កិច្ចប្រជុំពិភាក្សាស្តីពីគម្រោងពង្រីកកំណាត់ផ្លូវជាតិលេខ៦ ចាប់ពីចំណុចប្រសព្វរវាងផ្លូវជាតិលេខ៦ ជាមួយនឹងផ្លូវចូលព្រលានយន្តហោះថ្មីខេត្តសៀមរាបទៅក្រុងសៀមរាប ដឹកនាំដោយឯកឧត្តមរដ្ឋលេខាធិការ លឹម ស៊ីដេនីន ថ្ងៃសុក្រ ១០កើត ខែអាសាឍ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០៨ ខែកក្កដា ឆ្នាំ២០២២ នៅទីស្តីការក្រសួង ឯកឧត្តម លឹម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន បាន អញ្ជើញដឹកនាំកិច្ចប្រជុំក្រុមការងារបច្ចេកទេស ស្តីពីគម្រោងពង្រីកកំណាត់ផ្លូវជាតិលេខ៦ ចាប់ពីចំណុចប្រសព្វរវាងផ្លូវជាតិលេខ៦ ជាមួយនឹងផ្លូវចូលព្រលានយន្តហោះថ្មីខេត្តសៀមរាបទៅក្រុងសៀមរាប ដោយ មានការអញ្ជើញចូលរួមពីថ្នាក់ដឹកនាំក្រសួងទទួលបន្ទុក តំណាងអគ្គនាយកដ្ឋាន និងអង្គភាពពាក់ព័ន្ធ ក្រោមឱវាទក្រសួង និងមន្ទីរសាធារណការ និងដឹកជញ្ជូនពាក់ព័ន្ធផងដែរ។ កិច្ចប្រជុំនេះមានការចូលរួមធ្វើបទបង្ហាញពីតំណាងក្រុមហ៊ុនសំណង់សៀងហៃ(SCG)ទាក់ទងនឹងរបាយការណ៍សិក្សាសមិទ្ធិលទ្ធភាពដំបូង និងរបាយការណ៍សិក្សាបច្ចេកទេសបឋម ក្នុងគោលបំណងដើម្បីចែករំលែកចំណេះដឹង និងបទពិសោធន៍ល្អៗ ក៏ដូចជាដើម្បីផ្តល់មតិយោបល់ និងធាតុចូលសំខាន់ៗបន្ថែមទៀត សំដៅធ្វើយ៉ាងណាឱ្យការសិក្សាគម្រោងនេះកាន់តែមានភាពប្រសើរឡើងមានលក្ខណៈគ្រប់ជ្រុងជ្រោយ និងអាចដំណើរការបានស្របតាមនីតិវិធី បទដ្ឋានបច្ចេកទេស និងចំណាយថវិកាតិច៕