កិច្ចប្រជុំពិនិត្យ និងពិភាក្សាលើសេចក្ដីព្រាងអនុក្រឹត្យស្ដីពីការគ្រប់គ្រងផ្លូវឆ្លងកាត់ និងដីចំណីផ្លូវដែក ដឹកនាំដោយឯកឧត្តមរដ្ឋលេខាធិការ ប៉ាល់ ចន្ទតារា ថ្ងៃពុធ ១៤កើត ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៦ ខែមីនា​ ឆ្នាំ២០២២ នៅទីស្ដីការក្រសួង ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន អញ្ជើញដឹកនាំកិច្ចប្រជុំពិនិត្យ និងពិភាក្សាលើសេចក្ដីព្រាងអនុក្រឹត្យស្ដីពីការគ្រប់គ្រងផ្លូវឆ្លងកាត់ និងដីចំណីផ្លូវដែក ដោយមានការអញ្ជើញចូលរួមពីឯកឧត្តមអនុរដ្ឋលេខាធិការ ឯកឧត្តមអគ្គនាយក លោកអគ្គនាយករង លោកប្រធាននាយកដ្ឋាន អនុប្រធាននាយកដ្ឋាន ព្រមទាំងមន្ត្រីជំនាញពាក់ព័ន្ធ ដែលជាក្រុមការងាររៀបចំពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រងផ្លូវឆ្លងកាត់ និងដីចំណីផ្លូវដែក។ ជាកិច្ចចាប់ផ្តើម ឯកឧត្តមប្រធានអង្គប្រជុំ បានមានប្រសាសន៍បើកអង្គប្រជុំ និងស្វាគមន៍ចំពោះវត្តមានឯកឧត្តមថ្នាក់ដឹកនាំ និងសមាជិកក្រុមការងារ ដែលបានចូលរួមទាំងអស់ និងបានអនុញ្ញាតឱ្យអង្គប្រជុំពិនិត្យ និងពិភាក្សាយ៉ាងផុលផុសចាប់ពីមាត្រា១ រហូតដល់មាត្រា៤១ នៃសេចក្តីព្រាងអនុក្រឹត្យនេះ។ ជាមួយគ្នានោះផងដែរ ឯកឧត្តមប្រធានអង្គប្រជុំ បានណែនាំឱ្យក្រុមការងាររៀបចំសេចក្ដីព្រាងអនុក្រឹត្យនេះអញ្ជើញតំណាងក្រសួងសេដ្ឋកិច្ច និងហិរញ្ញវត្ថុ ព្រមទាំងតំណាងភាគីពាក់ព័ន្ធចូលរួម ពិភាក្សាលើសេចក្តីព្រាងអនុក្រឹត្យនេះនៅក្នុងកិច្ចប្រជុំពិនិត្យ និងពិភាក្សាចុងក្រោយ ក្រោមអធិបតីភាពដ៏ខ្ពង់ខ្ពស់ឯកឧត្ដមទេសរដ្ឋមន្ត្រី ដើម្បីធានាថានៅពេលដែលអនុក្រឹត្យនេះចេញទៅនឹងមានការឯកភាពគ្នាពីក្រសួង សា្ថប័នពាក់ព័ន្ធ ព្រមទាំងអាចយកទៅអនុវត្តបានដោយរលូន និងមានប្រសិទ្ធភាពខ្ពស់៕