សិក្ខាសាលាស្តីពីនីតិវិធីនៃកម្ចីឥណទាន ដែលផ្តល់ដោយរដ្ឋាភិបាលឥណ្ឌា (Workshop on Lines of Credit offered by Government of India) ប្រព្រឹត្តទៅក្រោមអធីបតីភាព ឯកឧត្តមរដ្ឋលេខាធិការ ឡេង ធនយុទ្ធា តាមរយៈប្រព័ន្ធវីដេអូ ថ្ងៃព្រហស្បតិ៍ ៤កើត ខែបុស្ស ឆ្នាំឆ្លូវ ត្រីស័ក ព.ស ២៥៦៥ ត្រូវថ្ងៃទី៦ ខែមករា ឆ្នាំ២០២២ នៅទីស្តីការ ក្រសួង ឯកឧត្តម ឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញ ជាអធិបតីក្នុងសិក្ខាសាលាស្តីពីនីតិវិធីនៃកម្ចីឥណទាន ដែលផ្តល់ដោយរដ្ឋាភិបាលឥណ្ឌា (Workshop on Lines of Credit offered by Government of India) ដោយមានការចូលរួមដោយផ្ទាល់ និងតាមរយៈប្រព័ន្ធវីដេអូពីចម្ងាយពីថ្នាក់ដឹកនាំក្រសួងទទួលបន្ទុក តំណាងក្រសួងសេដ្ឋកិច្ច និងហិរញ្ញវត្ថុ ស្ថានទូតឥណ្ឌាប្រចាំកម្ពុជា មន្ត្រីជំនាញធនាគារ Exim Bank ឥណ្ឌា តំណាងក្រសួង-ស្ថាប័នពាក់ព័ន្ធ និងក្រុមការងារជំនាញក្រោមឱវាទក្រសួង។ សិក្ខាសាលានេះរៀបចំឡើងដោយក្រសួងការបរទេសឥណ្ឌា សហការជាមួយធនាគារ Exim Bank ឥណ្ឌា និងស្ថានទូតឥណ្ឌាប្រចាំព្រះរាជាណាចក្រកម្ពុជា ក្នុងគោលបំណងដើម្បីផ្សព្វផ្សាយអំពីនីតិវិធីទាក់ទងនឹងការស្នើសុំកម្ចីឥណទានដល់ក្រសួងស្ថាប័នពាក់ព័ន្ធ។ សិក្ខាសាលានេះផ្តោតជាសំខាន់លើដំណើរការរៀបចំសំណើឥណទានកម្ចី គោលការណ៍ណែនាំនៃគម្រោងជំនួយអភិវឌ្ឍន៍ និងសេដ្ឋកិច្ចឥណ្ឌា(IDEAS) នីតិវិធីនៃការធ្វើលទ្ធកម្ម បទពិសោធន៍បណ្តា ប្រទេសមួយចំនួនក្នុងការរៀបចំសំណើសុំកម្ចីឥណទានរបស់ឥណ្ឌា នីតិវិធីស្តង់ដានៃការរៀបចំសំណើគម្រោង និងលក្ខខណ្ឌនៃការផ្តល់កម្ចីឥណទាន។ ថ្លែងក្នុងកម្មវិធីបើក ឯកឧត្តមរដ្ឋលេខាធិការបានគូសបញ្ជាក់ពីបទពិសោធន៍របស់កម្ពុជាក្នុងការស្វែងរក និងទទួលបានប្រាក់កម្ចីពីបណ្តាប្រទេសផ្សេងៗក្រៅពីប្រទេសឥណ្ឌា និងបានបង្ហាញសុទិដ្ឋិនិយមថា៖ សិក្ខាសាលានេះនឹងផ្តល់ឱកាសឱ្យកម្ពុជាបានស្វែងយល់បន្ថែមពីរបៀបធ្វើការជាមួយប្រទេសឥណ្ឌា ដើម្បីទទួលបានកម្ចីឥណទានមកអភិវឌ្ឍហេដ្ឋារចនាសម្ព័ន្ធរបស់កម្ពុជា។ តំណាង Exim Bank បានលើកឡើងជាឧទាហរណ៍នូវបទពិសោធន័ អំពីដំណើរការនៃការស្នើសុំ និងការអនុវត្តគម្រោងសាងសង់មន្ទីរពេទ្យ ។ មន្រ្តីតំណាង Exim Bank ក៏បានឆ្លើយតបទៅនឹងសំនួររបស់សិក្ខាកាមមកពីក្រសួងស្ថាប័នពាក់ព័ន្ធ ទាក់ទងទៅនឹងព័ត៌មានអំពីគម្រោងការនានាដែលបានអនុវត្តរួចមកហើយនៅកម្ពុជា វិស័យផ្សេងៗដែលអាចស្នើសុំការរៀបចំ Concept Project ឬសំណើគម្រោង ពេលវេលា ការសិក្សាគ្រាដំបូង ការសិក្សាសមិទ្ធិលទ្ធភាព កាលបរិច្ឆេទ និងលក្ខណៈវិនិច្ឆ័យនៃគម្រោង។ល។ សូមជម្រាបជូនថា៖ ជំនួយអភិវឌ្ឍន៍ក្នុងទម្រង់ជាឥណទានប្រាក់កម្ចីសម្បទាន (LOCs) របស់រដ្ឋាភិបាលឥណ្ឌា ក្រោមគម្រោងជំនួយអភិវឌ្ឍន៍ និងសេដ្ឋកិច្ចឥណ្ឌា(IDEAS) តាមរយៈធនាគារ Exim Bank ឥណ្ឌា ផ្តោតជាសំខាន់លើការអភិវឌ្ឍវិស័យហេដ្ឋារចនាសម្ព័ន្ធសំខាន់ៗរួមមាន៖ ការតភ្ជាប់ការដឹកជញ្ជូនតាមផ្លូវដែក ផ្លូវថ្នល់ និងកំពង់ផែ ការបង្កើត និងចែកចាយថាមពលអគ្គិសនី កសិកម្មនិងប្រព័ន្ធធារាសាស្រ្ត ឧស្សាហកម្មផលិត ការថែទាំសុខភាព ការអប់រំ និងការកសាងសមត្ថភាព ក្នុងគោលបំណងដើម្បីពន្លឿនកំណើន និងការអភិវឌ្ឍក្នុងតំបន់ លើកកម្ពស់ទំនាក់ទំនងរវាងប្រជាជននិងប្រជាជន និងជំរុញពាណិជ្ជកម្ម៕