សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានអះអាងថា រាជធានី ខេត្តចំនួន៧ មានកំណើនអ្នកស្លាប់ដោយសារគ្រោះថ្នាក់ចរាចរណ៍ក្នុងរយៈពេល០៣ខែ ក្នុងឆ្នាំ២០២២នេះ។ ចំពោះរាជធានី ខេត្ដទាំង៧នោះរួមាន រាជធានីភ្នំពេញ ខេត្តកំពង់ចាម ក្រចេះ សៀមរាប ព្រះសីហនុ បាត់ដំបង និងខេត្តកំពត។ ការអះអាងរបស់សម្តេចក្រឡាហោម បែបនេះក្នុងឱកាសអញ្ជើញជាអធិបតីក្នុងទិវាសប្ដាហ៍ជាតិសុវត្ថិភាពចរាចរណ៍ផ្លូវគោកលើកទី១៣ ដែលប្រារព្ធឡើងនៅខេត្តបាត់ដំបង កាលពីថ្ងៃទី១២ ខែមេសា ឆ្នាំ២០២២។ សម្តេចក្រឡាហោម ស ខេង បានលើកឡើងថា ចំណែកភូមិសាស្រ្តកើនអ្នកស្លាប់ ប៉ុន្តែថយចំនួនអ្នករងរបួសមាន៧ខេត្តទៀត ដូចជា ខេត្ដបន្ទាយមានជ័យ មណ្ឌលគិរី ពោធិ៍សាត់ រតនគិរី ស្ទឹងត្រែង ស្វាយរៀង និងខេត្តត្បូងឃ្មុំ ខណៈភូមិសាស្រ្តកើនអ្នករងរបួស ថយអ្នកស្លាប់មាន៦ខេត្ត រួមមាន ខេត្តកំពង់ឆ្នាំង កំពង់ស្ពឺ កោះកុង កណ្ដាល ព្រះវិហារ និងខេត្តកែប។ សម្តេចក្រឡាហោមបានបន្ថែមថា ដោយឡែកភូមិសាស្រ្តមាន អ្នកស្លាប់ និងរបួសថយចុះវិញ ក៏មាន៥ខេត្ត រួមមានខេត្ដព្រៃវែង កំពង់ធំ តាកែវ ឧត្តរមានជ័យ និងខេត្តប៉ៃលិន។ សម្តេចក្រឡាហោមបានបញ្ជាក់បន្ថែមថា ជាសរុបមក មូលហេតុចម្បងបណ្ដាលឱ្យមានគ្រោះថ្នាក់ចរាចរណ៍ខាងលើនេះ គឺបណ្ដាលមកពីការបើកបរលើសល្បឿនកំណត់ ការបើកបរមិនគោរពសិទ្ធិអាទិភាព ការបើកបរមិនគោរពសញ្ញាចរាចរណ៍ ការវ៉ាជែង ការមិនប្រកាន់ស្ដាំ បើកបរក្រោមឥទ្ធិពលគ្រឿងស្រវឹង ការមិនពាក់ខ្សែក្រវ៉ាត់សុវត្ថិភាព។ ដើម្បីឆ្លើយតបនឹងស្ថានភាពគ្រោះថ្នាក់ចរាចរណ៍នេះ សម្ដេចក្រឡាហោម ស ខេង បានក្រើនរម្លឹកនូវគោលការណ៍មួយចំនួន រួមមានអ្នកបើកបរត្រូវចេះបើកបរឱ្យបានត្រឹមត្រូវតាមច្បាប់ជាដាច់ខាត មិនត្រូវបើកបរលើសល្បឿនកំណត់ជាដាច់ខាត មិនត្រូវបើកបរក្រោមឥទ្ធិពលនៃគ្រៀងស្រវឹងជាដាច់ខាត មិនត្រូវបើកបរក្រោមឥទ្ធិពលនៃគ្រឿងញៀនជាដាច់ខាត មិនត្រូវបើកបរក្រោមស្ថានភាពងងួយដេកជាដាច់ខាត ត្រូវពាក់មួកសុវត្ថិភាពជានិច្ច ត្រូវពាក់ខ្សែក្រវ៉ាត់សុវត្ថិភាពជានិច្ច ត្រូវប្រកាន់ស្ដាំជានិច្ច ត្រូវត្រួតពិនិត្យលក្ខណៈបច្ចេកទេសយានយន្តជានិច្ច និងត្រូវប្រុងប្រយ័ត្នក្នុងពេលធ្វើដំណើរ។ ជាមួយគ្នានេះដែរ សម្ដេចក្រឡាហោមក៏បានណែនាំដល់រដ្ឋបាលខេត្តដែលមានអត្រាគ្រោះថ្នាក់ចរាចរណ៍កើនឡើង ត្រូវចាត់វិធានការអនុវត្តន៍ឱ្យបានសកម្ម និងមានប្រសិទ្ធភាព។ សម្ដេចក្រឡាហោមបានអំពាវនាវដល់អ្នកចូលរួមក្នុងទិវាសប្ដាហ៍សុវត្ថិភាពចរាណ៍នាឱកាសនេះ ពេលត្រឡប់ទៅលំនៅឋានវិញសូមរួមគ្នាចូលរួមផ្សផ្វផ្សាយអំពីសុវត្ថិភាពចរាចរណ៍ និងខ្លឹមសារនៃទិវានាថ្ងៃនេះទៅកាន់ក្រុមគ្រួសារ សាច់ញាតិ មិត្តភក្ដិ និងមនុស្សជុំវិញ៕ដោយ ចាន់ សុធីវង្ស សម្រួលផ្សាយដោយ៖ ធូ កុសល