(ពោធិ៍សាត់)៖ អនុគម្រោង នៅក្នុងក្រុងពោធិ៍សាត់ នៃគម្រោងកែលម្អគ្រប់គ្រងបរិស្ថានក្រុង ជុំវិញបឹងទន្លេសាប រួមមានប្រព័ន្ធលូរំដោះទឹកភ្លៀង ទឹកកខ្វក់ និងអាងប្រព្រឹត្តិកម្មសំណល់រាវ សម្រេចបាន៩០% ដោយឡែកទីលានចាក់សំរាម សម្រេចបាន១០០%។ ជាក់ស្តែងដើម្បីឱ្យគម្រោងនេះឆាប់ទទួលបានជោគជ័យតាមផែនការ នារសៀលថ្ងៃទី១០ ខែឧសភា ឆ្នាំ២០២២នេះ លោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង និងលោក លឹម សុខ តូ អភិបាលរងខេត្ត តំណាងលោក ជាវ តាយ អភិបាលខេត្តពោធិ៍សាត់ បានដឹកនាំកិច្ចប្រជុំ ត្រួតពិនិត្យវឌ្ឍនភាពអនុគម្រោង នៅក្នុងក្រុងពោធិ៍សាត់ នៃគម្រោងកែលម្អគ្រប់គ្រងបរិស្ថានក្រុង ជុំវិញបឹងទន្លេសាប។ កិច្ចប្រជុំនេះ ធ្វើឡើងនៅសាលប្រជុំជាន់ទី១ អគាររដ្ឋបាលខេត្ត ដោយមានការអញ្ជើញចូលរួមពីក្រុមការងារក្រសួងសាធារណការ និងដឹកជញ្ជូន ប្រតិភូធនាគារ អភិវឌ្ឍន៍ អាស៊ី (ADB) នាយករដ្ឋបាលសាលាខេត្ត គណៈអភិបាលក្រុង និងថ្នាក់ដឹកនាំមន្ទីរពាក់ព័ន្ធជាច្រើននាក់ទៀត។ សូមជម្រាបជូនថា ផ្អែកតាមរបាយការណ៍ របស់រដ្ឋបាលក្រុងពោធិ៍សាត់ បានឱ្យដឹងថា៖ គម្រោងកែលម្អគ្រប់គ្រងបរិស្ថានក្រុងជុំវិញបីងទន្លេសាប ក្នុងភូមិសាស្ត្រក្រុងពោធិ៍សាត់ បានចាប់ផ្តើមការដ្ឋានអនុវត្តគម្រោង ចាប់តាំងពីដើមឆ្នាំ២០២០ រហូតមកទល់បច្ចុប្បន្ននេះ សម្រេចបាននូវវឌ្ឍនភាពគម្រោងដូចខាងក្រោម៖ ទី១៖ អនុគម្រោងប្រព័ន្ធលូរំដោះទឹកភ្លៀង ទឹកកខ្វក់ និងអាងប្រព្រឹត្តិកម្មសំណល់រាវ៖ *ការជីកដាក់លូរំដោះទឹកភ្លៀង និងទឹកស្ទួយ (ល្អរួម) ប្រវែង២៤.៨១០ម៉ែត្រ សម្រេចបាន១០០% *ការងារដាក់រឺហ្គា ទាំងលើទ្រូងផ្លូវ និងចិញ្ចើមផ្លូវ ចំនួន២.០៧៣គ្រាប់ សម្រេចបាន១០០% *ការស្តាបណ្តាញលូចាស់ និងជួសជុលរឺហ្គាចាស់ ប្រវែង២៧.១៩០ម៉ែត្រ សម្រេចបាន៦០% *ការស្តាប្រឡាយរំដោះទឹកចេញពីអាងប្រព្រឹត្តិកម្ម ប្រវែង២.៨០០ម៉ែត្រ, ការងារសាងសង់លូ១៧កន្លែង រួមទាំងការក្រាលកៅស៊ូ DBST លើខ្នងប្រឡាយ ប្រវែង២.៣៤០ម៉ែត្រ សម្រេចបាន៩៨% *ការសាងសង់អាងប្រព្រឹត្តិកម្មសំណល់រាវ លើផ្ទៃដី៣ហិកតា សម្រេចបាន៩៣% *ការក្រាលកៅស៊ូផ្លូវ ប្រភេទ DBST ឡើងវិញ ប្រវែង២០.០៧១ម៉ែត្រ សម្រេចបាន១០០% *ការចាក់បេតុងផ្លូវ ប្រវែង២.