កណ្តាល៖ ឯកឧត្តមទេសរដ្ឋមន្ត្រី សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់ជាតិរបស់រាជរដ្ឋាភិបាលចុះមូលដ្ឋានស្រុកកោះធំ នៅថ្ងៃសៅរ៍ ទី៥ ខែកម្ភៈ ឆ្នាំ២០២២នេះ បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាការនូវអគារព្យាបាលជំងឺទូទៅនៃមណ្ឌលសុខភាពពោធិ៍រាម្មា ឃុំព្រែកស្ដី ស្រុកកោះធំ ខេត្តកណ្តាល ដោយមានការចូលរួមពីឯកឧត្តមសាស្ត្រាចារ្យ ឈាង រ៉ា អគ្គនាយកមន្ទីពេទ្យកាល់ម៉ែត ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ជាអនុប្រធានក្រុមការងារគណបក្សចុះមូលដ្ឋានស្រុកកោះធំ និងក្រុមសប្បុរសជនក្រៅប្រទេស។ នាឱកាសនោះ ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់សប្បុរសជនក្រៅប្រទេស ដែលបានចូលរួមវិភាគទានជាមួយក្រុមការងាររបស់គណបក្សប្រជាជនកម្ពុជាដើម្បីស្ដារ ជួសជុល សាងសង់មណ្ឌលសុខភាពពោធីរាម្មាឡើងវិញ ជាពិសេសឯកឧត្តមសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត និងក្រុមគ្រូពេទ្យ ក្រុមការងារគណបក្សប្រជាជនកម្ពុជា និងមន្ត្រីបុគ្គលិករបស់មន្ទីរពេទ្យព្រែកស្ដីដែលបានរួមចំណែកទាំងអស់គ្នាក្នុងការធ្វើឱ្យមណ្ឌលសុខភាពនេះលេចចេញជារូបរាងឡើងនៅពេលនេះ។ ជាមួយគ្នានោះផងដែរ ឯកឧត្តមទេសរដ្ឋមន្ត្រី បានគូសបញ្ជាក់ពីការគិតគូរអំពីសុខភាព និងសុខុមាលភាពរបស់បងប្អូនប្រជាពលរដ្ឋតាមការណែនាំ និងផ្ដល់អនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្ដេចតែងតែណែនាំឱ្យក្រុមការងារជួយមើលថែទាំសុខភាព និងសុខុមាលភាពរបស់បងប្អូនប្រជាពលរដ្ឋចុះឱ្យកៀកបងប្អូនប្រជាពលរដ្ឋ ផ្ដល់សេវាសាធារណ:សេវាចាំបាច់ជូនបងប្អូនប្រជាពលរដ្ឋ ធ្វើឱ្យបានលឿន តម្លាភាពធ្វើឱ្យមានប្រសិទ្ធភាព។ ឯកឧត្តមទេសរដ្ឋមន្ត្រី ក៏បានជម្រាបជូនផងដែរអំពីគម្រោងបន្តស្តារ និងជួសជុលមណ្ឌលសុខភាពនៅស្រុកកោះធំបន្ថែមទៀត ជាពិសេសមណ្ឌលសុខភាពដែលនៅឆ្ងាយៗ ដើម្បីឱ្យបងប្អូនប្រជាពលរដ្ឋអាចស្វែងរក និងទទួលបានកន្លែងព្យាបាល និងថែទាំអ្នកជំងឺប្រកបដោយជម្រើសសម្បូរបែប។ បានគូសបញ្ជាក់ពីសារសំខាន់នៃកត្តាសុខសន្តិភាពក្រោមការដឹកនាំដ៏ឈ្លាសវៃរបស់សម្ដេចតេជោនាយករដ្ឋមន្ត្រី បានផ្ដល់ឱកាសឱ្យយើងបានកសាងប្រទេសជាតិមាតុភូមិរបស់យើងដល់សព្វថ្ងៃនេះ មានឱកាសជួបជុំគ្នាដើម្បីសម្ពោធដាក់ឱ្យប្រើប្រាស់អគារមណ្ឌលសុខភាពពោធិ៍រាម្មា កសាងជាតិលេខ២១ ឆ្លងទន្លេបាសាក់នៅស្រុកកោះធំ និងសមិទ្ធផលសំខាន់ៗជាច្រើនទៀតផងដែរ។ ឆ្លៀតក្នុងឱកាសនោះ ឯកឧត្តមទេសរដ្ឋមន្ត្រី បានជម្រាបជូនអង្គពិធីអំពីការខិតខំប្រឹងប្រែងរបស់ក្រុមការងាររាជរដ្ឋាភិបាលចុះជួយស្រុកកោះធំក្នុងការប្រមែប្រមូលថវិកាដើម្បីធ្វើឱ្យប្រសើរឡើងមន្ទីរពេទ្យតេជោ សែន កោះធំ ដែលជាមន្ទីរពេទ្យពេទ្យដ៏ធំមួយនៅស្រុកកោះធំ មានគ្រែចំនួន១៥០ ទំនើបជាងមន្ទីរពេទ្យមួយចំនួននៅតាមបណ្ដាខេត្តមួយចំនួន។ បន្ថែមពីលើនេះ ឯកឧត្តមទេសរដ្ឋមន្ត្រី បានលើកឡើងផងដែរអំពីការកើនឡើងនៃជីវិតសង្ឃឹមរស់ (Life Expectancy) រយៈពេល ១៤ឆ្នាំបន្ថែមទៀតរបស់ប្រជាជនកម្ពុជាប្រៀបធៀបទៅនឹងរយៈពេល ២០ឆ្នាំ កន្លងទៅ ដោយសារកម្ពុជាមានការរីកចម្រើនលើវិស័យហេដ្ឋារចនាសម្ព័ន្ធរូបវន្ត ជាពិសេសមធ្យោបោយ និងធ្វើដំណើរឆ្ពោះទៅកាន់មន្ទីរពេទ្យដើម្បីស្វែងរកសេវាថែទាំ និងព្យាបាលសុខភាព រួមជាមួយនឹងបរិស្ថានរស់នៅស្អាត អាហារបរិភោគគ្រប់គ្រាន់ និងទឹកស្អាតជាដើម។ សូមជម្រាបជូនថា គម្រោងស្ដារ ជួសជុល សាងសង់មណ្ឌលសុខភាពនេះបានចំណាយថវិកាសរុបប្រមាណ ១៦៥ ០០០ ដុល្លារសហរដ្ឋអាមេរិក ក្នុងនោះថវិការបស់ក្រុមការងារគណបក្សប្រជាជនកម្ពុជាមានចំនួន ១២៥ ០០០ ដុល្លារអាមេរិក និងថវិកាសប្បុរសជនក្រៅប្រទេសចំនួន ៤០០ ០០០ដុល្លាអាមេរិក៕