សិក្ខាកាមប្រមាណជាង៦០នាក់ចូលរួមកម្មវិធីផ្សព្វផ្សាយស្តីពី ការៀបចំកម្មវិធីលើកកម្ពស់ការយល់ដឹងជាសាធារណៈរបស់ប្រជាពលរដ្ឋអំពីបណ្តាញលូ ប្រព័ន្ធចម្រោះ និងសេវាកម្មទឹកកខ្វក់នៅថ្នាក់ក្រោមជាតិ“ សៀមរាប៖ ថ្ងៃព្រហស្បតិ៍ ២រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃ១៦ ខែមិថុនា ឆ្នាំ២០២២ ឯកឧត្តម សួន ភារិទ្ធ អគ្គនាយកនៃ អគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយសៀវភៅណែនាំស្តីពី “ការរៀបចំកម្មវិធីលើកកម្ពស់ការយល់ដឹងជាសាធារណៈរបស់ប្រជាពលរដ្ឋអំពីបណា្តញលូ ប្រព័ន្ធច្រម្រោះ និងសេវាកម្មទឹកកខ្វក់ថ្នាក់ក្រោមជាតិ” ក្នុងក្រុងសៀមរាប ដោយមានការអញ្ជើញចូលរួមពីឯកឧត្តម ពិន ប្រាកដ អភិបាលរងខេត្តសៀមរាប លោក សុខ វណ្ណា ប្រធានកម្មវិធីអង្គការសហប្រជាជាតិសម្រាប់លំនៅឋានមនុស្សជាតិ (UN-Habitat) អាជ្ញាធរសមត្ថកិច្ចគ្រប់ផ្នែកពាក់ព័ន្ធ សរុបប្រមាណជាង៦០នាក់។ ក្រោមកិច្ចសហការរវាង អគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន និងកម្មវិធីអង្គការសហប្រជាជាតិសម្រាប់លំនៅ ឋានមនុស្សជាតិ (UN-Habitat) បានរៀបចំសិក្ខាសាលានេះឡើងក្នុងគោលបំណង លើកកម្ពស់ការយល់ដឹងអំពីតម្រូវការ គុណប្រយោជន៍ ភាពចាំបាច់នៃប្រព័ន្ធចម្រោះទឹកកខ្វក់ និងជួយឱ្យពលរដ្ឋមានការចូលរួមថែរក្សាបណ្តាញលូ និងទឹកកខ្វក់សម្រាប់ជាការងារងាយស្រួលក្នុងការ គ្រប់គ្រងប្រព័ន្ធចម្រោះទឹកកខ្វក់ប្រកបដោយនិរន្តភាព និងជួយជំរុញឱ្យមានការផ្សព្វផ្សាយបន្តពីសារៈសំខាន់អត្ថន័យ មានចងក្រងក្នុង សៀវភៅទៅ កាន់បងប្អូនប្រជាពលរដ្ឋទទួលបានព័ត៌មានទូលំទូលាយក៏ដូចបានយល់ដឹងកាន់តែច្បាស់ផងដែរ។ ឯកឧត្តមអគ្គនាយក បានលើកឡើងថា ដោយសារកម្ពុជាបច្ចុប្បន្នមានសន្តិភាព ទើបធ្វើឱ្យយើងមានការរីកចម្រើនផ្នែកសេដ្ឋកិច្ចក្នុងរយៈពេល ពីរទសវត្សរ៍ចុងក្រោយនេះ។ ទន្ទឹមនឹងសន្ទុះនៃការអភិវឌ្ឍនៅក្នុងខេត្តសៀមរាប បញ្ហាទឹកកខ្វក់ដែលបង្កពីសកម្មភាពផ្សេងៗ បានហូរចូលទៅក្នុងតំបន់លំនៅដ្ឋានរបស់បងប្អូនប្រជាពលរដ្ឋ និងសហគមន៍ បង្កផលប៉ះពាល់ដល់សុខុមាលភាពប្រជាជន សោភ័ណភាព ជីវៈចម្រុះ ប្រព័ន្ធអេកូឡូស៊ី និងជះឥទ្ធិពលដល់សេដ្ឋកិច្ចជាតិ ហើយត្រូវបានរាជរដ្ឋាភិបាលកម្ពុជា កំពុងយកចិត្តទុកដាក់ជាចម្បង។ ហេតុដូចនេះ ហេដ្ឋារចនាសម្ព័ន្ធសាធារណៈជាច្រើនពិសេស បណ្តាញលូទឹកភ្លៀង បណ្តាញលូទឹកកខ្វក់ ស្ថានីយ៍ប្រព្រឹត្តកម្មទឹកកខ្វក់ ទីលានចាក់សំណល់ភក់ ត្រូវបានសាង់សង់ និងកំពុងសាងសង់នៅតាមបណ្តារាជធានី និងក្រុងសំខាន់ៗ រួមទាំងក្រុងសៀមរាប ខេត្តសៀមរាបផងដែរ។ ឯកឧត្តម ក៏បានលើកឡើងបន្ថែមទៀតថា ដើម្បីឱ្យសមិទ្ធផលអាចប្រើប្រាស់បានយូអង្វែង សូមឱ្យមានការចូលរួមពីប្រជាពលរដ្ឋ និងគ្រប់ភាគីពាក់ព័ន្ធដើម្បីប្រែក្លាយក្រុងសៀមរាបទៅជាទីក្រុងដ៏ស្រស់ស្អាត មានសោភ័ណភាព អនាម័យស្អាត បរិស្ថានល្អ និងគួរឱ្យចង់រស់នៅ ក៏ដូចជាទាក់ទាញភ្ញៀវទេសចរណ៍ជាតិ និងអន្តរជាតិ តាមរយ:ការលើកកម្ពស់អនាម័យស្អាត និងសុខភាពសាធារណៈ ធ្វើឱ្យសុខមាលភាពរបស់ប្រជាពលរដ្ឋកាន់តែប្រសើរឡើង។ ជាទីបញ្ចប់ ឯកឧត្តមអគ្គនាយក បានថ្លែងអំណរគុណយ៉ាងជ្រាលជ្រៅចំពោះវត្តមានរបស់ ឯកឧត្តម លោក លោកស្រី ដែលជាសិក្ខាកាម និងគ្រប់សមត្ថកិច្ចពាក់ព័ន្ធទាំងអស់ដែលបានអញ្ជើញចូលរួម តាមរយៈកម្មវិធីសិក្ខាសាលាអប់រំផ្សព្វផ្សាយនាពេលនេះ ដែលជាមធ្យោបាយមួយដ៏ល្អ ក្នុងការជំរុញឱ្យមានការចូលរួមខ្ពស់ពីសំណាក់ប្រជាពលរដ្ឋទូទៅក្នុងការប្រើប្រាស់ និងថែរក្សាការពារហេដ្ឋារចនាសម្ព័ន្ធ ដែលបានសាងសង់រួច ប្រកបដោយ ប្រសិទ្ធភាព និងនិរន្តរភាព៕