[Rasmei Kampuchea Daily News] - ពលរដ្ឋក្រុងដូនកែវ សំណូមពរឱ្យអាជ្ញាធរខេត្ត ជួយជួសជុលផ្លូវ ដែលរងការខូចខាត
តាកែវ៖ ថ្មីៗនេះ ប្រជាពលរដ្ឋ រស់នៅក្រុងដូនកែវ បានរិះគន់ថា ស្ថានភាពផ្លូវនៅក្នុងក្រុង ចាប់ផ្តើមខូចច្រើនកន្លែង បង្កើតជាជង្ហុកធំៗ និងតាមកន្លែងមួយចំនួន ក្លាយជាជង្ហុកសំបុកមាន់ផងដែរ ដោយមិនទាន់មានការជួសជុល និងកែលម្អឡើងវិញនោះទេ ដែលជាហេតុធ្វើឱ្យកើតគ្រោះថ្នាក់ចរាចរណ៍ ជាយថាហេតុ ញឹកញាប់ បណ្តាលមកពីកត្តា ផ្លូវថ្នល់បែបនេះ។
បងប្អូនប្រជាពលរដ្ឋ រស់នៅក្នុងក្រុងដូនកែវ ក៏ដូចជាប្រជាពលរដ្ឋ ដែលធ្វើដំណើរឆ្លងកាត់ ផ្លូវខ្នងទំនប់បឹងតាកែវ តភ្ជាប់ជាមួយនិងនិងផ្លូវខេត្ត ជាប់សួនច្បារមាត់បឹងតាកែវ បានសំណូមពរ ដល់លោកអភិបាលខេត្តតាកែវ ជួយជួសជុលផ្លូវក្នុងក្រុងដូនកែវ ដើម្បីសម្រួលដល់ ការធ្វើដំណើរ និងបញ្ចៀសគ្រោះថ្នាក់ចរាចរណ៍ ខណៈដែល ផ្លូវមួយចំនួន បាននិងកំពុងក្លាយទៅជាកន្លែងបង្ករគ្រោះថ្នាក់ចរាចរណ៍ ដល់បងប្អូនប្រជាពលរដ្ឋ នៅពេលធ្វើដំណើរ ជាពិសេស ផ្លូវនៅទល់មុខស្ថានីយ៍ទឹកស្អាត ក្រុងដូនកែវតែម្តង ដែលជាផ្លូវដែលមានបងប្អូនប្រជាពលរដ្ឋ ធ្វើដំណើរឆ្លងកាត់ច្រើន ជាពិសេសជាផ្លូវ ដែលស្ថិតនៅជាប់នឹងសួនច្បារ ដ៏ស្រស់ស្អាតថែមទៀត ។
សូមបញ្ជាក់ផងដែរថា ចំពោះផ្លូវដែលខូចខាងលើនេះ មន្ទីរសាធារណការ និងដឹកជញ្ជូន ខេត្តតាកែវ បានអះអាងថា ផ្លូវក្នុងខេត្តមួយចំនួន មិនបានស្ថិតនៅក្រោមការគ្រប់គ្រង របស់មន្ទីរនោះទេ ទើបគ្មានការជួសជុល និងថែទាំ តែវាជាផ្លូវដែលគ្រប់គ្រងដោយខេត្ត តែដោយមានការផ្ដល់មតិ សំណូមពរ នៅក្នុង App របស់ក្រសួងសាធារណការ ទើបឃើញខាងមន្ទីរ ចុះមកជួសជុល ដោយគ្រាន់តែយកថ្មម៉ិច មកចាក់ពីលើជង្ហុក និងកិនបង្ហាប់ តែមិនទាន់បានប៉ុន្មានផង ផ្លូវដែលជួសជុលទាំងនោះ ត្រូវបានខូចខាតឡើងវិញ ពិបាកក្នុងការធ្វើដំណើរ និងកើតមានគ្រោះថ្នាក់ ជាញឹកញយ នៅលើផ្លូវខាងលើ ។
បងប្អូនប្រជាពលរដ្ឋ សង្ឃឹមយ៉ាងមុតមាំថា លោក អ៊ូច ភា អភិបាលខេត្តតាកែវ នឹងជួយអន្តរាគមន៍ ក្នុងជំរុញការកែលម្អរាល់ចំណុចខ្វះខាតដែលមាន តាមសំណូមពរពី បងប្អូនប្រជាពលរដ្ឋ ដើម្បីអភិវឌ្ឍន៍ហេដ្ឋារចនាសម្ព័ន ក្នុងខេត្តតាកែវ ឱ្យកាន់តែមានភាពល្អស្អាត និងមានសក្តានុពល ក្នុងការទាក់ទាញភ្ញៀវទេសចរជាតិ និងអន្តរជាតិ ចូលមកលេងកម្សាន្តនៅក្នុងខេត្ត ៕
