ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះធំ បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការអគារមណ្ឌលសុខភាពឃុំព្រែកជ្រៃ ស្ថិតក្នុងស្រុកកោះធំ ខេត្តកណ្តាល កាលពីថ្ងៃ១កើត ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃអង្គារ ទី៣១ ខែឧសភា ឆ្នាំ២០២២។ ក្នុងឱកាសនោះ ឯកឧត្តមទេសរដ្ឋមន្ត្រីបានមានប្រសាសន៍ថា ក្រុមការងាររាជរដ្ឋាភិបាលចុះជួយស្រុកកោះធំ បានយកចិត្តទុកដាក់លើវិស័យសុខាភិបាល សម្រាប់បងប្អូនប្រជាពល រដ្ឋ និងខិតខំប្រឹងប្រែងស្វែងរកថវិកាមកជួយកសាង ជួសជុលមណ្ឌលសុខភាពនៅឃុំ ព្រែកជ្រៃ និងបានគូសបញ្ជាក់អំពីការ បំពេញការងាររបស់រាជរដ្ឋាភិបាលជូនប្រទេសជាតិ មាតុភូមិ ក្រោមការដឹកនាំដ៏ឈ្លាសវៃរបស់សម្ដេចតេជោនាយករដ្ឋមន្ត្រី ដែលបាននាំមកនូវការបង្រួបបង្រួមជាតិ បង្រួបបង្រួមទឹកដី ក្រោមដំបូលរដ្ឋធម្មនុញ្ញតែមួយ ព្រះមហាក្សត្រតែមួយ និងរាជ រដ្ឋាភិបាលតែមួយ។ ជាមួយគ្នានេះដែរ ឯកឧត្តមទេសរដ្ឋមន្ត្រីបានមានប្រសាសន៍បន្ថែមទៀតថា សុខសន្តិភាព បានអនុញ្ញាតឱ្យរាជរដ្ឋាភិបាលមានឱកាស ទាក់ទាញអ្នកវិនិយោគមកកម្ពុជា បង្កើតការងារជូនបងប្អូនប្រជាពលរដ្ឋ ទាក់ទាញភ្ញៀវទេសចរមកលេងកម្ពុជា និងយកកសិផល ទំនិញផលិតនៅកម្ពុជា ទៅលក់នៅបរទេស ផ្ដល់ឱកាសឱ្យរាជរដ្ឋាភិបាលកសាងផ្លូវ ស្ពាន សាលារៀន មន្ទីពេទ្យ វត្តអារាម ប្រឡាយទឹក និងសម្រេចបានសមិទ្ធផលទាក់ទងនឹងវិស័យសុខាភិបាលជាច្រើនទៀតផងដែរ។ ឯកឧត្តមទេសរដ្ឋមន្ត្រីបានលើកឡើងថា ជីវិតសង្ឃឹមរស់ (Life Expectancy) របស់ប្រជាជនកម្ពុជា កើនឡើងរយៈពេល ១៤ឆ្នាំបន្ថែមទៀត ប្រៀបធៀបទៅនឹងរយៈពេល២០ឆ្នាំកន្លងទៅ ដោយសារកម្ពុជាមានការរីកចម្រើន លើវិស័យហេដ្ឋារចនាសម្ព័ន្ធរូបវន្ត ជាពិសេសមធ្យោបោយ និងផ្លូវធ្វើដំណើរឆ្ពោះទៅកាន់មន្ទីរពេទ្យ ដើម្បីស្វែងរកសេវាថែទាំ និងព្យាបាលសុខភាព រួមជាមួយនឹងបរិស្ថានរស់នៅស្អាត អាហារបរិភោគគ្រប់គ្រាន់ និងទឹកស្អាតជាដើម។ ឯកឧត្តមក៏បានគូសបញ្ជាក់អំពីវឌ្ឍនភាព នៃគម្រោងសាងសង់មន្ទីរពេទ្យតេជោសែនកោះធំ គម្រោងបំពាក់សម្ភារវេជ្ជសាស្ត្រទំនើបៗ ស្របតាមស្តង់ដារអន្តរជាតិ ដូចជា សហរដ្ឋអាមេរិក ជប៉ុន និងកូរ៉េ ។ ដោយបច្ចុប្បន្នមន្ទីរពេទ្យកាល់ម៉ែត្រ កំពុងបណ្ដុះបណ្ដាលក្រុមគ្រូពេទ្យប្រមាណជាង ១០០នាក់ ដើម្បីត្រៀមមកផ្ដល់សេវាព្យាបាល ជូនបងប្អូនប្រជាពលរដ្ឋនៅមន្ទីរ ពេទ្យតេជោសែនកោះធំ ហើយសង្ឃឹមជឿជាក់ថា បងប្អូននៅស្រុកលើកដែក ស្រុកស្អាងនៃខេត្តកណ្តាល ស្រុកព្រៃកប្បាសនៃខេត្តតាកែវ អាចមកទទួលសេវាព្យាបាលជំងឺនៅមន្ទីរពេទ្យនេះផងដែរ។ សូមបញ្ជាក់ថា អគារមណ្ឌលសុខភាពព្រែកជ្រៃ ដែលបានសម្ពោធដាក់ឱ្យប្រើប្រាស់នាពេលនេះ បានកសាងកាលពីខែធ្នូ ឆ្នាំ២០១៩ លើផ្ទៃដីចំនួន៣៦១ម៉ែត្រក្រឡា ទទឹង១៨ម៉ែត្រ បណ្ដោយ២៨ម៉ែត្រ ចំណាយអស់ថវិកាចំនួន៥៩៩ ៩៥៣ ៥០០រៀល ក្នុងនោះរួមមាន៖ ការធ្វើរបងជុំវិញមណ្ឌលសុខភាព ចាក់សាបទីធ្លាខាងក្រោម ធ្វើបន្ទប់ចំនួនពីរនៅខាងក្រោម ជណ្តើរសម្រាប់ជនពិការ ឡដុតសំរាម ជណ្តើរដើរចុះព្រែកសម្រាប់សេវាផ្លូវទឹក និងមានបំពាក់ម៉ាស៊ីនត្រជាក់ចំនួនពីរគ្រឿង។ សមិទ្ធផលទាំងនេះបានធ្វើឱ្យឃុំព្រែកជ្រៃ មានការផ្លាស់ប្តូរមុខមាត់ជាថ្មីម្ដងទៀត៕ ដោយ ទេស ច័ន្ទសុធារី (ប្រភព៖ ក្រសួងសាធារណការ និងដឹកជញ្ជូន) សម្រួលផ្សាយដោយ៖ ធូ កុសល