ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី Six Sigma កាលពីថ្ងៃ១២កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃចន្ទ ទី១៤ ខែមីនា ឆ្នាំ២០២២ នៅទីស្តីការក្រសួង ដោយមានការចូលរួមពីសិក្ខាកាម ដែលជាថ្នាក់ដឹកនាំក្រសួងចាប់ពីប្រធាននាយកដ្ឋាន រហូតដល់ថ្នាក់រដ្ឋលេខាធិការសរុបចំនួន១៧០រូប។ នៅក្នុងឱកាសនោះ ឯកឧត្តមរដ្ឋលេខាធិការ បានគូសបញ្ជាក់ពីសារៈសំខាន់ នៃការគាំទ្រ និងការប្តេជ្ញាចិត្តខ្ពស់ពីថ្នាក់ដឹកនាំ ជាពិសេសការចូលរួមពីគ្រប់ភាគីពាក់ព័ន្ធទាំងអស់ នៅក្នុងអង្គភាព/ស្ថាប័ន រាប់ចាប់តាំងពីមន្ត្រីថ្នាក់ក្រោមបំផុតរហូតទៅដល់ថ្នាក់ដឹកនាំអង្គភាព/ ស្ថាប័ននោះ ដើម្បីអនុវត្តន៍ទ្រឹស្តីទស្សនវិជ្ជា Six Sigma នេះបានជោគជ័យ ក៏ដូចជាដើម្បីបញ្រ្ជាបទ្រឹស្តីនេះ ឱ្យក្លាយជាវប្បធម៌មួយរបស់អង្គភាព/ស្ថាប័ននោះ។ ជាមួយគ្នានេះដែរ ឯកឧត្តមរដ្ឋលេខាធិការ បានសំណូមពរឱ្យសិក្ខាកាមទាំងអស់យកចិត្តទុកដាក់ ប្រកបដោយការប្ដេជ្ញាចិត្តខ្ពស់ ដើម្បីក្រេបជញ្ជក់យកចំណេះដឹង និងបទពិសោធន៍ពីកម្មវិធីនេះយកទៅអនុវត្តន៍នៅក្នុងអង្គភាពរបស់ខ្លួនឱ្យមានប្រសិទ្ធភាពខ្ពស់។ ទន្ទឹមនឹងនេះ ឯកឧត្តម ហឿន សំនៀង នាយកវិទ្យាស្ថាន បានមានប្រសាសន៍ថា ក្រោយពេលបញ្ចប់វគ្គបណ្តុះបណ្តាលនេះ សិក្ខាកាមនឹងយល់ដឹងពីរបៀប នៃការបំពេញការងារតាមរបៀបទស្សនវិជ្ជា Six Sigma មានការផ្លាស់ប្តូរផ្នត់គំនិត និងឥរិយាបថ ក្នុងការបំពេញការងារឱ្យបានល្អប្រសើរ រកឃើញឫសគល់នៃបញ្ហា ចំណុចខ្វះខាត និងនីតិវិធីការងារដែលមិនសូវមានគុណភាព និងចំណាយពេលវេលា និងធនធានច្រើនដែលមិនចាំបាច់ ហើយមិនបំពេញចិត្តសេចក្តីត្រូវការរបស់អតិថិជនដែលមកទទួលសេវា បង្កើតនីតិវិធីរបៀបរបបការងារ និងមានលទ្ធភាពកែលម្អចំណុចខ្វះខាត អនុវត្ដន៍ការងារឱ្យកាន់តែប្រសើរ និងកាត់បន្ថយវដ្តនៃនីតិវិធីការងារជាដើម។ សូមបញ្ជាក់ថា វគ្គបណ្ដុះបណ្ដាលនេះ រៀបចំឡើងដោយវិទ្យាស្ថានតេជោ សែន សាធារណការ និងដឹកជញ្ជូន ក្នុងគោលបំណងពង្រឹងប្រសិទ្ធភាពលើការងារដឹកនាំគ្រប់ គ្រងស្ថាប័ន/អង្គភាព បង្កើនសមត្ថភាពលើការងារដឹកនាំ និងគ្រប់គ្រងស្ថាប័ន បង្កើនប្រាក់ចំណូល និងប្រាក់ចំណេញ កាត់បន្ថយពេលវេលា កាត់បន្ថយការចំណាយ និងបង្កើនជំនាញដោះស្រាយបញ្ហារបស់មន្ត្រី នៅតាមអង្គភាពនីមួយៗ ឱ្យកាន់តែប្រសើរឡើង។ វគ្គបណ្ដុះបណ្ដាលនេះ បែងចែកជា ៣វគ្គ សម្រាប់ក្រុមគោលដៅផ្សេងៗគ្នាក្នុងនោះ៖ វគ្គទី១- រៀបចំសម្រាប់ថ្នាក់ដឹកនាំចាប់ពីប្រធានមន្ទីរ ប្រធាននាយកដ្ឋានដល់រដ្ឋលេខាធិការ ។ វគ្គទី២- រៀបចំសម្រាប់អនុប្រធានមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត ។ វគ្គទី៣-រៀបចំសម្រាប់ថ្នាក់អនុប្រធាននាយកដ្ឋាន៕ ដោយ ទេស ច័ន្ទសុធារី (ប្រភព៖ ក្រសួងសាធារណការ និងដឹកជញ្ជូន) ​សម្រួលផ្សាយដោយ៖ ធូ កុសល