[Rasmei Kampuchea Daily News] - ប្រទេសបី បើកដំណើរការគម្រោង កសាងសមត្ថភាព វិធីសាស្ត្រថែទាំផ្លូវ
ដោយៈសុផល / ភ្នំពេញៈ វិទ្យាស្ថានតេជោ សែន សាធារណការ និងដឹកជញ្ជូន កាលពីថ្ងៃទី១៧ ខែមករា ឆ្នាំ២០២២ បានដាក់ឱ្យដំណើការ គម្រោងកសាង សមត្ថភាព ស្តីពីវិធីសាស្ត្រថែ ទាំផ្លូវថ្នល់ ដើម្បីលើកកម្ពស់ ហេដ្ឋារចនាសម្ព័ន្ធ ប្រកបដោយចីរភាព សម្រាប់ប្រទេសកម្ពុជា-ឡាវ-វៀតណាម ក្រោមអធិបតីភាព លោកស្រី ឥម នីថារ៉ា រដ្ឋលេខាធិការ ក្រសួងសាធារណការ និងដឹកជញ្ជូន ។
ពិធីប្រកាសនេះ មានការចូលរួម តាមប្រព័ន្ធវីដេអូពីចម្ងាយ និងការចូលរួម ដោយផ្ទាល់ ពីថ្នាក់ដឹកនាំក្រសួង លោក ហឿន សំនៀង នាយកវិទ្យាស្ថានតេជោ សែន សាធារណការ និងដឹកជញ្ជូន ក្រសួងសាធារណការ និងដឹកជញ្ជូន របស់ប្រទេសឡាវ និងវៀតណាម លោក Madhurjya K.Duta នាយកសម្រប សម្រួល ការវិនិយោគនៃ វិទ្យាស្ថានមេគង្គ ថ្នាក់ដឹកនាំវិទ្យាស្ថាន មន្ទីរសាធារណ ការ និងដឹកជញ្ជូនរាជធានី-ខេត្ត គណៈគ្រប់គ្រងសាស្ត្រាចារ្យ និស្សិត ក្រុមការងារ ជំនាញ ក្រោមឱវាទវិទ្យាស្ថាន និងភាគីពាក់ព័ន្ធផងដែរ។
ពិធីនេះប្រារព្ធធ្វើឡើង ក្នុងគោលបំណងប្រកាស ជូនសាធារណជន ឱ្យបានដឹង អំពីការចាប់ដំណើរការអនុវត្ត គម្រោងកសាងសមត្ថភាពស្ដីពីវិធីសាស្ត្រថែទាំ ផ្លូវថ្នល់ ដើម្បីលើកកម្ពស់ហេដ្ឋារចនាសម្ព័ន្ធ ប្រកបដោយចីរភាពសម្រាប់ប្រទេស កម្ពុជា ឡាវ វៀតណាម ដែលជាគម្រោងផ្ដោតលើការពង្រឹងសមត្ថភាពផ្នែក បច្ចេកទេស មន្ត្រីពាក់ព័ន្ធ និងកម្មករជំនាញតាមរយៈកម្មវិធីបណ្ដុះបណ្ដាលថែទាំ ផ្លូវថ្នល់ ក្នុងន័យលើក កម្ពស់គុណភាពហេដ្ឋារចនាសម្ព័ន្ធនៅបណ្ដាប្រទេស កម្ពុជា ឡាវ វៀតណាម ក៏ដូចជា ដើម្បីផ្សព្វផ្សាយ អំពីសារសំខាន់នៃការថែទាំ ផ្លូវថ្នល់ ជូនសាធារណជន ឱ្យបានដឹងផងដែរ។
លោក ហឿន សំនៀង បានគូសបញ្ជាក់ ពីកិច្ចខិតខំ យ៉ាងសស្រាក់សស្រាំ ឥតទំនេរដៃ ក្នុងការស្ថាបនា និងកែលម្អហេដ្ឋារចនាសម្ព័ន្ធផ្លូវថ្នល់នៃការដឹក ជញ្ជូន ក្នុងដែនដី នៃព្រះរាជាណាចក្រកម្ពុជា ដែលជាសរសៃឈាមដ៏សំខាន់ ដើម្បីបម្រើ ដល់សកម្មភាពសេដ្ឋកិច្ចជាតិ និងបានលើកឡើងអំពីបំណងប្រាថ្នា របស់ លោកទេសរដ្ឋមន្ដ្រី ចង់ឱ្យកូនខ្មែរជំនាន់នេះ និងជំនាន់ក្រោយៗទៀត ចេះសាងសង់ផ្លូវ-ថ្នល់ ស្ពាន ហេដ្ឋារចនាសម្ព័ន្ធ សាធារណៈ ដោយខ្លួនឯង ប្រកបដោយគុណភាព ដើម្បីលើកកម្ពស់ ការអភិវឌ្ឍវិស័យដឹកជញ្ជូន និងភស្តុភារកម្ម ឱ្យកាន់តែមានប្រសិទ្ធភាព ខ្ពស់ជូនជាតិមាតុភូមិ។
