ឯកឧត្តម ឈួន វិន រដ្ឋលេខាធិការ និង លោកជំទាវ កុយ សុដានី រដ្ឋលេខាធិការ អញ្ជើញដឹកនាំកិច្ចប្រជុំត្រួតពិនិត្យអំពីវឌ្ឍនភាពនៃការរៀបចំដំណើរកម្សាន្តរបស់យុវជនក្រសួងសាធារណការ និងដឹកជញ្ជូនទៅកាន់ខេត្តព្រះសីហនុ នារសៀលថ្ងៃអង្គារ ៣រោច ខែចេត្រ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី១៩ ខែមេសា ឆ្នាំ២០២២ នៅទីស្តីការក្រសួង៖ ឯកឧត្តម ឈួន វិន រដ្ឋលេខាធិការ និង លោកជំទាវ កុយ សុដានី រដ្ឋលេខាធិការ បានអញ្ជើញដឹកនាំកិច្ចប្រជុំត្រួតពិនិត្យអំពីវឌ្ឍនភាពនៃការរៀបចំដំណើរកម្សាន្តរបស់យុវជនក្រសួងសាធារណការ និងដឹកជញ្ជូនទៅកាន់ខេត្តព្រះសីហនុ ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី ដែលទទួលបន្ទុកសម្របសម្រួលការងារតាមផ្នែកនីមួយៗ សរុបចំនួន ១៣រូប។ អង្គប្រជុំបានធ្វើការត្រួតពិនិត្យឡើងវិញនូវវឌ្ឍនភាពការងារ ដែលរាយការណ៍ដោយឯកឧត្តម លោកជំទាវ លោក លោកស្រី ដែលទទួលបន្ទុកការងារនីមួយៗនៅក្នុងពេលដំណើរកម្សាន្ត។ ក្រៅពីនេះអង្គប្រជុំទាំងមូលក៏បានពិភាក្សា និងកំណត់យ៉ាងលម្អិតនូវកម្មវិធីដំណើរកម្សាន្តដែលមាន ចាប់ពីពេលដែលចេញដំណើរ រហូតដល់ពេលត្រឡប់មករាជធានីភ្នំពេញវិញ។ បន្ថែមពីលើនេះ អង្គប្រជុំក៏បានកំណត់រៀបចំឱ្យមានការលេងកម្សាន្តល្បែងប្រជាប្រិយខ្មែរ ការឡើងភ្នំមើលផ្ទាំងថ្ម ការលេងបាល់លើឆ្នេរខ្សាច់។ នៅក្នុងកម្មវិធីនោះ និងមានការចូលទស្សនកិច្ច ការដ្ឋានសាងសង់ផ្លូវល្បឿនលឿន ទីតាំងអភិវឌ្ឍន៍កំពង់ផែស្វយ័តក្រុងព្រះសីហនុ និងតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុផងដែរ ៕