[Rasmei Kampuchea Daily News] - ១០ ឆ្នាំ ប្រធានសហព័ន្ធខ្មែរកីឡាហែលទឹកបានកសាងសមិទ្ធផលចំនួន៤ធំៗ
ដោយៈសុផល/ភ្នំពេញៈលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹក បានកសាងស្នាដៃធំៗទាក់ទងនឹងកីឡាហែលទឹកគឺមជ្ឈមណ្ឌលហែលទឹកស្តង់ដារចំនួន៤នៅតាមបណ្តារាជធានីខេត្ត។
លោកទេសរដ្ឋមន្ត្រី បានចូលកាន់តំណែងជាប្រធានសហព័ន្ធតាំងពីឆ្នាំ២០០៩ រហូតដល់បច្ចុប្បន្ននេះ ហើយតាំងពីសហព័ន្ធនេះបានកើតឡើង លោកទេសរដ្ឋមន្ត្រី គឺជាប្រធានសហព័ន្ធតែម្នាក់គត់ ដែលមានស្នាដៃសាងសង់ហេដ្ឋារចនាសម្ព័ន្ធអាងហែលទឹកចំនួនបួន ដែលមាននៅតាមបណ្តារាជធានី-ខេត្តនានា រួមមាន៖ មណ្ឌលកីឡាហែលទឹកតេជោ សែន ខេត្តកំពង់ចាម អាងហែលទឹកខ្នាតតូចនៅស្រុកកោះធំ ខេត្តកណ្ដាល មណ្ឌលហែលទឹកបាត់ដំបង ខេត្តបាត់ដំបង និងបានកែលម្អលើកកម្រិតអាងហែលទឹកស្តង់ដាអន្តរជាតិនៅពហុកីឡដ្ឋានជាតិរាជធានីភ្នំពេញ។
នៅក្នុងអាណត្តិរបស់លោកតាមរយៈការស្វែងរកថវិកា ពីសប្បុរសជន ដោយមិនបានប្រើប្រាស់ថវិកាជាតិ ក្នុងគោលបំណងបណ្ដុះបណ្ដាលធនធាន គ្រូបង្វឹក កីឡាករ កីឡាការិនី និងអភិវឌ្ឍវិស័យកីឡាមួយនេះឱ្យកាន់តែរីកចម្រើន ក៏ដូចជាដើម្បីហ្វឹកហាត់ ត្រៀមចូលរួមការប្រកួតដណ្ដើមមេដាយលើឆាកអន្តរជាតិផងដែរ។
គួររំលឹកថា លោកទេសរដ្ឋមន្ត្រី ជាអតីតកីឡាករហែលទឹកជម្រើសជាតិយុវជនលើវិញ្ញាសារជំនាញហែលដោយរបៀបកង្កែប ក៏ប៉ុន្តែលោកក៏ចូលចិត្តហែលរបៀបមេអំបៅ ដែលកាលនោះលោកព្រឹទ្ធាចារ្យ ហែម ថុន គឺជាគ្រូបង្វឹក ដោយមានចិត្តស្រឡាញ់ និងចង់លើកស្ទួយវិស័យកីឡាហែលទឹកនៅកម្ពុជាឱ្យមានការរីកចម្រើន លោកទេសរដ្ឋមន្ត្រី ក៏បានចូលកាន់តំណែងជាប្រធានសហព័ន្ធតាំងពីឆ្នាំ២០០៩ រហូតដល់បច្ចុប្បន្ននេះ។
បន្ថែមពីលើនេះ លោកទេសរដ្ឋមន្ត្រីបានយកចិត្តទុកដាក់ខ្ពស់លើការឧបត្ថម្ភគាំទ្រ និងផ្គត់ផ្គង់ដល់គ្រូបង្វឹក បុគ្គលិកមន្ត្រីសហព័ន្ធ និងកីឡាករ កីឡាការិនីក្នុងក្រុមជម្រើសជាតិ ដោយបានផ្ដល់អាហារូបត្ថម្ភប្រចាំថ្ងៃក្នុងមួយថ្ងៃ៣ពេល ស្របតាមស្តង់ដារបបអាហារ ដោយមានមេចុងភៅ និងកូនកាំបិតជាអ្នកធ្វើម្ហូប និងជួយគាំទ្រផ្នែកផ្សេងៗទៀតផងដែរ។
គួរកត់សម្គាល់ផងដែរថា សហព័ន្ធខ្មែរកីឡាហែលទឹក មានទំនាក់ទំនងជាមួយនឹងបណ្ដាប្រទេសជា ច្រើនដូចជា៖ សហព័ន្ធហែលទឹកអាស៊ីអាគ្នេយ៍ សហព័ន្ធហែលទឹកអាស៊ី សហព័ន្ធហែលទឹកអន្តរជាតិ ដែលធ្វើឱ្យសហព័ន្ធមានកម្មវិធីប្រកួតច្រើនដូចជា៖ ការប្រកួតហែលទឹកជើងឯកយុវជនអាស៊ីអាគ្នេយ៍ ការប្រកួតកីឡាអាស៊ីអាគ្នេយ៍(ស៊ីហ្គេម) ការប្រកួតកីឡាអាស៊ី ការប្រកួតកីឡាអូឡាំពិក និងការប្រកួតវគ្គជម្រុះពិភពលោក៕
