កណ្ដាល៖ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានក្រុមការងារគណបក្សចុះមូលដ្ឋានស្រុកកោះធំ នៅថ្ងៃព្រហស្បតិ៍ ទី០២ ខែមិថុនា ឆ្នាំ២០២២នេះ បានអញ្ជើញជួបសំណេះសំណាលជាមួយសមាជិកសមាជិកាគណបក្សប្រជាជនកម្ពុជាឃុំសំពៅពូនសរុបប្រមាណ១១២៥នាក់ នៅស្រុកកោះធំ ខេត្តកណ្តាល ដោយមានការចូលរួមពី ឯកឧត្ដមសាស្រ្តាចារ្យ មហាបរិញ្ញា ឈាង រ៉ា អនុប្រធានទី៣ក្រុមការងារគណបក្សចុះមូលដ្ឋានស្រុក ឯកឧត្តម លោកជំទាវ អនុប្រធានក្រុមការងារគណប្សចុះមូលដ្ឋានស្រុក ឯកឧត្ដម ហេង រ័ត្នពិសិដ្ឋ ប្រធាន ក្រុមការងារ គណបក្សចុះមូលដ្ឋានឃុំ ឯកឧត្ដម លោកជំទាវ លោក លោកស្រី ក្រុមការងារគណបក្សចុះ មូលដ្ឋានស្រុក ឃុំ ភូមិឃុំសំពៅពូន គណៈអចិន្ត្រៃយ៍គណបក្សស្រុក និងបេក្ខជនពេញសិទ្ឋិក្រុមប្រឹក្សាឃុំ អាណត្តិទី៥។ នាឱកាសនោះ ឯកឧត្តមទេសរដ្ឋមន្ត្រី បានណែនាំ ឱ្យបេក្ខជនបេក្ខនារីដែលបានឈរឈ្មោះបោះឆ្នោតចេះលើកទឹកដល់មន្ត្រីក្រោមឱវាទ មានការទទួលខុស ត្រូវខ្ពស់ចំពោះការងារ ប៉ុន្តែថ្នាក់ដឹកនាំគួរតែទទួលយកខុសបានហើយ ទុកឱ្យមន្ត្រីក្រោមឱវាទជាអ្នកទទួលយកត្រូវ និងបានរំលឹកឡើងវិញផងដែរនូវអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រីថា៖ មន្ត្រីគឺជាអ្នកបម្រើរាស្ត្រ មិនមែនជាចៅហ្វាយរបស់រាស្ត្រទេ ត្រូវខិតខំប្រឹងប្រែងផ្តល់សេវាសាធារណៈ ឱ្យបានលឿន មានប្រសិទ្ធភាព និងតម្លាភាព។ ឯកឧត្តមទេសរដ្ឋមន្ត្រីបានថ្លែងឲ្យដឹងថា៖ «សំដីឥតប្រយោជន៍ នាំគ្រោះដល់ជាតិ ការងារមានប្រសិទ្ធភាពនាំជាតិរុងរឿង ពោលគឺ៖ ការតិះដៀលគ្នាទៅវិញទៅមកមិននាំ ចំណេញដល់ជាតិទេ ប៉ុន្តែត្រូវធ្វើការឱ្យមានប្រសិទ្ធភាព តម្លាភាព ទើបជាតិយើងអាចរស់នៅក្នុងជីវភាព ល្អប្រសើរ»។ ព្រោះក្នុងន័យនេះ ឯកឧត្តមបានធ្វើកត់សម្គាល់ថា៖ «ក្នុងសង្គមយើងសព្វថ្ងៃនេះមានមនុស្សចំនួនបួន ប្រភេទគឺ៖ អ្នកថា អ្នកធ្វើ អ្នកឈរមើល និងអ្នកទិទៀន ក្នុងចំណោមមនុស្សបួនប្រភេទនេះ ចូរកុំធ្វើខ្លួនជា អ្នកថា និងអ្នកឈរមើល គួរចូលរួមជាមួយរាជរដ្ឋាភិបាល