កិច្ចប្រជុំលើកទី១របស់ក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួង សាធារណការ និងដឹកជញ្ជូន ដឹកនាំដោយឯកឧត្តមរដ្ឋលេខាធិការ ប៉ាល់ ចន្ទតារា ទទួលបន្ទុកកិច្ចការនីតិកម្ម ថ្ងៃអង្គារ ៣រោច ខែចេត្រ ឆ្នាំខាល ចត្វាស័ក ពុទ្ធសករាជ ២៥៦៥ ត្រូវនឹងថ្ងៃទី១៩ ខែមេសា ឆ្នាំ២០២២ នៅទីស្តីការក្រសួង ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន ទទួល បន្ទុកកិច្ចការនីតិកម្ម បានអញ្ជើញដឹកនាំកិច្ចប្រជុំលើកទី១របស់ក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំ ក្រសួង និងសមាជិកសមាជិកាក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្ត។ ថ្លែងក្នុងមតិស្វាគមន៍នៅពេលចាប់ផ្តើមកិច្ចប្រជុំ ឯកឧត្តមប្រធានអង្គប្រជុំ បានមានប្រសាសន៍គូស បញ្ជាក់ថា៖ ក្រុមការងារនេះបង្កើតឡើងស្របតាមសេចក្តីសម្រេចលេខ. ១៣២ សសរ ចុះថ្ងៃទី២៦ ខែធ្នូ ឆ្នាំ២០១៦ របស់រាជរដ្ឋាភិបាល ស្តីពីការបង្កើតក្រុមការងារវាយតម្លៃលើផលប៉ះពាល់នៃលិខិតបទដ្ឋាន គិតយុត្ត ដើម្បីត្រួតពិនិត្យ តាមដាន និងកែសម្រួលលើលិខិតបទដ្ឋានគតិយុត្ត កិច្ចសន្យា និងកិច្ចព្រម ព្រៀងនៅក្នុងក្របខណ្ឌក្រសួងសាមី ដែលនៅខ្វះចន្លោះ និង/ឬ លែងអាចអនុវត្តបាន ស្របតាមការវិវឌ្ឍ របស់សង្គមជាតិនាបច្ចុប្បន្ន។ ទន្ទឹមនឹងនេះ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់សមាជិកសមាជិកា ក្រុមការងារ ដែលបានសហការល្អប្រកបដោយស្មារតីទទួលខុសត្រូវខ្ពស់ និងបានស្នើឱ្យបង្កើតលេខាធិការដ្ឋានក្រុមការងារវាយតម្លៃផលប៉ះពាល់នៃលិខិតបទដ្ឋានគតិយុត្តឱ្យបានឆាប់រហ័សតាមដែលអាចធ្វើទៅបាន និងបានសំណូមពរឱ្យពង្រឹងបន្ថែមសមត្ថភាពរៀបចំរបាយការណ៍វាយតម្លៃលើផលប៉ះពាល់នៃលិខិតបទដ្ឋានគតិយុត្តឱ្យមានគុណភាពកាន់តែល្អប្រសើរថែមទៀតផងដែរ។ សូមជម្រាបជូនថា៖ ក្រុមការងារនេះបង្កើតឡើងក្នុងគោលបំណងលើកកម្ពស់គុណភាព និងឧត្តមភាពនៃ ច្បាប់ កិច្ចសន្យា កិច្ចព្រមព្រៀងសំខាន់ៗ និងលិខិតបទដ្ឋានគតិយុត្តពាក់ព័ន្ធក្នុងវិស័យសាធារណការ និងដឹកជញ្ជូន និងមានវិសាលភាពអនុវត្តការងាររៀបចំ កសាង កែសម្រួល និងពិនិត្យឡើងវិញនូវច្បាប់កិច្ចសន្យា កិច្ចព្រមព្រៀងសំខាន់ៗ លិខិតបទដ្ឋានគតិយុត្ត ក្នុងដែនសមត្ថកិច្ចរបស់ក្រសួងសាធារណការ និងដឹកជញ្ជូន៕