នៅព្រឹកថ្ងៃចន្ទ ទី១០ ខែមករា ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអញ្ជើញចូលរួមក្នុងពិធីសម្ពោធបើកឱ្យប្រើប្រាស់ជាផ្លូវការកំណាត់ផ្លូវប្រវែង ៨៤,៧៥គីឡូម៉ែត្រ នៃគម្រោងធ្វើឱ្យប្រើសើរឡើងវិញផ្លូវជាតិលេខ៥ បាត់ដំបង-សិរីសោភ័ណ ក្រោមឥណទានសម្បទានពីរដ្ឋាភិបាលជប៉ុន ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយឯកឧត្តម មិកាមិ ម៉ាសាហ៉ីរ៉ូ ឯកអគ្គរាជទូតជប៉ុន ប្រចាំនៅព្រះរាជាណាចក្រកម្ពុជា ដោយមានការចូលរួមពី ថ្នាក់ដឹកនាំកំពូលៗរបស់ ក្រសួង-ស្ថាប័នជាតិ, អគ្គស្នងការដ្ឋាននគរបាលជាតិ, ក្រុមប្រឹក្សាអភិបាលខេត្ត ព្រមទាំង ថ្នាក់ដឹកនាំរបស់រាជរដ្ឋាភិបាលជាច្រើនរូបទៀត។ ជាកិច្ចចាប់ផ្ដើម ឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានធ្វើសេចក្ដីរាយការណ៍សង្ខេប ស្ដីពីកំណាត់ផ្លូវជាតិលេខ៥ ជូន សម្ដេចតេជោ នាយករដ្ឋមន្ដ្រី និងអង្គពិធីទាំងមូលថា កំណាត់ផ្លូវជាតិលេខ៥ បាត់ដំបង-សិរីសោភ័ណ មានប្រវែង ៨៤,៧៤ គីឡូម៉ែត្រ គឺជាប្រភេទផ្លូវចាក់បេតុងកៅស៊ូ (AC) មានកម្រាស់ ១៥សង់ទីម៉ែត្រ។ កំណាត់ផ្លូវនេះ ត្រូវបានពង្រីកទំហំផ្លូវមេដែលមានស្រាប់ ប្រវែង ៥១,៤៨គីឡូម៉ែត្រ ទទឹងមានប្រវែង ២៣ម៉ែត្រ មាន ៤គន្លង (គន្លងនីមួយៗ មានទទឹង ៣,៥០ម៉ែត្រ និងមាន ២គន្លងទៅ និង២គន្លងមក) ចិញ្ចើមផ្លូវមានទទឹង ៣ម៉ែត្រ (សងខាង) និងសួនទ្រូងផ្លូវខណ្ឌចែកទិសដៅចរាចរណ៍នៅចំកណ្តាល មានទទឹង ៣ម៉ែត្រ។ ឯកឧត្តម បានបន្ដថា កំណាត់ផ្លូវនេះ សាងសង់ផ្លូវវាងក្រុង ២ខ្សែ ប្រវែងសរុប ៣៣,២៦គីឡូម៉ែត្រ (ផ្លូវវាងក្រុងបាត់ដំបង ប្រវែង ២៣,៩២គីឡូម៉ែត្រ និងផ្លូវវាងក្រុងសិរីសោភ័ណ ប្រវែង ៩,៣៤គីឡូម៉ែត្រ) ក្នុងនោះ សាងសង់ស្ពានថ្មី ចំនួន២កន្លែង (លើផ្លូវវាង) ពង្រីក និងជួសជុលស្ពានដែលមានស្រាប់ចំនួន ១០កន្លែង (លើផ្លូវមេ)។ គម្រោងនេះ បានរួមបញ្ចូលទាំងការងារដាក់លូប្រអប់ ចំនួន៧៦កន្លែង និងលូមូលតាមបណ្តោយផ្លូវ ចំនួន១១៣កន្លែង ព្រមទាំង បំពាក់ភ្លើងបំភ្លឺLED នៅតាមផ្លូវប្រសព្វ។ លើសពីនេះទៀត ឯកឧត្តម ទេសរដ្ឋមន្រ្តី បានគូសបញ្ជាក់ថា ផ្លូវជាតិលេខ៥ គឺជាខ្សែផ្លូវដ៏មានសក្តានុពលតភ្ជាប់ទំនាក់ទំនងរូបវន្ត ស្ថាប័ន និងប្រជាជននៃខេត្តបាត់ដំបង ខេត្តបន្ទាយមានជ័យ និងបណ្តាខេត្តជាប់ព្រំប្រទល់គ្នា ហើយក៏ជាខ្សែផ្លូវយុទ្ធសាស្រ្តយ៉ាងសំខាន់តភ្ជាប់ពីរាជធានីភ្នំពេញ ទៅច្រកទ្វារព្រំដែនប៉ោយប៉ែត-អារញ្ញប្រាថេត (ព្រំដែនកម្ពុជា -ថៃ) ដោយឆ្លងកាត់ខេត្ត