ដើម្បីអភិវឌ្ឍន៍ប្រទេសជាតិយើងឱ្យមានការ រីកចម្រើន»។ ឯកឧត្តមទេសរដ្ឋមន្រ្តីក៏បានអំពាវនាវដល់បងប្អូនសមាជិកសមាជិកាគណបក្ស ប្រជាជនកម្ពុជាក្នុងឃុំសំពៅពូន និងអ្នកគាំទ្រគណបក្សប្រជាជនកម្ពុជាទាំងឡាយក្នុងស្រុកកោះធំ សូមប្រកាន់ខ្ជាប់ និងប្រតិបត្តិឱ្យបានត្រឹមត្រូវនូវក្រមសីលធម៌ទាំងឡាយដែលមានចែងក្នុងបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដើម្បីធានា ឱ្យបរិយាកាសនៅក្នុងដំណើរ ការឃោសនាបោះឆ្នោតថ្ងៃស្ងប់ស្ងាត់ ថ្ងៃបោះឆ្នោត រាប់សន្លឹកឆ្នោត រហូត ដល់ថ្ងៃប្រកាសលទ្ធផលបោះ ឆ្នោត ផ្លូវការប្រព្រឹត្តទៅដោយរលូន និងប្រកបដោយសុខសុវត្ថិភាព។ ឯកឧត្តមទេសរដ្ឋមន្ត្រី បានផ្តាំផ្ញើឱ្យបងប្អូនប្រជាពលរដ្ឋនៅឃុំសំពៅពូនឱ្យទៅចូលរួមបោះឆ្នោតនៅថ្ងៃអាទិត្យទី៥ ខែមិថុនា ឆ្នាំ២០២២ និងបោះឆ្នោតជូនគណបក្សប្រជាជនកម្ពុជា ដែលមាន រូបសញ្ញាទេវតាបាចផ្កា និងមានលេខរៀងទី១នៅលើសន្លឹកឆ្នោតសម្រាប់ឃុំសំពៅពូនឱ្យបានគ្រប់ៗគ្នា ដោយនាំយកទៅជាមួយនូវអត្តសញ្ញាណប័ណ្ណសញ្ជាតិខ្មែរដែលមានសុពលភាព ឬឯកសារបញ្ជាក់អត្តសញ្ញាណបម្រើឱ្យការបោះឆ្នោតផងដែរ។ សូមជម្រាបជូនថា៖ សមិទ្ធផលសម្រេចបានក្នុងឃុំសំពៅពូនរួមមាន៖ សាងសង់ស្ពានបាឡេចំនួន ៦កន្លែងប្រវែង១១៥ ម៉ែត្រ នៅភូមិកោះទៀវ“ខ”២កន្លែង ប្រវែង៣៩ម៉ែត្រ ភូមិកំពង់ថ្កុល១កន្លែងប្រវែង ១៥ម៉ែត្រ នៅភូមិព្រែកសែមមួយកន្លែង២៥ម៉ែត្រ នៅភូមិកប៉ាល់គឿងមាន២កន្លែងប្រវែង៣៦ម៉ែត្រ ធ្វើផ្លូវបេតុង២៦ខ្សែ ប្រវែង១៣.០៧៥ម៉ែត្រ ក្នុងនោះនៅភូមិក្បាលកោះទាវ២ខ្សែ បណ្តោយ១.០១០ម៉ែត្រ នៅភូមិព្រែកគង៣ខ្សែប្រវែង៧៨៤ម៉ែត្រ នៅភូមិកោះទាវ”ក”១ខ្សែ ប្រវែង៤០០ម៉ែត្រ នៅភូមិកោះទាវ “ខ” ចំនួន៤ខ្សែប្រវែង១៤៧០ម៉ែត្រ នៅភូមិព្រែកសែម២ខ្សែប្រវែង១.២៧០ម៉ែត្រ នៅភូមិខ្ពប១ខ្សែប្រវែង ៤០០ ម៉ែត្រ នៅភូមិកំពង់ថ្កុល១ខ្សែប្រវែង១.១០០ម៉ែត្រ នៅភូមិប៉ាល់គឿង៦ខ្សែ ប្រវែង២,៤៤០ម៉ែត្រ នៅភូមិ ព្រែកស៊ឹង១ខ្សែប្រវែង២,៩០០ម៉ែត្រ នៅភូមិជ្រៃធំ១ខ្សែប្រវែង២០០ម៉ែត្រ នៅព្រែកភូមិស្បូវ៤ខ្សែ ប្រវែង ១.១០០ម៉ែត្រ៕