ខេត្តសៀមរាប,ថ្ងៃទី០៧ ខែកុម្ភៈ ឆ្នាំ២០២២)៖ ប្រជាពលរដ្ឋនៅតាម បណ្ដោយ គម្រោងស្ថាបនាផ្លូវ៣៨ខ្សែ ក្នុងក្រុងសៀមរាប ខេត្ដសៀមរាប មានមោទនៈភាព និងបានសម្ដែងការសប្បាយចិត្ដចំពោះរាជរដ្ឋា ភិបាល ដែលបានធ្វើឱ្យហេដ្ឋារចនាផ្លូវថ្នល់នាក្រុងទេសចរណ៍មួយនេះ ក្លាយជា ទីក្រុងមានទិដ្ឋភាពល្អប្រសើរ និងមានភាពទាក់ទាញដល់អ្នក ទេសចរ ។ ប្រជាពលរដ្ឋនៅភូមិត្រពាំងត្រែង សង្កាត់សាលាកំរើក បានលើកឡើងដូច គ្នាថា ផ្លូវ៣៨ខ្សែ ដែលរាជរដ្ឋាភិបាលបានសាងសង់ថ្មីនៅលើទឹកដី អង្គរ នេះ ជាសសៃឈាមដ៏សំខាន់លើវិស័យទេសចរណ៍ ដែលកន្លងមកផ្លូវមួយ ចំនួន ក្នុងតំបន់នេះមានភាពតូចចង្អៀតពិបាកក្នុងការធ្វើដំណើរ ។ ប្រជាពលរដ្ឋ បានបង្ហាញថា នៅពេលដែលសៀមរាបទទួលបានសមិទ្ធ ផលជាច្រើន ដែលធ្វើឱ្យខេត្តសៀមរាប កាន់តែស្អាត និងមានភាពទាក់ ទាញ ក្រៅពីប្រាសាទបុរាណ ធ្វើឱ្យពួកគាត់មានមោទនៈភាព និងសប្បាយ រីករាយ ដែលធ្វើឲ្យអ្នកទេសចរណ៍ក្រៅខេត្តសៀមរាបចង់ធ្វើដំណើរ កំសាន្ដ នៅខេត្ដនេះផងដែរ។ ពួកគាត់បានបន្ដថា ផ្លូវ៣៨ខែនេះ បានសាងសង់រួចរាល់ជាស្ថាពរហើយ និងនៅលើកំណាត់ផ្លូវនីមួយៗ ក៏មានការបំពាក់បន្ថែមនូវបង្គោលភ្លើង អគ្គិសនី បំពាក់កាម៉េរ៉ាសុវត្ថិភាព និងសញ្ញភ្លើងស្ដុប ជាច្រើនកន្លែង ។ ជាពិសេសតាមដងផ្លូវក៏មានផ្លូវថ្មើរជើងសម្រាប់ដើរ និងផ្លូវកង់ផងដែរ ។ ប៉ុន្ដែទោះជាយ៉ាងណាក្ដីពួកគាត់បានស្នើឱ្យរាជរដ្ឋាភិបាលបន្ដអភិវឌ្ឍន៍នូវផ្លូវដែលសេសសល់ពិបាកធ្វើដំណើរបន្ថែមទៀត ។ ជាមួយគ្នានោះពួកគាត់បានអំពាវនាវដល់ប្រជាពលរដ្ឋចូលរួមថែរក្សាផ្លូវដែលបានសាងសង់រួចថ្មីៗ និងចូលរួមគោរពច្បាប់ចរាចរណ៍ទាំងអស់គ្នា។ ការស្ថាបនាផ្លូវចំនួន៣៨ខ្សែនេះ មានគោលដៅប្រែក្លាយក្រុងសៀមរាប ឱ្យក្លាយជាទីក្រុងដ៏ទំនើបពោរពេញដោយសោភ័ណភាព បរិស្ថានល្អ សម្រាប់ការរស់នៅ ឱ្យសក្តិសមជាទីក្រុងទេសចរណ៍ វប្បធម៌ និងប្រវត្តិ សាស្ត្រ អាចទាក់ទាញភ្ញៀវទេសចរណ៍ក្នុងប្រទេសក្រៅប្រទេសកាន់ តែ ច្រើន សំដៅលើកស្ទួយសេដ្ឋកិច្ចជាតិឱ្យកាន់តែមានការរីកចម្រើន ព្រម ទាំងធ្វើឱ្យមានភាពប្រសើរឡើងដល់ការតភ្ជាប់ពីទីប្រជុំជនក្រុងសៀមរាបទៅកាន់តំបន់ដាច់ស្រយាលផងដែរ ។ ជាមួយគ្នានោះ ផ្លូវ៣៨ខ្សែនេះ ត្រូវ បានបែងចែកជាបួនប្រភេទរួមមាន ផ្លូវជួសជុលដោយអ៊ុតបេតុងកៅស៊ូ (AC) បន្ថែមពីលើ កម្រាស់៥សង់ទីម៉ែត្រ ប្រវែងសរុប ៣១,៧៧គីឡូម៉ែត្រ ។ ផ្លូវស្ថាបនាដោយក្រាលបេតុង សរសៃដែកកម្រាស់ ២០សង់ទីម៉ែត្រ រួច អ៊ុតក្រាលបេតុងកៅស៊ូ(AC)ពីលើ កម្រាស់ ៥ទៅ៧សង់ទីម៉ែត្រប្រវែងសរុប ៧.៨៦គីឡូម៉ែត្រ ។ ផ្លូវជួសជុលដោយក្រាលថ្មម៉ិចរួចអ៊ុតបេតុងកៅស៊ូ(AC) ពីលើ កម្រាស់៥ ទៅ៧សង់ទីម៉ែត្រ ប្រវែងសរុប១៣,៧៣គីឡូម៉ែត្រ ។ ផ្លូវស្ថាបនាដោយក្រាលបេតុង សរសៃដែក កម្រាស់ ២០ទៅ២៥សង់ទី ម៉ែត្រ ប្រវែងសរុប ៥០,៨៦គីឡូម៉ែត្រ និងការរៀបចំចិញ្ចើមផ្លូវ EN-០៣ ប្រវែង ២,១៩គីឡូម៉ែត្រ ផងដែរ ។ សូមរំលឹកថា៖ គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាប ចំនួន៣៨ខ្សែនេះ មានប្រវែងសរុប ១០៦,៤២ គីឡូម៉ែត្រ ប្រើប្រាស់ថវិកា ជាតិសរុបប្រមាណជាង ១៤៩.២១៦.៥៩៥ ដុល្លារអាមេរិក ដោយក្នុងនោះ ចំនួន ៩លានដុល្លារអាមេរិក ចំណាយលើការងារចាំបាច់ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ឋិតក្រៅគម្រោងសាងសង់ខ្សែ ផ្លូវទាំង៣៨នេះ ចំណាយពេលសាងសង់ចំនួន១៣ខែ ៕ ដោយ៖រី រិន(កែសម្រួលដោយ មណ្ឌល កែវ)