ចំនួន៥ រួមមាន៖ ខេត្តកណ្តាល, កំពង់ឆ្នាំង, ពោធិ៍សាត់, បាត់ដំបង និងបន្ទាយមានជ័យ។ ផ្លូវជាតិលេខ៥ គឺជាផ្នែកមួយនៃផ្លូវអាស៊ានហាយវ៉េលេខ១ (AH1) ដែលបានតភ្ជាប់គ្នារវាងរាជធានីភ្នំពេញ ទីក្រុងបាងកក និងទីក្រុងហូជីមិញ ព្រមទាំងជាខ្សែផ្លូវស្ថិតក្នុងរបៀងសេដ្ឋកិច្ចខាងត្បូងដ៏មានសក្តានុពល និងការប្រកួតប្រជែងខ្លាំងសម្រាប់វិស័យទេសចរណ៍ ពាណិជ្ជកម្ម វិនិយោគ ភស្តុភារកម្ម និងសេដ្ឋកិច្ចរបស់អាស៊ាន ក៏ដូចជាមហាអនុតំបន់មេគង្គដែរ។ ដោយឡែក ឯកឧត្តម មិកាមិ ម៉ាសាហ៉ីរ៉ូ ឯកអគ្គរាជទូតជប៉ុន ប្រចាំនៅព្រះរាជាណាចក្រកម្ពុជា បានសង្កេតឃើញថា សេដ្ឋកិច្ចកម្ពុជានាពេលបច្ចុប្បន្ននេះ កំពុងមានការរីកចម្រើនលូតលាស់យ៉ាងល្អប្រសើរ ហើយផ្លូវជាតិលេខ៥ ក៏ជាកត្តាមួយដ៏សំខាន់ ក្នុងការទ្រទ្រង់ការរីកចម្រើនលូតលាស់នៃសេដ្ឋកិច្ចជាតិ ជាពិសេសផ្លូវជាតិលេខ៥ ដែលជាផ្នែកមួយនៃច្រករបៀងសេដ្ឋកិច្ច ភាគខាងត្បូង តភ្ជាប់ប្រទេសថៃ និងប្រទេសវៀតណាម កំពុងដើរតួនាទីយ៉ាងធំធេង ក្នុងការអភិវឌ្ឍន៍សេដ្ឋកិច្ចកម្ពុជា។ ឯកឧត្តម បានបន្ថែមថា ការធ្វើឱ្យប្រសើរឡើងផ្លូវជាតិលេខ៥ ដោយគាំទ្រពីប្រទេសជប៉ុន កំពុងសាងសង់បែងចែកជា ៣ផ្នែក រួមមាន ៖ ភាគខាងជើង ភាគកណ្ដាល និងភាគខាងត្បូង ហើយភាគខាងជើង ត្រូវបានសាងសង់រួចរាល់មុនគេ។ ឯកឧត្តម បានបញ្ជាក់ថា ផ្លូវជាតិលេខ៥ គឺជាផ្លូវជាតិមួយ ក្នុងចំណោមផ្លូវជាតិទៃទៀត កំពុងមានភាពមមាញឹកបំផុត ក្នុងប្រទេសកម្ពុជា។ នាឱកាសនោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា គម្រោងធ្វើឱ្យប្រសើរឡើងវិញផ្លូវជាតិលេខ៥ បាត់ដំបង-សិរីសោភ័ណ ដែលសម្ពោធនាពេលនេះ គឺជាផ្លូវផ្ការវាង កម្ពុជា-ជប៉ុន ក្នុងកិច្ចសហប្រតិបត្តិការ និងលិខិតខំប្រឹងប្រែង ដើម្បីអភិវឌ្ឍន៍សេដ្ឋកិច្ចសង្គមនៅប្រទេសកម្ពុជា។ សម្ដេចតេជោ នាយករដ្ឋមន្ដ្រី ក៏បានអបអរសាទរចំពោះគម្រោងធ្វើឱ្យប្រសើរឡើងវិញផ្លូវជាតិលេខ៥ បាត់ដំបង-សិរីសោភ័ណ ព្រោះជាផ្លូវសម្រាប់សេដ្ឋកិច្ចជាតិ ក្នុងការដឹកជញ្ជូនកសិផលរបស់ប្រជាពលរដ្ឋ ដើម្បីធ្វើយ៉ាងណាឱ្យសេដ្ឋកិច្ចជាតិ មានការរីកចម្រើនបន្ថែមទៀត។ សូមជម្រាបជូនថា កំណាត់ផ្លូវលេខ៥ បាត់ដំបង-សិរីសោភ័ណ បានចំណាយថវិកាសរុបប្រមាណ ១៦៥.៧៨លានដុល្លារអាមេរិក ជាឥណទានសម្បទានពីរាជរដ្ឋាភិបាលជប៉ុន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការងារដោះស្រាយផលប៉ះពាល់ បោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះ៕