លោកជំទាវ កុយ សុដានី ប្រធានក្រុមការងារយុវជនគណបក្សក្រសួង អញ្ជើញដឹកនាំកិច្ចប្រជុំប្រចាំខែមិថុនា របស់ក្រុមការងារយុវជនគណបក្សប្រជាជនកម្ពុជាក្រសួងសាធារណការ និងដឹកជញ្ជូន ថ្ងៃចន្ទ ១៣រោច ខែជេស្ឋ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី២៧ ខែមិថុនា ឆ្នាំ២០២២ លោកជំទាវ កុយ សុដានី សមាជិកយុវជនគណបក្សថ្នាក់កណ្ដាល និងជាប្រធានក្រុមការងារយុវជនគណបក្សប្រជាជនកម្ពុជាក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រចាំខែមិថុនា របស់ក្រុមការងារយុវជនគណបក្សក្រសួង ដែលកិច្ចប្រជុំនេះមានការអញ្ជើញចូលរួមពី ឯកឧត្តម លោកជំទាវ លោក លោកស្រី អនុប្រធាន សមាជិកអចិន្ត្រៃយ៍ នៃក្រុមការងារយុវជនគណបក្សក្រសួង សរុបចំនួន ២១រូប។ កិច្ចប្រជុំនេះបានផ្តោតសំខាន់លើការផ្សព្វផ្សាយឯកសារជំនួយស្មារតីចំណុចសំខាន់ៗមួយចំនួននៃសភាពការណ៍ទូទៅក្នុងខែឧសភា និងទិសដៅការងារឃោសនាអប់រំ សម្រាប់ខែមិថុនា ឆ្នាំ២០២២ និងចែករំលែកបទពិសោធន៍នានាដែលពាក់ព័ន្ធនឹងដំណើរការនៃបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ កន្លងទៅដែលក្រុមការងារយុវជនគណបក្សក្រសួង បានចុះជួយនៅតាមមូលដ្ឋាននានា។ ថ្លែងទៅកាន់អង្គប្រជុំនាឱកាសនេះ លោកជំទាវប្រធានក្រុមការងារបានគូសបញ្ជាក់ថា៖ ជ័យជម្នះដ៏ត្រចះត្រចង់របស់គណបក្សនាការបោះឆ្នោតជ្រើសរើសក្រុមប្រឹក្សាឃុំ សង្កាត់ នាពេលកន្លងគឺបានមកពីការលះបង់របស់មន្ត្រីគណបក្សគ្រប់ឋានានុក្រម។ បន្ថែមពីនេះលោកជំទាវ បានលើកទឹកចិត្តដល់ក្រុមការងារឱ្យត្រៀមខ្លួនសម្រាប់យកជ័យជម្នះបន្ដទៀតក្នុងការបោះឆ្នោតជ្រើសតាំងតំណាងរាស្ដ្រ នីតិកាលទី៧ នាឆ្នាំ២០២៣ខាងមុខ និងបានណែនាំដល់គ្រប់គណៈកម្មាធិការគណបក្សមូលដ្ឋាន សាខាបក្សទាំងអស់ដែលជាចំណុះគណៈកម្មាធិការគណបក្សក្រសួង ឱ្យមានរបបប្រជុំជាទៀងទាត់ ដើម្បីក្ដាប់បាននូវបញ្ហាប្រឈម និងរកដំណោះស្រាយបានទាន់ពេលវេលា។ ក្នុងឱកាសនេះផងដែរលោកជំទាវប្រធានក្រុមការងារយុវជនគណបក្សក្រសួង ក៏បានចូលរួមអបអរសាទរខួបអនុស្សាវរីយ៍លើកទី៧១ នៃថ្ងៃបង្កើតគណបក្សប្រជាជនកម្ពុជា (២៨ មិថុនា ១៩៥១-២៨ មិថុនា ២០២២) ដែលក្រោមការដឹកនាំរបស់គណបក្ស ពិសេសការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្ស និងជានាយករដ្ឋមន្ត្រី ប្រទេសជាតិមានសុខសន្ដិភាព ស្ថិរភាពនយោបាយ និងការអភិវឌ្ឍលើគ្រប់វិស័យ ជាពិសេសភាពជោគជ័យក្នុងការប្រយុទ្ធប្រឆាំងជាមួយជំងឺ Covid-19 ដែលប្រទេសកម្ពុជាសម្រេចបានអត្រានៃការចាក់វ៉ាក់សាំងបង្ការជូនប្រជាពលរដ្ឋមានកម្រិតខ្ពស់ជាងគេនៅក្នុងតំបន់អាស៊ាន(ASEAN) ដែលបង្ករលក្ខណៈដល់ការបើកដំណើរការសេដ្ឋកិច្ច និងសង្គមយ៉ាងពេញលេញឡើងវិញ។ លោកជំទាវក៏បានសង្កត់ធ្ងន់ផងដែរថា យុទ្ធនាការចាក់វ៉ាក់សាំងបង្ការនេះគឺបានធ្វើឡើងដោយគ្មានការរើសអើងនិន្នាការនយោបាយ ជាតិសាសន៍នោះឡើយ ដែលធ្វើឱ្យប្រជាពលរដ្ឋមានជំនឿជឿជាក់យ៉ាងពិតប្រាកដមកលើរាជរដ្ឋាភិបាល និងគណបក្សប្រជាជនកម្ពុជា៕