារដ្ឋមន្ត្រី មន្ត្រីជាន់ខ្ពស់ និងបណ្តាក្រុមហ៊ុន វិនិយោគធំៗ ជុំវិញពិភពលោក។កិច្ចប្រជុំកំពូលរយៈពេល ៣ថ្ងៃ ផ្តើមពីថ្ងៃទី១ ដល់ថ្ងៃទី៣ ខែកញ្ញានេះ មានគោលបំណង ស្វែងយល់ចែករំលែក ផ្លាស់ប្តូរយោបល់ និងទស្សនវិស័យ អំពីឱកាសធុរកិច្ច និងវិនិយោគ លើវិស័យជាច្រើន រួមមាន ការពង្រីកកិច្ចសហប្រតិបត្តិការថ្នាក់តំបន់ និងអន្តរជាតិ លើផ្នែកពាណិជ្ជកម្ម វិនិយោគ ហេដ្ឋារចនាសម្ព័ន្ធ ដោយជំរុញបណ្តាញទំនាក់ទំនង ផ្គូរផ្គងធុរកិច្ច និងការបង្កើតភាពជាដៃគូ។
ថ្លែងទៅកាន់កិច្ចប្រជុំកំពូល នាឱកាសនោះ លោករដ្ឋលេខាធិការ បានលើកឡើងថាៈ គំនិតផ្តួចផ្តើមខ្សែក្រវាត់ និងផ្លូវ គឺជាកាតាលីករថ្មី សម្រាប់ការរីកចម្រើន សេដ្ឋកិច្ចរបស់ ពិភពលោក និងជាវេទិកា សម្រាប់កិច្ចសហប្រតិបត្តិការពិភពលោក លើវិស័យជាច្រើន រួមមាន ហេដ្ឋារចនាសម្ព័ន្ធ ពាណិជ្ជកម្ម និង វិនិយោគ។
លោកបានគូសបញ្ជាក់ផងដែរថាៈ កម្ពុជាបានទទួលផលប្រយោជន៍យ៉ាងច្រើន ពីគំនិតផ្តួចផ្តើមនេះ ក្នុងការអភិវឌ្ឍហេដ្ឋារចនាសម្ព័ន្ធ ទាំងផ្នែកទន់ និងផ្នែករឹង ព្រមទាំងជំរុញការតភ្ជាប់ក្នុងប្រទេស និងក្នុងតំបន់ ដើម្បីបង្កើនប្រសិទ្ធភាព ការដឹកជញ្ជូន និងធ្វើឱ្យប្រសើរឡើង នូវវិស័យភស្តុភារកម្មរបស់កម្ពុជា។ ក្រៅពី ការជំរុញការតភ្ជាប់ សង្គម វប្បធម៌ និងធ្វើឱ្យមានកំណើនសេដ្ឋកិច្ច លោកបានបន្ថែមថាៈ គំនិតផ្តួចផ្តើមខាងលើ ក៏បានជួយកម្ពុជា ក្នុងការពន្លឿនការធ្វើសមា ហរណកម្មសេដ្ឋកិច្ចជាតិ ទៅក្នុងតំបន់ផងដែរ។
លោករដ្ឋលេខាធិការ ក៏បានដកស្រង់ប្រសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានលើកឡើងថាៈ “ ទីណាមានផ្លូវ ទីនោះមានសង្ឃឹម ” ដូចគ្នាទៅនឹងសុភាសិតមួយឃ្លារបស់ចិន ដែលនិយាយថា “ ប្រសិនបើចង់មានបាន ត្រូវធ្វើផ្លូវមុន ”។
បន្ថែមពីលើនេះ លោករដ្ឋលេខាធិការ បានថ្លែងអំណរគុណយ៉ាងជ្រាលជ្រៅ ដល់មហាមិត្តចិន ដែលបានចូលរួមចំណែកយ៉ាងខ្លាំង ក្នុងការអភិវឌ្ឍសេដ្ឋកិច្ច និងសង្គមរបស់កម្ពុជា តាំងពីដើមរហូតមក។
សូមជម្រាបថា គំនិតផ្តួចផ្តើមខ្សែក្រវាត់ និងផ្លូវ ត្រូវបានបង្កើតឡើង នៅក្នុងឆ្នាំ២០១៣ ដោយលោកប្រធានាធិបតីចិន ស៊ី ជីនពីង ផ្តោតសំខាន់ទៅលើការកសាងហេដ្ឋារចនាសម្ព័ន្ធ សម្រាប់ការដឹកជញ្ជូនតាមផ្លូវគោក និងផ្លូវទឹក សម្រាប់ពង្រីកកិច្ចសហប្រតិបត្តិការអន្តរជាតិ តាមរយៈការជំរុញការវិនិយោគ និងការធ្វើពាណិជ្ជកម្មអន្តរជាតិ៕
