បេក្ខជនជ័យលាភីអាហារូបករណ៍កម្មវិធីអភិវឌ្ឍន៍ធនធានមនុស្សរបស់ប្រទេសជប៉ុន JDS 2021ចំនួន ២៤រូប ថ្នាក់បរិញ្ញាបត្រជាន់ខ្ពស់ បានទទួលអនុសាសន៍សំខាន់ៗពីឯកឧត្ដមរដ្ឋលេខាធិការ ប៉ាល់ ចន្ទតារា តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល មុនពេលចេញដំណើរទៅបន្តការសិក្សានៅប្រទេសជប៉ុន ថ្ងៃចន្ទ ៤កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០១ ខែសីហា ឆ្នាំ២០២២ នៅទីស្តីការក្រសួង ឯកឧត្ដម ប៉ាល់ ចន្ទតារា រដ្ឋលេខាធិការនៃក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្ដមទេសរដ្ឋមន្ត្រី ស៊ុន ចាន់ថុល បានទទួលជួបសំណេះសំណាល និងផ្ដល់អនុសាសន៍ដ៏ខ្ពង់ខ្ពស់ជូនដល់បេក្ខជនជ័យលាភីអាហារូបករណ៍កម្មវិធីអភិវឌ្ឍន៍ធនធានមនុស្សក្រោមជំនួយឥតសំណងរបស់រដ្ឋាភិបាលជប៉ុនJDS 2021 ចំនួន២៤រូប ថ្នាក់បរិញ្ញាបត្រជាន់ខ្ពស់ ដោយមានការចូលរួមពីថ្នាក់ដឹកនាំក្រសួងផងដែរ។ ជំនួបនេះ ធ្វើឡើងដើម្បីផ្ដល់អនុសាសន៍ ចំណេះដឹង បទពិសោធន៍ល្អៗ ក៏ដូចជាបង្ហាញនូវគោលនយោបាយ និងចក្ខុវិស័យរបស់ក្រសួង ដែលជាទស្សនទានដ៏មានតម្លៃបំផុតសម្រាប់បេក្ខជន ក្នុងការយកទៅផ្សព្វផ្សាយវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានដឹងបានយល់ និងមកទស្សនាកម្ពុជា ដើម្បីស្វែងរកកាលានុវត្តភាពក្នុងការវិនិយោគផងដែរ។ ឯកឧត្តមរដ្ឋលេខាធិការ បានជម្រាបជូនបេក្ខជនជ័យលាភីអំពីការខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដឹកនាំប្រទេសតាំងពីបាតដៃទទេ គ្មានទីផ្សារ គ្មានរូបិយប័ណ្ណជាតិ គ្មានបញ្ញវន្តក្រោយរបបប៉ុលពត នាំមកនូវសុខសន្តិភាព ការបង្រួបបង្រួបជាតិ ក្រោមដំបូលរដ្ឋធម្មនុញ្ញតែមួយ ជាពិសេសនយោបាយឈ្នះ-ឈ្នះជាប្រវត្តិសាស្ត្រ និងស្ថិរភាពនយោបាយពេញលេញនៅទូទាំងផ្ទៃប្រទេសចាប់តាំងពីឆ្នាំ១៩៩៨ ធ្វើឱ្យប្រទេសជាតិមានការរីកចម្រើនយ៉ាងឆាប់រហ័សហួសពីការស្មាន និងនាំមកនូវកិត្យានុភាពជាតិឡើងវិញលើឆាកអន្តរជាតិ ស្មើមុខស្មើមាត់នៅក្នុងតំបន់អាស៊ី ក៏ដូចជាពិភពលោកផងដែរ។ ឯកឧត្តមរដ្ឋលេខាធិការ បានជំរុញលើកទឹកចិត្តឱ្យបេក្ខជនបេក្ខនារីដែលជាជ័យលាភីទាំងអស់ប្តេជ្ញាចិត្ត ខិតខំប្រឹងប្រែងរៀនសូត្រឱ្យបានខ្លាំងក្លាតាមអនុសាសន៍ណែនាំឯកឧត្ដមទេសរដ្ឋមន្ត្រី