កិច្ចប្រជុំពិភាក្សាការពារគម្រោងថវិកាកម្រិតថ្នាក់ដឹកនាំលើគម្រោងផែនការចំណូល-ចំណាយថវិកាឆ្នាំ ២០២៣ ជាមួយថ្នាក់ដឹកនាំរបស់ក្រសួងសេដ្ឋកិច្ច និងហិរញ្ញវត្ថុ ភ្នំពេញ៖ ថ្ងៃពុធ ៥កើត ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣១ ខែសីហា ឆ្នាំ ២០២២ ឯកឧត្ដម សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួងចូលរួមកិច្ចប្រជុំពិភាក្សាការពារគម្រោងថវិកាកម្រិតថ្នាក់ដឹកនាំលើគម្រោងផែនការ ចំណូល-ចំណាយថវិកាឆ្នាំ២០២៣ ជាមួយថ្នាក់ដឹកនាំរបស់ក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមដោយផ្ទាល់ពីឯកឧត្តមអគ្គនាយកនៃអគ្គនាយកដ្ឋានជំនាញ និងអង្គភាពដែលជាសមាសភាពអង្គភាពថវិកាស្ថិតក្រោមឱវាទក្រសួង ព្រមទាំងតំណាងមន្ទីរសាធារណការ និងដឹកជញ្ជូន និងក្រុមការងារជំនាញរបស់ក្រសួងសេដ្ឋកិច្ច និងហិរញ្ញវត្ថុផងដែរ។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីពិនិត្យពិភាក្សាលើគម្រោងចំណូល-ចំណាយថវិកាសម្រាប់ឆ្នាំ២០២៣ និងការពិភាក្សាលើផែនការយុទ្ធសាស្រ្តថវិកាឆ្នាំ២០២៣-២០២៥ របស់ក្រសួងសាធារណការ និងដឹកជញ្ជូន សម្រាប់ត្រៀមអនុវត្តការគ្រប់គ្រង និងប្រមូលចំណូល ការសម្របសម្រួល និងអនុវត្តចំណាយ និងការប្រើប្រាស់ថវិកាជាតិប្រកបដោយប្រសិទ្ធភាព និងតម្លាភាព ព្រមទាំងការចូលរួមសន្សំសំចៃថវិកាបានមួយកម្រិតបន្ថែមទៀតក្រោយវិបត្តិកូវីដ-១៩ ដែលបាន និងកំពុងវិវត្តន៍ទៅរកស្ថានភាពល្អ ប្រសើរឡើងវិញ៕