សិក្ខាសាលាអន្តរក្រសួង ដើម្បីគាំទ្រដល់ការអភិវឌ្ឍគោលនយោបាយឆ្ពោះទៅរកការប្រើប្រាស់យានយន្តអគ្គិសនីប្រកបដោយប្រសិទ្ធភាពនៅកម្ពុជា នៅថ្ងៃព្រហស្បតិ៍ ៨កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១០ ខែមីនា ឆ្នាំ២០២២ លោក គង់ សុផល អគ្គនាយករង តំណាងឯកឧត្ដម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក បានអញ្ជើញចូលរួមសិក្ខាសាលាអន្តរក្រសួង ដើម្បីគាំទ្រដល់ការអភិវឌ្ឍគោលនយោបាយឆ្ពោះទៅរកការប្រើប្រាស់យានយន្តអគ្គិសនីប្រកបដោយប្រសិទ្ធភាពនៅកម្ពុជា ដែលរៀបចំដោយអង្គការ Energylab ក្រោមកិច្ចសហការជាមួយក្រសួងសាធារណការ និងដឹកជញ្ជូន ដែលប្រព្រឹត្តទៅនៅសណ្ឋាគារ Raffle Le Royal។ នៅក្នុងវគ្គសិក្ខាសាលានេះ មានការធ្វើបទបង្ហាញមួយចំនួន ដែលផ្ដោតសំខាន់ទៅលើការៀបចំផែនការ យុទ្ធសាស្រ្ត និងវិធានការផ្សេងៗ ដើម្បីជំរុញការប្រើប្រាស់យាយន្តអគ្គិសនីនៅកម្ពុជាឱ្យច្រើនបំផុតតាមដែលអាចធ្វើទៅបាន ដើម្បីជួយកាត់បន្ថយការបំពុលបរិស្ថាន និងឧស្ម័នផ្ទះកញ្ចក់។ ស្របពេលនេះ យោងទៅតាមទៅតាមយុទ្ធសាស្រ្តអភិវឌ្ឍន៍រយៈពេលវែងប្រកបដោយអព្យាក្រឹតកាបូន ប្រទេសកម្ពុជាប្ដេជ្ញាក្នុងការជំរុញការប្រើរថយន្តអគ្គិសនី និងរថយន្តក្រុងក្នុងទីក្រុងឱ្យបាន ៤០% និងទោចក្រយានយន្តឱ្យបាន ៧០% នៅឆ្នាំ២០៥០។ នៅក្នុងវគ្គសិក្ខាសាលានេះ មានការចូលរួមពីតំណាងអគ្គនាយកដ្ឋានគយ និងរដ្ឋាករនៃកម្ពុជា តំណាងអគ្គិសនីកម្ពុជា (EDC) និងក្រសួងស្ថាប័នមួយចំនួនទៀតដែលពាក់ព័ន្ធ ព្រមទាំងតំណាងគម្រោង GIZ/SMMR, Cambodia Climate Change Alliance ៕