ស៊ុន ចាន់ថុល ដើម្បីក្រេបយកចំណេះដឹង បទពិសោធន៍និងការអនុវត្តល្អៗ និងការរីកចម្រើនរបស់ប្រទេសគេ ទុកជាគំនិត ចូលរួមចំណែកក្នុងការអភិវឌ្ឍសង្គមជាតិយើងឱ្យកាន់តែមានការរីកចម្រើន និងបានបញ្ជាក់បន្ថែមថា៖ ត្រូវរក្សាអរិយធម៌ ប្រពៃណីជាតិ អាកប្បកិរិយាល្អ មានសាមគ្គីភាពរវាងនិស្សិតដែលទៅសិក្សារួមគ្នា និងប្រជាពលរដ្ឋខ្មែរដែលរស់នៅប្រទេសជប៉ុន អនុវត្តឱ្យបានតាមច្បាប់ទម្លាប់ និងគោរពវិន័យរបស់សាលាឱ្យបានម៉ឺងម៉ាត់។ ឯកឧត្តមរដ្ឋលេខាធិការ ក៏បានផ្តាំផ្ញើផងដែរសុំឱ្យបេក្ខជនជ័យលាភីទាំងអស់ថែរក្សាសុខភាពឱ្យបានល្អ បន្តប្រុងប្រយ័ត្នឱ្យបានខ្ជាប់ខ្ជួនចំពោះជំងឺឆ្លងកូវីដ-១៩ រួបរួមសហការគ្នាចេះជួយគ្នាទៅវិញទៅមក ជាពិសេសធ្វើខ្លួនជាឯកអគ្គរដ្ឋទូតសុច្ឆន្ទៈសម្រាប់ប្រទេសកម្ពុជា ដើម្បីជួយផ្សព្វផ្សាយអំពីការដឹកនាំដ៏ត្រឹមត្រូវរបស់សម្ដេចតេជោនាយករដ្ឋមន្ត្រី ក៏ដូចជាព័ត៌មានពិតអំពីការរីកចម្រើនរបស់ប្រទេសកម្ពុជាឱ្យពិភពលោកបានដឹងផងដែរ។ សូមជម្រាបជូនថា៖ អាហារូបករណ៍កម្មវិធីអភិវឌ្ឍន៍ធនធានមនុស្សរបស់ប្រទេសជប៉ុន មានគោលបំណង ចូលរួមចំណែកពង្រឹង និងពង្រីកចំណងមិត្តភាពរវាងប្រទេសទាំងពីរជប៉ុន-កម្ពុជា តាមរយៈការផ្ដល់អាហា រូបករណ៍ជូននិស្សិតកម្ពុជា ដែលផ្ដោតជាសំខាន់លើមន្ត្រីឆ្នើមវ័យក្មេង ដែលមានសមត្ថភាព និងស្មារតី ទទួលខុសត្រូវខ្ពស់ក្នុងការចូលរួមអភិវឌ្ឍប្រទេសជាតិឱ្យមានការរីកចម្រើនឡើងនាពេលអនាគត។ បេក្ខជនជ័យលាភីអាហារូបករណ៍កម្មវិធីអភិវឌ្ឍន៍ធនធានមនុស្សរបស់ប្រទេសជប៉ុន JDS 2021 នេះ មានចំនួន២៤រូប ក្នុងស្រី៨រូប ជាមន្ត្រីរាជការមកពីក្រសួងស្ថាប័នពាក់ព័ន្ធនានាចំនួន១២ ត្រូវបានជ្រើសរើសឱ្យបន្តការសិក្សាថ្នាក់បរិញ្ញាបត្រជាន់ខ្ពស់នៅប្រទេសជប៉ុន ដែលនឹងចេញដំណើរទៅបន្តការសិក្សានៅថ្ងៃទី២១ ខែសីហា ឆ្នាំ២០២២ខាងមុខនេះ លើជំនាញមួយចំនួនរួមមាន៖ ការអភិវឌ្ឍហេដ្ឋារចនាសម្ព័ន្ធ ការអភិវឌ្ឍវិស័យឯកជន ការលើកកម្ពស់ធនធានអប់រំ កសិកម្ម និងអភិវឌ្ឍន៍ជនបទ ការធ្វើឱ្យប្រសើរឡើងនូវបរិស្ថានទីក្រុង ការលើកកម្ពស់ប្រព័ន្ធថែទាំសុខភាព និងធានារ៉ាប់រងសង្គម ការពង្រឹងរដ្ឋបាលសាធារណៈ និងការកសាងទំនាក់ទំនងអន្តរជាតិ៕