ជាមួយគ្នានោះផងដែរ លោកស្រី រដ្ឋលេខាធិការ បានសម្តែងនូវការអបអរសាទរ យ៉ាងក្រៃលែងជាមួយ ជោគជ័យរបស់វិទ្យាស្ថាន តេជោ សែន សាធារណការ និងដឹកជញ្ជូន ដែលទទួលបានជំនួយពីមូលនិធិ កិច្ចសហប្រតិបត្តិការ មេគង្គ-កូរ៉េ ក្នុងការកសាងសមត្ថភាពអ្នកបច្ចេកទេស មន្ត្រីពាក់ព័ន្ធ និងកម្មករសំណង់ តាមរយៈកម្មវិធីបណ្តុះបណ្តាល ថែទាំផ្លូវថ្នល់ លើកកម្ពស់ហេដ្ឋារចនាសម្ព័ន្ធ ប្រកបដោយចីរភាព សម្រាប់ប្រទេសកម្ពុជា និងបានចូលរួមមតិ ចាប់អារម្មណ៍ថា គម្រោងនេះ ធ្វើឡើង ដើម្បីផ្ដល់នូវឱកាសមិនមែន តែសម្រាប់ប្រទេសកម្ពុជា នោះទេ ប៉ុន្តែបានផ្ដល់ឱកាស ដល់ប្រទេសវៀតណាម និង ប្រទេសឡាវ ដើម្បីពង្រឹងសមត្ថ ភាព និងការចែករំលែកបទពិសោធន៍ នៃការវាយតម្លៃ តម្រូវការបណ្ដុះបណ្ដាល ការអភិវឌ្ឍកម្មវិធីបណ្ដុះបណ្ដាលការផ្លាស់ប្ដូរទស្សន កិច្ចសិក្សា ក្នុងពេលអនុវត្ត ការងារ ទៅវិញទៅមក ជាដើម។
លោកស្រី បានស្នើឱ្យគ្រប់ភាគីពាក់ព័ន្ធទាំងអស់ សហការ និងចូលរួមផ្តល់ ធាតុចូល ឱ្យបានផុលផុស ធ្វើយ៉ាងណាឱ្យការអនុវត្តគម្រោងនេះ ទទួលបាន ជោគជ័យ និងប្រកបដោយផ្លែផ្កា នាពេលអនាគត និងបានបង្ហាញនូវក្តីសង្ឃឹម យ៉ាងមុតមាំថា កិច្ចសហប្រតិបត្តិការនេះ នឹងជួយពង្រឹងដល់ការគ្រប់គ្រងប្រព័ន្ធ ថែទាំផ្លូវថ្នល់ នៅកម្ពុជា កាន់តែមានប្រសិទ្ធភាព។
សូមជម្រាបជូនថា កម្មវិធីបណ្ដុះបណ្ដាល ថែទាំផ្លូវថ្នល់នេះ នឹងក្លាយជាកម្មវិធី ដែលបានរចនាថ្មី និងមានតែមួយគត់ ក្នុងប្រទេសកម្ពុជា ជាកម្មវិធីសិក្សាមួយ ដែលមានរចនាសម្ព័ន្ធល្អ និងត្រូវបានបង្កើតឡើង ដើម្បីបំពាក់បំប៉ន ដល់សិក្ខា កាម គោលដៅ មកពីប្រទេសទាំងបី កម្ពុជា ឡាវ វៀតណាម ជាមួយអ្នកជំនាញ បច្ចេកទេសជាក់លាក់ និងទំនើបកម្ម នៃការថែទាំផ្លូវថ្នល់។
កម្មវិធីបណ្ដុះបណ្ដាលនេះ នឹងផ្ដល់ជូនដោយប្រើមធ្យោបាយ និងវិធីសាស្ត្រ ផ្សេងៗ គ្នា រួមមាន ការបណ្ដុះបណ្ដាលដោយផ្ទាល់ និងប្រយោលតាមកម្មវិធីអន ឡាញ សិក្ខាសាលាការអនុវត្ត ជាក់ស្ដែង នៅតាមការដ្ឋាន និងលំហាត់ ដើម្បីធានាថា សិក្ខាកាមគោលដៅ មកពីប្រទេសទាំងបី កម្ពុជា ឡាវ វៀតណាម នឹងអាចទទួលបាន អត្ថប្រយោជន៍ច្រើនបំផុត ពីកម្មវិធីបណ្ដុះបណ្ដាលនេះ ជាពិសេស ការប្រើប្រាស់ ប្រព័ន្ធគ្រប់គ្រងការសិក្សានឹងជួយសិក្ខាកម្មឱ្យទទួល បានអត្ថប្រយោជន៍ នៃការបណ្ដុះបណ្ដាល ពីកន្លែង ដែលពួកគេរស់នៅផ្ទាល់។
សូមបញ្ជាក់ថា នាយកដ្ឋានបណ្ដុះបណ្ដាល និងវិក្រឹតការនៃ វិទ្យាស្ថានតេជោ សែន សាធារណការ និងដឹកជញ្ជូន ទទួលបានការអនុម័តថវិកា ដើម្បីអនុវត្ត គម្រោងកសាង សមត្ថភាព ស្ដីពីវិធីសាស្ដ្រថែទាំផ្លូវថ្នល់ក្នុងការលើកកម្ពស់ហេដ្ឋា រចនាសម្ព័ន្ធ ប្រកបដោយចីរភាព សម្រាប់ប្រទេសកម្ពុជា-ឡាវ-វៀតណាម ពីមូលនិធិក្នុងក្របខណ្ឌ កិច្ចសហប្រតិបត្ដិការមេគង្គ-សាធារណរដ្ឋកូរ៉េ (MKCF) តាមរយៈវិទ្យាស្ថានមេគង្គ សម្រាប់រយៈពេល ១៨ ខែក្នុងគោលបំណងកសាង សមត្ថភាព អ្នកបច្ចេកទេស មន្ត្រីពាក់ព័ន្ធ និងកម្មករសំណង់នៅប្រទេស កម្ពុជា-ឡាវ-វៀតណាម តាមរយៈកម្មវិធី បណ្តុះបណ្តាលថែទាំផ្លូវថ្នល់ ដើម្បីលើកកម្ពស់ហេដ្ឋារចនាសម្ព័ន្ធ ប្រកបដោយចីរភាព សម្រាប់ប្រទេស កម្ពុជា-ឡាវ-វៀតណាម៕/V-PC
