[Rasmei Kampuchea Daily News] - កំណាត់ផ្លូវជាតិលេខ៥ រងគ្រោះដោយទឹកជំនន់ បានជួសជុលកែលម្អរួច ពីរង្វង់មូលស្រីល័ក្ខណ៍ក្រុងសិរីសោភ័ណ-ដល់ផ្លូវបំបែកវាងក្រុងភូមិសាស្ត្រស្រុកមង្គលបូរី
ដោយ: ប.ជ័យ / បន្ទាយមានជ័យ: កំណាត់ផ្លូវជាតិលេខ៥ ពីរង្វង់មួលស្រីល័ក្ខណ៍ក្រុងសិរីសោភ័ណ ស្ថិតក្នុងសង្កាត់ព្រះពន្លា ឬប៉ែកខាងត្បូងទីប្រជុំជនក្រុង-ដល់ផ្លូវបំបែកផ្លូវជាតិលេខ៥ វាងក្រុង ក្នុងភូមិសាស្ត្រឃុំបត់ត្រង់ ស្រុកមង្គលបូរី ខេត្តបន្ទាយមានជ័យ ដែលរងគ្រោះដោយទឹកជំនន់រាល់ឆ្នាំកន្លងមក ត្រូវបានស្ថាបនាឡើងវិញ ហើយប្រសើរឡើង។
មកទល់ពេលនេះ ការស្ថាបនា និងគូសគំនូសចរាចរណ៍ចែកទ្រូងផ្លូវ ឈានដល់រួចរាល់ទាំងស្រុង ហើយក្រុមការងារអនុវត្តគម្រោងបានប្រគល់ ទទួលដាក់អោយប្រើប្រាស ។
លោក សុក ចាន់ថា ប្រធានមន្ទីរសាធារណៈការដឹកជញ្ជូនខេត្តបន្ទាយមានជ័យ បានឲ្យដឹងថ្ងៃទី០៩ខែមេសាឆ្នាំ ២០២២ថា ក្រុមការងាមន្ទីរសាធារណៈការដឹកជញ្ជូនខេត្ត ដឹកនាំដោយលោកផ្ទាល់បានធ្វើការជួសជុលកំណាត់ផ្លូវជាតិលេខ៥នេះឡើងវិញ ក្នុងនោះមានលុបសំបុកមាន់ ស្នាមប្រេះស្រុតបំផ្លាញដោយគ្រោះទឹកជំនន់ទឹកភ្លៀងកន្លងមក ដោយល្បាយថ្មម៉ិច ស៊ីម៉ង់ត៍ និងកៅស៊ូ នៅចន្លោះ គ ម ៣៥៥+០០០និង គ ម ៣៥៩+០០០ ក្នុងខេត្តបន្ទាយមានជ័យ ស្ថិតនៅក្រោម កិច្ចសន្យាថែទាំប្រចាំ របស់មន្ទីរសាធារណៈការខេត្តបន្ទាយមានជ័យ ។
ក្រុមការងារគូសគំនូសចរាចរណ៍រួចរាល់ហើយដែរ ។
ការជួសជុលនិងការស្ថារឡើងវិញដោយធ្វើអោយប្រសើរឡើងកំណាត់ផ្លូវជាតិលេខ៥ នេះ អនុវត្តតាមបទបញ្ជានិងការ ណែនាំរបស់ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការនិងដឹកជញ្ជូន ។
កំណាត់ផ្លូវជាតិលេខ៥ នៅចំណុចខាងលើគឺធ្វើអោយមានស្តង់ដារនិងមានគុណភាពខ្ពស់ជាងមុន ។ ក្នុងនោះការលើកកម្រឹតកម្ពស់ផ្លូវអោយខ្ពស់ផុតពីហានីយភ័យទឹកជំនន់ដូចកន្លងមក ។ ការពង្រីកទទឺងតួផ្លូវអោយធំទូលាយ ឆ្លើយតបបរិមាណមធ្យោបាយចរាចរណ៍និងកម្រិតទម្ងន់ផ្ទុក ជាដើម ។ នៅពេលនេះ ក្រុមការងារត្រួតពិនិត្យនិងក្រុមការងារស្ថាបនាដែលជាអ្នកអនុវត្តគម្រោងបានប្រគល់ ទទួលកំណាត់ផ្លូវនេះ ដាក់អោយប្រើប្រាសហើយ ។
សូមរំលឹកថា ឆ្នាំ២០២០កន្លងមក និងនៅឆ្នាំមុនៗ កំណាត់ផ្លូវជាតិលេខ៥ ពីចំណុចរង្វង់មូលស្រីគ្រប់ល័ក្ខណ៍ក្រុងសិរីសោភ័ណ ដល់ផ្លូវបំបែកផ្លូវជាតិលេខ៥ វាងក្រុង ក្នុងភូមិសាស្ត្រស្រុកមង្គលបូរី បានរងគ្រោះដោយទឹកជំនន់ និងជំនន់ទឹកភ្លៀង ព្រមទាំងទឹកហូរធ្លាក់មកពីស្រុកថៃ បណ្តាលហូរកាត់លិច ច្រោះ ខូចខាតផ្លូវជាតិច្រោះដាច់ជាដុំៗ ច្រើនកន្លែង៕
