កិច្ចប្រជុំពិភាក្សាលើការប្រមូលទិន្នន័យពាក់ព័ន្ធការសិក្សាគំនូសប្លង់បច្ចេកទេសនៃគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ ដើម្បីេធ្វើយ៉ាងណាជំរុញដល់ការអនុវត្តគម្រោងឱ្យបានចប់សព្វគ្រប់តាមកាលកំណត់ នាថ្ងៃទី០៤ ខែកុម្ភៈ ឆ្នាំ២០២២ ឯកឧត្តម កឹម បូរី អនុរដ្ឋលេខាធិការទទួលបន្ទុក នៃក្រសួងសាធារណការ និងដឹកជញ្ជូន និង ឯកឧត្តម តាំង ម៉េងលាន អភិបាលរង នៃគណៈអភិបាលខេត្តកណ្តាល បានអញ្ជើញជាគណៈអធិបតី ក្នុងកិច្ចប្រជុំពិភាក្សាលើការប្រមូលទិន្នន័យពាក់ព័ន្ធការសិក្សាគំនូសប្លង់បច្ចេកទេសលម្អិតសម្រាប់គម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ ដោយមានការចូលរួមពីសមាជិកគ្រប់គ្រងគម្រោង (PMU) និងតំណាងភាគីពាក់ព័ន្ធជាច្រើន នៅសាលប្រជុំអគារ C នៃសាលាខេត្តកណ្តាល។ ជាសេចក្តីសង្ខេប ឯកឧត្តមសហប្រធានទាំងពីរបានធ្វើការវាយតម្លៃខ្ពស់ និងកោតសរសើរក្រៃលែងចំពោះការរៀបចំឱ្យមានកិច្ចប្រជុំជាផ្លូវការនេះឡើង ហើយក៏ថ្លែងអំណរគុណយ៉ាងជ្រាលជ្រៅដល់គ្រប់តំណាងភាគីពាក់ព័ន្ធដែលមានវត្តមានក្នុងអង្គប្រជុំនេះ។ ឯកឧត្តមសហប្រធានទាំងពីរក៏បានជំរុញ និងលើកទឹកចិត្តឱ្យបន្តកិច្ចសហការណ៍បន្ថែមទៀតក្នុងការផ្តល់ព័ត៌មាន និងទិន្នន័យនានា ក៏ដូចជាការចូលរួមជជែកពិភាក្សារវាងក្រុមហ៊ុនទីប្រឹក្សាបច្ចេកទេស (DOHWA-Seoyong JV) ជាមួយភាគីពាក់ព័ន្ធ ដើម្បីធ្វើយ៉ាងណាឱ្យការអនុវត្តគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅនឹងចប់សព្វគ្រប់តាមកាលវេលាកំណត់៕