៣៥៤ម៉ែត្រ សម្រេចបាន ១០០% *ការសាងសង់ទំនប់ការពារទឹកជំនន់ នៅភូមិកោះ សង្កាត់លលកស ប្រវែង១.៥០០ម៉ែត្រ រួមទាំងការក្រាលក្រសក្រហមលើទំនប់ សម្រេចបាន១០០% *ការធ្វើចង្ឃទឹកជុំវិញតំបន់ផ្សារថ្មី កំពុងដំណើរការ ដោយសម្រេចបានប្រមាណ ៩០% *ការងាររៀប Curb (របាំងការពារដី) សងខាងផ្លូវ ប្រវែង១៥.៤២៧ម៉ែត្រ កំពុងពិភាក្សាជាមួយរដ្ឋបាលក្រុង លើទីតាំងដែលត្រូវសាងសង់ជាក់ស្តែង។ ទី២៖ អនុគម្រោងទីលានចាក់សំរាម ចាប់ផ្តើមអនុវត្តនៅខែមេសា ឆ្នាំ២០២០ មកទល់ពេលនេះ សម្រេចការងារសាងសង់បាន១០០% ដោយមានសមិទ្ធផលមួយចំនួនដូចខាងក្រោម៖ *ផ្លូវចូលទៅទីលាន ប្រវែង១.៥០០ម៉ែត្រ ជាប្រភេទ DBST *ការងារសាងសង់ក្នុងទីលានរួមមាន ការចាក់បំពេញដីក្នុងទីលាន, ផ្លូវក្នុងទីលានជាប្រភេទ AC ប្រវែង៨៥០ម៉ែត្រ, របងព័ទ្ធជុំវិញ ប្រវែង១.៥៨៩ម៉ែត្រ, រណ្តៅទុកដាក់សំរាមទី០១ និងទី០២, អគាររដ្ឋបាល, ឃ្លាំងសម្រាប់ហាលភក់, អាងចំរោះទឹករងៃ, ដាំកូនឈើ៣៨៧ដើម, សង់បង្គោលភ្លើងសូឡា ២៣ដើម, ស្របំ លែងក្លិន, អាងចំរោះទឹកដែលហូរពីស្របំលែង, ជញ្ជីងថ្លឹងរថយន្ត, អគារដាក់ម៉ាស៊ីនភ្លើង, អគារម៉ាស៊ីនបូមទឹក, អណ្តូងទឹកប្រើប្រាស់ ១កន្លែង, និងអណ្តូងទឹកសម្រាប់ត្រួតពិនិត្យគុណភាពទឹក ២កន្លែង។ ក្នុងដំណើរការអនុវត្តគម្រោង ក្រុមការងារអនុវត្តគម្រោង (PIU) បានពិនិត្យឃើញបញ្ហាខ្លះៗ ក្នុងដំណើរការសាងសង់ រួមមាន៖ *រឺហ្គាសម្រាប់ទទួលទឹក តាមសងខាងផ្លូវមួយចំនួន នៅស្មើ ឬខ្ពស់ជាងផ្លូវ ដែលពិបាកឱ្យទឹកហូរចូល *នៅទីតាំងមួយចំនួន មានទឹកដក់នៅចន្លោះរវាង រឺហ្កាមួយ ទៅរឹហ្គាមួយ តាមជើងទេរថ្នល់ *ក្បាលរឹហ្កាមួយចំនួន លិចបាត់ រឺស្រែតទាបពេក ដែលត្រូវធ្វើការកែតម្រូវ *ផ្លូវដែលបានក្រាលកៅស៊ូហើយមួយចំនួន មានការស្រុតខ្លះៗ ចំពោះបញ្ហាដែលបានលើកឡើងខាងលើនេះ ក្រុមការងារអនុវត្តគម្រោង បានជូនដំណឹង និងក្រើនរំលឹក ជាប្រចាំឱ្យក្រុមហ៊ុនធ្វើការកែតម្រូវ និងជួសជុលឡើងវិញ ឱ្យសមស្របតាមលក្ខណៈបច្ចេកទេសរបស់គម្រោង។ ទន្ទឹមនេះដែរ ផ្លូវមួយចំនួនតូច ដែលមានការខូចខាតកៅស៊ូ តែមិនឋិតក្នុងគម្រោងដែលត្រូវជីកកប់លូ មិនត្រូវបាន បញ្ចូលទៅក្នុងគម្រោងដើម្បីក្រាលកៅស៊ូឡើងវិញទេ ធ្វើឱ្យផ្លូវនោះឋិតក្នុងសភាពចាស់ដដែល។ ចំពោះបញ្ហានេះ រដ្ឋបាលក្រុងបានកំពុងសំណូមពរឱ្យក្រុមហ៊ុនជួយជួសជុលឡើងវិញផងដែរ៕